Sa shumë peshq dhe Giorgia Meloni në restorant “Rozafa Tuna” në Shëngjin...

9 Shtator 2025, 10:08, Qyteti im Xhevat Mustafa

Sa shumë peshq dhe Giorgia Meloni në restorant “Rozafa

Disa mbresa e pyetje pas një dreke të shijshme në "Tratoria Meloni" në Shëngjin...

Kushdo që e adhuron Giorgia Meloni-n si femër e si kryeministre e Italisë mund ta nxjerrë mallin e mund të ekstazohet edhe te restorant "Rozafa Tuna", me emrin “Tratoria Meloni”, në Shëngjin, një investim i radhës në fushën e kulinarisë, i Gjergj Lucës, hapur më 22 gusht 2024. Duket e kuptohet se për këtë lokal, ndoshta me dëshirën për të nderuar veten, mikun e tij, kryeministrin Edi Rama dhe homologen e mikeshën e tij italiane, Gjergji ka investuar pa kursim e me vizion! Duke e lënë mënjanë politizimin, për objektivitet e për çka duket e shikohet, ky restorant meriton lavdërim e jo kritika vetëm pse Gjergji, sidomos në këto 12 vjet në pushtet është bërë mik për kokë apo popullorçe, "bythë e brekë", me Edi Ramën! Në sallën e madhe të tij, me kompozim modern arkitekturor e pamor, janë aq shumë fotografi të Giorgia Meloni-t nëpër mure, sa nuk gjenden edhe në shtëpinë dhe kabinetin e saj në Romë. Mungonin vetëm në xhamat e dy ambienteve të kuzhinave e në...wc!

Sa shumë peshq dhe Giorgia Meloni në restorant “Rozafa

Tratoria Meloni në Shëngjin

Thjesht për informacion, fotografitë janë realizuar e përpunuar me cilësi të spikatur artistike nga “Mjeshtri i Madh”, Helidon Haliti. Ato paraqesin, përgjithësisht bukur e këndshëm, gjendje të ndryshme emocionale dhe “pa maskë” të kryeministres italiane.

Helidon Haliti

Prandaj, e bëjnë këtë restorant njëherazi modern si objekt kulinarie dhe galeri artistike për nga qëllimi i dytë. Çudia tjetër: në restorantin me pronar Gjergj Lucën dhe "dhuratë" për Meloni-n, që, po e përsëris, për të mos ia ngrënë hakën, është i lavdërueshëm për nga ideimi dhe strukturimi, për nga cilësia e gatimit, pijeve dhe e shërbimit, si dhe nga çmimet normale dhe të pranueshme për sasinë dhe cilësinë e ushqimeve në pjata e të pijeve në shishe e gota, bën përshtypje edhe fakti se mes dhjetëra fotografive të kryeministres italiane "janë harruar", qoftë edhe vetëm dy fotografi të kolosëve të teatrit e të kinematografisë shqiptare, aktorëve të shquar Ndrek dhe Mimika Luca, që për shumicën e shqiptarëve janë përjetësisht më të mëdhenj se politikania Giorgia Meloni.

Sa shumë peshq dhe Giorgia Meloni në restorant “Rozafa

Gjithashtu, shumëkujt prej tyre, mund t'i shkojë ndërmend se Giorgia Meloni është e përkohshme si kryeministre! Nuk dihet me siguri nëse e arrin ditën e fundit të mandatit të parë e na rrëzohet më shpejt si qeveria e François Bayrou (Macron) në Francë, më 8 shtator 2025. Nëse jo, a do të vazhdojë ky restorant në Shëngjin, nënkuptueshëm "kryevepër" e artistëve Edi Rama dhe Gjergj Luca kushtuar mikeshës Giorgia Meloni, ndoshta e vetmja femër së cilës, Edi Rama, burrë afro dy metrosh dhe disa herë i dashuruar e martuar zyrtarisht apo me bashkëjetesë, i është nënshtruar jo një herë publikisht, duke iu përkulur edhe në gjunjë..., sa ka çuditur shqiptarë e ndërkombëtarë?

Arsyeja e parë apo kryesore, e nënkuptueshme dhe publike, është për "dashamirësinë dhe bujarinë" e saj ndaj Shqipërisë! Domethënë, ndaj Rama- qeverisë, me financimin dhe ndërtimin e Kampit të Gjadrit për refugjatët dhe emigrantët problematikë e të padëshiruar për Italinë. Meqenëse edhe ky kamp qe jetëshkurtër, mund të mendohet se edhe merita e Meloni-t mbetet të jetë gjysmake apo më e vogël, çerekase apo çyrykase... Sikur u zgjata me ca mbresa, vërejtje e hamendësime subjektive?! Shqetësimi im kryesor është: a do të vazhdojë të funksionojë pas largimit të Giorgia Meloni-t nga posti i kryeministrit dhe kur ajo të mbetet vetëm drejtuese partie dhe deputete? Gjithashtu, nëse nuk mbetet po kaq e fortë miqësia Rama-Meloni pas largimit të saj nga posti i tanishëm, a do të vazhdojë ky restorant me të njëjtin emërtim, ideim dhe kompozim mural?

Apo "do të rilindë" e do të rikonstruktohet për t'iu kushtuar një mikeshe apo miku të ri të kryeministrit Edi Rama? Po sikur të vijë si një rrufe në ditë vere, që dosja McGonigal-Albania të djegë edhe kryeministrin Rama, ç'do të bëhet me emërtimin dhe strukturimin e brendshëm të këtij restoranti? Apo e ka gati? P.sh., Huma Abedin, të gruas së Alex Soros, vëllait për shpirt të Edi Ramës?

Duke e njohur prej rreth 40 vitesh Gjergjin, qysh nga mesvitet 1980, kur punonim në RTSH (unë në Radio Tirana e ai në TVSH) e duke qenë së bashku me Aida Shehun mbështetës të qëllimit dhe dëshirës së tij për një takim me Sali Berishën, kur e kishte akoma në mendje idenë e nisjes së biznesit në kultivimin, frigoriferimin, tregtimin dhe gatimin e peshqve, kam bindjen se do ta gjejë pa vramendje të fortë zgjidhjen e leverdishme për atë apo përgjigjen e pyetjes sime të fundit! Domethënë, që ashtu si në start, rreth 30 vjet më parë, edhe në të ardhmen, do të dijë të vendosë për të mirën e vet, se cila erë ta shtyjë më fort nga pas apo tërheqë më shumë nga para, ajo e pushtetit apo e... xhepit?

Tratoria Meloni, Shëngjin

Duke qenë se bën pjesë në tufën e bosëve të bizneseve apo të oligarkëve, mund të jetë më e mundshme që, si për shumicën, miqësia dhe mirënjohja e sinqertë dhe përjetë, të mbetet, në mos krejt e fundit, pak më sipër, duke u përshëndetur ftohtë, si të njohur të vjetër... Për të shmangur çdo keqkuptim, edhe pse e kam numrin e telefonit të Gjergjit, nuk e njoftova, që të mos e vija në siklet! Domethënë, që si ish-miq apo bashkëpunëtorë të vjetër, të urdhëronte vartësit të mos marrin pagesë nga unë e bashkëshortja ime për atë drekë, vërtet të këndshme e të shijshme./CNA