LEXO PA REKLAMA!

SHKARKO APP

Për ski në Dardhë / Pista e vetme në Shqipëri pret të pasionuarit pas sporteve dimërore

2024-01-27 20:26:00, Qyteti im CNA

Për ski në Dardhë / Pista e vetme në Shqipëri pret

Federata Shqiptare e Skive ka organizuar këtë të shtunë projektin "Të gjithë në borë", i realizuar me mbështetjen financiare të Agjensisë Kombetare të Rinisë si edhe Ministrit të shtetit për Rininë dhe Fëmijët.

Ky projekt ka patur në fokus të rinjtë nga qytete të ndryshme të Shqipërisë të cilët janë përzgjedhur për të praktikuar sportin e bukur të skive. E pikërisht për këtë projekt është zgjedhur fshati turistik i Dardhës në juglindje, me pjesëmarrjen e 65 të rinjve të cilët shijuan borën dhe praktikuan sportin dimëror. 

Përfaqësuesi i Federatës, Etrit Xhuglini, ka treguar se ky projekt përfshin të rinjtë në sportet dimërore, duke bërë edhe apel që të afrohen drejt këtyre sporteve.

“Siç ka dhe titullin projekti “Të gjithë në borë” është një projekt i Federatës Shqiptare nën financimin e AKR-së dhe Ministrisë së Shtetit për Rininë dhe Fëmijët. Bëhet fjalë për sot që janë mbi 65 fëmijë, por pjesë e projektit janë 100 të rinj nga zonat kryesisht malore si Puka, Borja e Kukësit, Korça, kemi dhe Durrësin sot. Në fundjavat e tjera në vijim vjen edhe Tirana, jemi munduar të përfshijmë të rinjtë në sportet dimërore.

Të flasim për borën për mirë, mos flasim për katastrofa e mbyllje rrugësh, por ti përfshijmë të rinjtë të merren me sporte dimërore, mos flasin vetëm për futboll, basketboll, por edhe për ski. Këte vit kemi përfshirë vetëm ski në projekt, por pse jo vitet e tjera mund ta përfshijmë edhe snoëboard apo disiplina të tjera të sporteve dimërore.

Federata Shqiptare e skive nën drejtimin e presidentit Elis Toçi ka patur një nga synimet kryesore masimizimin e sportit të skive brenda Shqipërisë. Ne organizojmë çdo vit 2-3 kampe trajnimesh me të rinj kryesisht nga veriu i Shqipërisë, për të rritur dëshirën dhe kapacitetet e skijimit në Shqipëri. Shqiptarët për fat të mirë edhe me rritjen e gjendjes ekonomike, skijojnë, shkojnë në Kolashin, Itali, Mavrovë.

 Janë mbi 30 mijë shqiptarë  që shkojnë fundjavave në dimër për të skijuar në Mal të Zi. Pra po flasim për një popull që i ka qejf skitë, por kjo është vetëm një pistë modeste që mbahet me mish e me shpirt nga familja Tasho, pistë për amatorë, s’kemi pista për të organizuar gara ndërkombëtare. Ne po përpiqemi ti bëjmë të rinjtë të kënaqen me sportet dimërore”, ka thënë ai.

Projekti ka përzgjedhur rreth 100 të rinj që do të vazhdojnë të bëjnë ski edhe fundjavat e ardhshme. Ata i përkasin grupmoshave të ndryshme si edhe qyteteve të ndryshme kryesisht ato malore. Tre nga të rinjtë pjesëmarrës në këtë aktivitet, përkatësisht nga qyteti i Pukës, Durrësit e pa dyshim Korçës, kanë treguar kënaqësinë e veçantë që po përjetojnë gjatë të bërit ski në Dardhë.

“Kam që i vogël që e praktikoj këtë sport, jam 18 vjeç tani dhe sa herë ka borë Dardha është destinacioni im i preferuar. Sporti i skive është më i bukuri nga sportet dimërore, që të fal adrenalinë dhe ndihesh me një emocion ndryshe nga sportet e tjera. Je në borë duke rrëshkitur, këtu nga Dardha është dhe kjo pamja e mrekullueshme”, është shprehur njëri prej tyre.

Fshati turistik i Dardhës mbetet një nga më të frekuentuarit gjatë dimrit në juglindje, e kjo për vetë faktin se atje mund të skijohet. Drejt fshatit ditën e sotme kanë udhëtuar edhe turistë të cilët kanë zgjedhur që fundjavën ta kalojnë në qytetin e bukur të Korçës.

“Unë vij nga Puka, quhem Amanda, dhe këtu po duket shumë bukur. Është e ndarë sipas niveleve edhe pistat, për të provuar veten tonë. Është hera e parë që vij dhe po më pëlqen shumë. Të jep shume adrenalinë.

 Jemi në Dardhë se kemi sjelle ekipin e Pukës, ky është një projekt shumë i mirë dhe i bëj thirrje gjithë shkollave e të rinjve të bëhen pjesë e këtij projekti sepse skitë janë një sport shumë i kërkuar në botë. Krijojnë zhvillim për njerëzit, vendin dhe është kënaqësi e madhe që jemi sot në Dardhë, me këtë pistë të tillë e me organizim super fantastic”, janë shprehur turistët./ CNA

Lajmet e fundit nga