E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Pastrimi në qytet/ Shqetësim hedhja e inerteve dhe mbetjeve joorganike në kontejnerë

8 Tetor 2025, 14:53, Qyteti im CNA

Pastrimi në qytet/ Shqetësim hedhja e inerteve dhe mbetjeve joorganike

Ndërmarrja e shërbimit të pastrimit në Shkodër paralajmëron “zero tolerancë” ndaj ndotësve të qytetit.

Vetëm gjatë një jave, Policia Bashkiake ka monitoruar dhe gjobitur mbi 20 raste të hedhjes së mbetjeve pa kriter, duke ndëshkuar ata që nuk respektojnë rregullat e pastrimit dhe menaxhimit të mbetjeve.

Altin Shabaj, Drejtor i Drejtorisë së Pastrimit dhe Gjelbërimit, deklaroi se çdo rrugë, lagje dhe pikë grumbullimi është nën monitorim të vazhdueshëm.

Sipas tij, janë marrë masa konkrete ndaj shkelësve, ndërsa u bëri thirrje qytetarëve që të mos hedhin lëndë drusore, mobilje apo orendi shtëpiake në koshet e zakonshme, pasi ato nuk kanë vend në qytet, sipas rregullores bashkiake për menaxhimin e mbetjeve.

“Ne aktualisht po i evidentojmë dhe në bashkëpunim me policinë bashkiake po i gjobisim. Qëllimi nuk është të gjobisim qytetarët, por një sensibilizim në mënyrë që pranë pikave të caktuara të dërgojnë vetëm mbetjet organike dhe jo të gjelbra apo orendi shtëpiake. Për sa i përket rregullores ato mund të depozitohen vetëm në landfillin e Bushatit nga vetë qytetarët”, tha Shabaj.

Ndërkohë, Henri Faci, menaxher i firmës që kryen shërbimin e pastrimit në qytetin e Shkodrës, foli për menaxhimin e intervaleve të pastrimit dhe evidentimin e zonave me problematika të përsëritura. Ai theksoi se shërbimi po monitorohet me kujdes, por bashkëpunimi dhe ndërgjegjësimi i qytetarëve mbeten vendimtarë për të ruajtur pastërtinë e përbashkët.

“Procesi i pastrimit në Shkodër funksionon me orare. Me 2 mjete punojmë gjatë ditës dhe 4 mjete gjatë natës. Jemi të gatshëm të mbajmë këtë qytet sa më pastër, por problematikë mbetet hedhja e mbetjeve të bizneseve dhe bllokimi i rrugicave sidomos gjatë natës. Ne kemi detyrim vetëm pastrimin e kontejnerëve nga mbetjet urbane, pra ato mbetje të konsumit familjar. Fatkeqësisht aty hidhen edhe mbetje të gjelbra, divanë, lëndë drusore etj.”, tha Faci.

Në një kohë kur qyteti përballet me rritjen e sasisë së mbetjeve dhe shpesh abuzimin dhe papërgjegjshmërinë, institucionet kërkojnë bashkëpunim më të gjerë për të garantuar pastërtinë e mjedisit!/CNA