Nga kriza në PD, tek përplasjet Basha-Kryemadhi/ Nishani analizon situatën politike në vend

26 Nëntor 2021, 15:35, Politikë CNA

Ish presidenti Bujar Nishani ka komentuar situatën në PD dhe mbajtjen e Kuvendit Kombëtar në datën 11 dhjetor.

Në një intervistë për CNA.al, Nishani deklaroi se Kuvendi si organi më i lartë në parti do arrijë të shkarkojë Lulzim Bashën nga PD, ndërsa dënoi aktin e këtij të fundit për përjashtimin e Sali Berishës.

Nishani gjithashtu komentoi edhe përplasjet në distancë mes PD dhe LSI, ndërsa shtoi se selia blu është në një krizë dhe kaos politik.

Zoti Nishani, përplasjet në PD sa vijnë dhe bëhen më të forta, edhe për faktin se publikisht është kërkuar mbajtja e dy Kuvendeve: në datë 11 dhjetor nga 4200 delegatë të cilët kanë firmosur dhe në datën 18 dhjetor nga Lulzim Basha. A mendoni se do të mbahet Kuvendi i fundit?

Unë nuk e di se çfarë do të bëjë z. Basha më datë 18 dhjetor por besoj shumë se ai nuk do të jetë më Kryetar i Partisë Demokratike të Shqipërisë pas datës 11 dhjetor e për pasojë as nuk mund të mbledhë, as nuk mund të përfaqësojë e as nuk mund të flasë në emër të PDSH dhe antarësisë së kësaj partie pas kësaj date. Z. Basha dhe të gjithë ata që Kuvendi Kombëtar i shkarkon nga funksionet e tyre do të vijojnë të jenë anëtarë të PD dhe shpresoj që të angazhohen në kontribute reale për PD dhe demokratët.

Kuvendi i jashtëzakonshëm Kombëtar i PDSH që mblidhet më 11 dhjetor 2021, do të jetë nisja e një procesi historik për Partinë Demokratike, do të jetë nisja e rrugëtimi të jashtëzakonshëm drejt pushtetit të Partisë Demokratike dhe demokratëve shqiptarë.

-Zoti Basha ka nisur ?një luftë? me demokratët, ku shkarkon dhe përjashton nga PD këdo që i del kundër. A keni një koment për këtë veprim?

Veprimet kaotike, të çoroditura dhe qesharake nuk mund të meritojnë as kohë e as vëmendje për t?i kushtuar në kontekstin e debatit publik apo të asaj që është çështja madhore sot e Partisë Demokratike, reformimi dhe ringritja e saj.

Por unë besoj se Kuvendi Kombëtar i demokratëve, që është institucioni më i lartë dhe më i pushtetshëm se kryetari e se Kryesia, do të marrë në shqyrtim edhe këto sjellje, vendime e qëndrime të tyre.

-Zoti Basha dhe zoti Bardhi gjithashtu kanë kërkuar edhe përjashtimin e ish kryeministrit dhe liderit të demokratëve Sali Berisha…

Një nga shqetësimet e mëdha të arsyetimit që ka detyruar demokratët për mbledhjen e Kuvendit Kombëtar është pikërisht tradhëtia dhe shitja e interesave politike që udhëheqsia aktuale e Partisë Demokratike ju ka bërë demokratëve dhe PD. Akti skandaloz ndaj Z. Berisha është vijimësia e disa sjelljeve dhe akteve që në bindjen dhe analizën time të thellë janë marrë në PDSH nën diktatin e Edi Ramës. Kam bindje të thellë se edhe lista e deputetëve të PD është hartuar nën ndikimin e Edi Ramës mbi të. Jo e tëra kuptohet, por në bindjen time Edi Rama i ka imponuar Lulzim Bashës përfshirjen e 3-4 emrave në atë listë dhe mos përfshirjen e 3-4 emrave të tjerë. Kjo për mua është bërë cdo ditë e më e qartë. Natyrisht qëndrimi ndaj z. Berisha ka qenë më kryesori në këtë relacion Rama-Basha.

-Kuvendi i 11 dhjetorit do të pasojë me shkarkim të Lulzim Bashës nga drejtimi i PD?

Nuk dua të paragjykoj asnjë qëndrim, propozim apo vendim të delegatëve të Kuvendit Kombëtar. Por nëse ky vendim vjen si konkluzion i analizës së delegatëve se PD ka dështuar në mënyrë të përsëritur për të fituar zgjedhjet, nësë PD ka humbur besimin themelor tek opinioni publik, nëse në PD institucionet dhe rregullat statutore injorohen dhe shkelen vijimësisht, nëse në udhëheqsinë e PD anëtarsia e saj konsiderohet si llumi i këtij vendi, nëse drejtuesit e PD e konsiderojnë qeverisjen e PDSH kriminale dhe të njëjtë me atë të Edi Ramës atëhere jam i bindur se ky Kuvend nuk mund të pranojë të lejojë këtë situate në krye të Partisë Demokratike.

-A keni një koment për përplasjet PD-LSI?

Partia Demokratike (qëndrimi zyrtar i saj) është jo vetëm në një krizë të thellë por dhe kaos politik.

Pa dyshim që PDSH dhe LSI, janë dy parti të ndryshme. Seicila me interesat dhe synimet e veta politike.

Janë dy parti që kanë qeverisur bashkë në të shkuarën por kanë edhe dallime mes njëra tjetrës.

Por sot PD nuk e ka luksin të sulmojë e hap luftë politike ndaj asnjë aktori apo faktori tjetër opozitar ndaj rregjimit. Energjitë politike të PD sot duhet të jenë të adresuara dhe fokusuara tek rregjimi i Edi Ramës, por duket se Lulzim Basha e ka pak ?xhan? Edin e nuk mund t?i bëjë opozitarizëm total.

Nga ana tjetër qëndrimi i L. Bashës sot është qëndrimi më amoral politik.

Pse e them këtë ?

Sepse L. Basha është njeriu që e ka kërkuar më fortë se kushdo tjetër dhe ka përfituar politikish më shumë se kushdo tjetër nga bashkëpunimi me LSI.

Në 2011, L. Basha në garën për Bashkinë e Tiranës kërkonte me cdo kusht që S. Berisha të garantonte mbështetjen e LSI për Bashën në këtë garë. Vetë rezultati që e bëri L. Bashën kryetar të Bashkisë Tiranë kishte edhe votën e elektoratit të LSI.

Në 2019, L. Basha thirri LSI dhe partitë e tjera opozitare duke kërkuar nënshkrimin e marrveshjeve me PD për të mos hyrë në zgjedhjet lokale, të gjitha këto parti ju përgjigjen kërkesës së L. Bashës.

Në 2021, para zgjedhjeve parlamentare, përsëri L. Basha kërkoi dhe nënshkroi marrveshje bashkëqeverisje me LSI dhe partitë e tjera opozitare.

Pra amoraliteti politik i L. Bashës jo vetëm është evident por është bërë legjendë në këtë vend./CNA.al