U porosit nga Napoleoni, në të janë kryer dy atentate/ Çfarë nuk dini mbi Harkun e Triumfit në Paris

30 Korrik 2020, 07:04, Blog CNA

Më 29 korrik 1836, 30 vjet pasi ishte porositur nga Napoleon Bonaparti, Parisi festoi përurimin e ?Arc de Triomphe?, Harkut të Triumfit. Kush ka pasur fatin të vizitojë Parisin

me siguri që e ka kundruar nga afër. Megjithatë shumë tjerë e kanë parë vetëm nga televizioni apo përmes fotove në internet. Ja cilat janë disa nga faktet më interesante, mbi një nga monumentet më të famshme jo vetëm të Francës, por edhe botës.

Para ndërtimit të këtij monumenti, aty u projektua një godinë në formë elefanti

Para Napoleonit, arkitekti francez Sharl Ribar propozoi ndërtimin e një godine me tre nivele në formë elefanti, në të cilën do të hyhej përmes një shkalle në formë spiraleje. Furnizimet do të bëheshin përmes mureve, dhe do të kishte një sistem të brendshëm, kullimi. Ribar ishte i vendosur të niste ndërtimin, por në fund qeveria franceze ia hodhi poshtë projektin.

Harku u porosit nga Napoleoni në vitin 1806, pak kohë pas fitores që korri në Austerlic

Ndërtimi i monumentit kërkoi plot 30 vjet. Dhe jo pa arsye:ai është i kuruar në çdo detaj. Skulpturat në formë relievi në bazën e secilës prej katër shtyllave tregojnë 4 fitore dhe skena lufte. Në kulmin e harkut, gjenden të shkruara emrat e fitoreve kryesore gjatë periudhës Revolucionare dhe Napoleonike. Fitoret më pak të rëndësishme, gjenden në muret e brendshme, plus emrat e 558 gjeneralëve. Emrat e nënvizuar, i përkasin gjeneralëve të vrarë në betejë.

Napoleoni nuk mundi të shihte përfundimin e tij

Harku i Triumfit përfundoi vetëm në vitin 1836, 15 vjet pas vdekjes së Napoleonit. Ndaj perandori nuk pati rastin ta shohë të përfunduar. Kur u martua me gruan e dytë Maria Luizën nga Austria, për të u ndërtua një kopje në miniaturë prej druri e Harkut, në mënyrë që të dy të mund të kalonin përmes tij, kur hynë në Paris si një çift i martuar.

Kur Napoleoni abdikoi nga froni në vitin 1814, ndërtimi i Harkut u pezullua për disa vjet, për të rifilluar vetëm në vitin 1826. Napoleoni kaloi përmes Harkut të kompletuar në vitin 1840, kur trupi i tij u vendos të prehej në banesën e fundit.

Është i dyti më i madh i këtij lloji në botë

Me një lartësi 51.2 metra dhe gjerësi 45.1 metra, ai ishte harku triumfal më i madh i këtij lloji deri në vitin 1982, kur Koreja e Veriut inauguroi Harkun e saj të Triumfit, 60 metra të lartë.

Përmes tij ka fluturuar një avion ushtarak

Disa javë pas përfundimit të Luftës së Dytë Botërore, Sharl Godfrua fluturoi me avionin e tij luftarak ?Nieuport? përmes Harkut, në nderim të gjithë aviatorëve të vrarë në luftë.

Poshtë monumentit prehen eshtrat e një ushtari të panjohur

Siç shumë vende, edhe Franca ka një Varr të Ushtarit të Panjohur, dhe ai ndodhjet pikërisht nën Harkun e Triumfit. Ushtari i Panjohur është varrosur atje më10 nëntor 1920, dhe në varrin e tij shkruhet:?Këtu prehet një ushtar francez, që vdiq për atdheun e tij 1914-1918?.

Në atë kohë, aty u ndez një pishtar të përjetshëm, në nderim të gjithë të rënëve gjatë luftës. Xhon dhe Xheki Kenedi e vizituan varrin në vitin 1961, dhe kjo e frymëzoi Xhekin të kërkonte vendosjen e një pishtari të ngjashëm në varrin e bashkëshortit të saj, kur ai u vra në vitin 1963.

Aty kanë ndodhur 2 atentate

Ish-presidenti francez Sharl De Gol, i shpëtoi një atentati pikërisht pranë Harkut të Triumfit. Ndërkohë në vitin 2002, një e shtënë e vetme për pak sa nuk vrau presidentin e kohës Zhak Shirak në të njëjtin vend. Ai po inspektonte trupat në një xhip të hapur në Ditën e Bastijës më 14 korrik, kur një njeri i armatosur nxori nga çanta një pushkë gjuetie dhe qëlloi në drejtim të tij, para se policia të neutralizonte.

Nuk ka qenë gjithnjë simbol i fitoreve

Edhe pse Harku ka për qëllim të festojë fitoret e Francës, ai ka parë edhe disa humbje të tmerrshme:Gjermanët marshuan nën të në vitin 1871 gjatë Luftës Franko-Prusiane, dhe nazistët bënë të njëjtën gjë gjatë pushtimit gjerman të Parisit në Luftën e Dytë Botërore.

Pastrimi i tij nuk është diçka e lehtë

Pastrimi në shkallë të plotë i këtij monumenti, nuk është një detyrë e lehtë. Harku është pastruar për herë të fundit në shkallë të plotë në vitin 2011, i pari në gati 50 vjet./ mentalfloss.com–Përshtatur nga CNA.al