E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Ndërkombëtarët që s’bëzajnë

18 Janar 2024, 21:18, Editorial Klodian Tomorri

Gazetari Klodian Tomorri

Hetimi parlamentar ishte pushteti i vetëm jashtë kontrollit të qeverisë. Ishte. Sepse tani nuk është më.

Sot Edi Rama është qeveria. Edi Rama është Parlamenti. Ai është edhe Presidenti, prokurori, gjykatësi. Ishte dhe FBI- ja madje. Pra, zoti Rama është gjithçka.

Disa optimistë thonë se nuk është dot SPAK-u. Të tjerë thonë se është vetëm pjesërisht. Ndërsa ata me pesimistët mendojnë që zoti Rama është edhe SPAK-u. Por ç’rëndësi ka? SPAK-u nuk mund të jetë opozita.

Kollonat e shtetit ligjor shemben një nga një. Dhe gjithçka kalon me një normalitet dhe indiferencë që të kall tmerrin. Ajo që vjen më pas nuk ka nevojë fare të paragjykohet. Na e tregon historia. Pushteti pa kufi ka korruptuar dhe Papet në Vatikan.

Një pjesë e opozitës, ajo që drejton zoti Basha, me fjalë thotë se është kundër uzurpimit të hetimit parlamentar. Por vetëm kaq. Sepse nga tjetër mendon se jeta parlamentare duhet të vazhdojë normalisht.

Një pjesë tjetër e opozitës, që janë partitë e vogla nuk ndihen fare. Ose kanë frikë të ndihen. Nëse këta thonë të gjithë se jemi në opozitë me qeverinë, ka një pyetje shumë të thjeshtë. Kujt po ja merr qeveria komisionet hetimore?

Taulant Ballës? Blendi Çuçit? Damian Gjiknurit? Jo. Opozitës po ja merr. Përfshirë asaj pjese të opozitës që beson ose ka qejf të besojë se vendi është në normalitet. Dhe përmes tyre po ja u merr qytetarëve.

Megjithatë ky vend ka parë shumë opozita. Ka parë opozita me armë, opozita pa armë. Opozita që flasin, opozita që heshtin. Ka parë dhe opozita Kërpërate. Tani po shikon dhe ndërkombëtare që nuk duan me opozitën. Ose më saktë ndërkombëtare që nuk bezajnë, kur opozita dhunohet.

Heshtin ndërkombetarët. Ashtu si heshtën kur maxhoranca mori të paktën 5 deputetë në tavolinë duke ndryshuar në mënyrë të njëanshme marrëveshjen e 5 qershorit. Nuk bezajnë.

Ndoshta mendojnë që me heshtjen e tyre po “vrasin” Non Gratan. Ose besojnë se demokracinë do ta ruajë SPAK-u me Dumanin. Por kjo është mbrapsht. Nëse demokracitë do të ruheshin me policë dhe prokurorë, Shqipëria e Enver Hoxhës do ishte vendi më demokratik në botë.