web counter
LEXO PA REKLAMA!

SHKARKO APP

App Store
Google Play

Inceneratorët nuk mbyllen me Arben Ahmetajn

11 Korrik 2023, 12:33, Aktualitet CNA

Inceneratorët nuk mbyllen me Arben Ahmetajn

Pas kërkesës së SPAK-ut për Kuvendin për arrestimin e ish-zv.kryeministrit Arben Ahmetaj dhe akuzave të ngritura ndaj tij, mediat, kryesisht ato të propagandës së qeverisë dhe shumica të paguara nga kompania e inceneratorit të Tiranës, kanë filluar sulmin e tyre mediatik. A thua se afera e inceneratorëve u mbyll me arrestimin e Arben Ahmetajt?

Çfarë po ndodh? Thjesht dhe vetëm po krijojnë alibi në opinionin publik se çështja e inceneratorëve mori fund, tashmë iu vu kapaku, koka e tyre Arben Ahmetaj është nën akuzë, hyri në burg dhe çështja e inceneratorëve mbaroi, por në fakt nuk është kështu.

Së pari, nuk është kështu se shteti shqiptar, qeveria shqiptare edhe Bashkia Tiranë, i paguajnë nga transferta e tyre të paktën 10 mln dollarë në vit landfillit të Tiranës, ku nuk ka incenerator. Pra, paratë vazhdojnë paguhen, Arben Ahmetaj në akuzë, Mirel Mërtiri në akuzë, Klodian Zoto në akuzë, Stela Gugallja në akuzë, të katërt të ikur, vetëm Lefter Koka dhe Alqi Bllako ndodhen pas hekurave.

Në fakt, po tentohet t’u hidhet hi syve shqiptarëve se çështja e inceneratorëve mbaroi, kaq ishte e gjitha, u kap dhe Arben Ahmetaj e historia mbyllet këtu.

 

Historia e inceneratorëve nuk mbaron me Arben Ahmetajn, ka ende shumë emra të tjerë dhe, përtej kësaj, nuk mbaron se ende po paguhen dhjetëra miliona euro nga taksat e shqiptarëve të varfër nga kompaninë e inceneratorit të Tiranës dhe ende nuk janë kthyer këto para te taksapaguesit shqiptarë që janë të vjedhurit në këtë rast.

SPAK-u dhe gjykata pretendojnë se janë zbardhur korrupsioni dhe vjedhjet, por këto para të vjedhura duhet t’u kthehen shqiptarëve. Nuk mund të paguhen miliona e miliona euro dhe çështja e inceneratorëve të quhet e mbyllur, vetëm sepse ra në akuzë Arben Ahmetaj.

Jo, as sepse është ende në akuzë Mirel Mërtiri, “truri” i tyre, i cili strehohet në Vjenë së bashku me bashkëjetuesen, Stela Gugallja, dhe jeton me miliona dollarët që përfiton nga afera e inceneratorëve në Tiranë, apo deri në Zimbabve.

Nuk mbaron afera e inceneratorëve, nuk mbyllet se ka një akuzë ndaj Arben Ahmetajt, jo aspak. Ajo është e hapur, është një litar që ka ngelur varur edhe për shumë ish-ministra, zyrtarë të tjerë të shtetit shqiptar dhe nuk mund të mbyllet kjo aferë deri ditën që do të ndalohen pagesat abuzive, ku sot është 29 euro për ton, ndërkohë që nuk ka incenerator dhe në Tiranë ka vetëm landfill, që, sipas vetë shkresave zyrtare të bëra nga administratorët shqiptarë të kompanive të sekuestruara të inceneratorëve në Fier dhe Elbasan, landfillimi nuk shkon më shumë se 12 euro për ton.

Inceneratorët nuk mbyllen me Arben Ahmetajn

Pra, një vjedhje thuajse e provuar për 17 euro për ton diferencë. Ndërkohë që inceneratori në Tiranë nuk ekziston, sot e 6 vite nga firmosja e kontratës koncesionare dhe fillimi i punimeve në këtë landfill, ku pretendohet se leja është dhënë në vitin 2019, ndërsa në fakt koncesioni ka filluar që në 2017, gjithashtu dhe punimet kanë filluar menjëherë sapo kanë marrë kontratën koncesionare, këtë e faktojnë mallrat e blera, faturat, TVSH, taksat, e të tjera si këto. Afera e inceneratorëve nuk mund të mbyllet me Arben Ahmetajn. Ata që mendojnë që problemi tashmë u mbyll, se iku Klodi, Stela, Mireli dhe pas tyre shkoi dhe Arbeni, e kanë gabim skenarin e tyre.

Çështja e inceneratorëve mbyllet edhe zyrtari i fundit të mbajë përgjegjësi para ligjit dhe ditën kur të ndalen pagesat abuzive që bëhen për inceneratorin e Tiranës, sepse pagesat që vazhdojnë tregojnë që korrupsioni, pazari dhe afera vazhdojnë. Me mbylljen e pagesave abuzive dhe marrjen e përgjegjësisë nga i pari tek i fundit, atëherë mund të kemi një drejtësi të plotë dhe drejtësinë e kërkuar nga shqiptarët.

 

 





Lajmet e fundit nga