LEXO PA REKLAMA!

SHKARKO APP

Shënim/ Kush i shiti dokumentet e inceneratorëve

6 Shkurt 2024, 10:05, Politikë CNA
Shënim/ Kush i shiti dokumentet e inceneratorëve
Erion Veliaj, Carlo Bollino dhe Baton Haxhiu

Në media dhe jo vetëm zien prej muajsh çështja e shumëpërfolur: Kush i shiti dokumentet e inceneratorëve? A thua se ky është halli më i madh i një skandali 178 milionë euro.

Shkrimet, editorialet, shënimet, nuk kanë munguar nga mediat e paguara nga inceneratorët, të cilat mesa duket i mundon pa masë kjo pyetje.

Në fakt, kjo pyetje i shqetëson, i mundon, pasi nëpërmjet këtyre dokumenteve, një pjesë e rëndësishme e tyre e publikuar nga CNA, vërteton përfshirjen e disa mediave, pagesave që kanë marrë, si dhe kush janë pronarët e vërtetë të inceneratorëve dhe skemën e vjedhjes së miliona eurove.  

Janë ngritur hipoteza, janë krijuar skema ku kanë përfshirë edhe zv-kryeministrin Arben Ahmetaj, se ky i fundit ka shpërndarë dokumentet. 

Por kush i nxori dokumentet e inceneratorëve? 

CNA ka qenë ndër të para media që ka denoncuar me fakte këtë aferë korruptive që deri më tani u ka kushtuar shqiptarëve 178 milionë euro. 

Në fakt një pjesë e kazanit mediatik merren me vrull dhe pasion që të gjejnë nga kush kanë dalë dokumentet që i nxorën zbuluar jo vetëm ata, por një sërë zyrtarësh të lartë, e të çojnë te kryebashkiakët, ministrat, 99-çat e Rilindjes etj. Lodhen kot pasi shumica e dokumenteve gjenden "online".

Kërkojnë të shmangin thelbin, dëmin që u është bërë shqiptarëve duke i vjedhur. 

Në vend që të merren me personat e përfshirë në këtë skemë korruptive dhe shqiptarëve t'u kthehen paratë e grabitura, ku ka shërbyer prej muajsh një bandë mediatike, mercenarë mediatikë, gjobaxhinj, duan të gjejnë me ngulm nga ku kanë dalë dokumentet për aferën e shekullit. 

Kanë përdorur një sërë formash, tentativa për të blerë media, apo për të mbyllur gojën e profesionistëve, por me këto nuk ia kanë dalë. 

Pyetja që në fakt ka peshë në këtë histori është: A janë të vërteta këto dokumente dhe çfarë kanë zbuluar? 

Dokumentet e publikuara nga mediat e inceneratorëve janë plotësisht të vërteta dhe madje kanë ndihmuar edhe SPAK-un në lidhje me hetimet për këtë aferë. 

Nuk ka rëndësi se kush i ka nxjerrë këto dokumente. Nuk ka rëndësi se a ka qenë Sali Berisha në bashkëpunim me Arben Ahmetajn, Veliaj me Ilir Metën, Jorida Tabaku me Edi Ramën, nuk ka rëndësi nëse i ka nxjerrë Klodian Zoto me Damian Gjiknurin apo Mirel Mërtiri me Vjollca Hoxhën, apo ndonjë person tjetër i përfshirë në këtë aferë.

I rëndësishëm është fakti që dokumentet janë në duart e SPAK-ut dhe vërtetojnë që inceneratorët janë një aferë korruptive, ku në të janë përfshirë "kokat" e shtetit.

Dokumentet kanë treguar se kush janë pronarët e vërtetë të inceneratorëve, gjithë skemën dhe duket më së miri se për këtë aferë ka pasur vullnet politik. 

Propaganda e pushtetit, e gjendur në këto kushte, së pari kërkon të mashtrojë opinionin duke e spostuar debatin në teza pa vlerë dhe nga ana tjetër po vijojnë me një tjetër skemë, që të mos lejojnë SPAK-un të veprojnë deri në fund, duke ngritur komisione "Ad-Hoc". Edhe kjo tentativë e tyre ka për të dështuar, pasi nuk kanë qenë të pakta edhe reagimet e ndërkombëtarëve. 

Thelbi është që SPAK duhet të hetojë deri në rrënjë këtë aferë dhe duhet të vihen para drejtësisë të gjithë personat e përfshirë. Është koha e SPAK-ut të veprojë dhe të tjerë persona të vihen në pranga.  

Këtu u kthejmë sërish përgjigje mediave të inceneratorëve dhe personave të interesuar,  që me pak hulumtim "online" në Holandë, marrin përgjigjen që duan për pyetjen e famshme: Kush i nxori apo i shiti dokumentet e inceneratorëve?

CNA ka publikuar dokumentet zyrtare nga Dhoma e Tregtisë në Holandë, ku tregohet gjithë skema për këtë aferë korruptive.

Në vend që të hamendësojnë, mirë është që të punojnë, të hulumtojnë, megjithëse as punën e tyre nuk e bëjnë dot pasi duart dhe gojën i kanë të zëna me paratë e pista dhe plehrat e inceneratorëve./CNA 

 

11:53 Politikë

Jorgo Goro, në SPAK

Kryetari në detyrë i Bashkisë së Himarës, Jorgo Goro, ësht...

Lajmet e fundit nga