E fundit!

19:25 Aktualitet

"Protestojmë për të drejtat tona"/ Qytetarët mblidhen në sheshin “Skënderbej” për tubimin e 39

Ka nisur protesta e 39 kundër qeverisë. Qytetarët janë mbl...

Vendim i papritur/ Hiqet pezullimi ndaj ekipeve ruse

8 Korrik 2026, 11:17, Sport CNA

Komiteti Olimpik Ndërkombëtar ka ndërmarrë një hap të rëndësishëm për sportin rus, duke vendosur të heqë përkohësisht pezullimin ndaj Komitetit Olimpik Rus, masë që ishte në fuqi që prej 12 tetorit 2023. Vendimi është marrë nga Komiteti Ekzekutiv pas një analize të zhvilluar nga Komisioni i Çështjeve Ligjore.

Sipas vlerësimit të bërë, Komiteti Olimpik Rus nuk ka më në përbërjen e tij organizata sportive rajonale që veprojnë në territore të cilat konsiderohen pjesë e juridiksionit të Komitetit Olimpik Kombëtar të Ukrainës. Gjithashtu, autoritetet sportive ruse kanë garantuar se nuk zhvillojnë dhe nuk planifikojnë të zhvillojnë aktivitete sportive në këto territore në të ardhmen. Ky element është konsideruar një faktor i rëndësishëm për rishikimin e statusit të pezullimit.

Megjithatë, Komiteti Olimpik ka sqaruar se vendimi nuk përbën mbylljen e çështjes. Organizata ka bërë të ditur se do të vazhdojë të monitorojë me kujdes situatën dhe aktivitetet e Komitetit Olimpik Rus. Në rast se evidentohen zhvillime që bien ndesh me kushtet e vendosura, Komiteti Olimpik rezervon të drejtën për të marrë masa të tjera disiplinore. Ky vendim vjen në një moment të rëndësishëm për sportin ndërkombëtar, pasi ka nisur periudha kualifikuese për Lojërat Olimpike të Los Anxhelosit në vitin 2028 dhe për Lojërat Olimpike Rinore Dimërore 2028.

Sipas Komitetit Olimpik, nevoja për t’u ofruar sportistëve akses të barabartë në proceset kualifikuese ka qenë një nga arsyet kryesore që ka çuar në këtë vendim. Për këtë arsye, organizata ka vendosur që kushtet e rekomanduara në shkurt të vitit 2022 dhe mars të vitit 2023 për pjesëmarrjen e sportistëve dhe ekipeve ruse në garat ndërkombëtare nuk do të jenë më të zbatueshme në të njëjtën formë.

Megjithatë, rikthimi nuk do të jetë i plotë. Atletët rusë nuk do të rifitojnë menjëherë të drejtën për të përdorur flamurin kombëtar dhe himnin e Federatës Ruse në kompeticionet olimpike. Gjithashtu, procesi i rikthimit do të shoqërohet me kushte të veçanta dhe kontrolle të vazhdueshme.

Një pjesë e rëndësishme e këtyre kushteve lidhet me çështjen e antidopingut. Komiteti Olimpik ka theksuar se çdo sportist rus që do të marrë pjesë në gara ndërkombëtare duhet të përmbushë të gjitha kërkesat antidoping të përcaktuara.

Organizata ka nënvizuar gjithashtu se sportistët rusë që do të përzgjidhen për Lojërat Olimpike duhet të vlerësohen jo vetëm për rezultatet sportive, por edhe për aftësinë e tyre për të përfaqësuar vlerat e Kartës Olimpike dhe promovimin e një shoqërie paqësore përmes sportit.

Në rast se Agjencia Ruse Antidoping, Rusada, do të konsiderohet e papajtueshme me standardet e UADA-s gjatë vitit 2028, përpara Lojërave Olimpike të Los Anxhelosit, Komiteti Olimpik ka bërë të ditur se do të ngarkojë Agjencinë Ndërkombëtare Antidoping për të kryer testime të pavarura ndaj sportistëve rusë që do të kualifikohen.