Trump shpall fundin e armëpushimit/ I quan liderët iranianë "llum"

8 Korrik 2026, 14:47, Kosova & Bota CNA

Trump shpall fundin e armëpushimit/ I quan liderët iranianë

Presidenti amerikan, Donald Trump, ka deklaruar zyrtarisht se armëpushimi midis Shteteve të Bashkuara dhe Iranit ka përfunduar, duke përshkallëzuar ndjeshëm tensionet pas shkëmbimit të sulmeve ushtarake gjatë natës së kaluar.

Në një prononcim për mediat nga Samiti i NATO-s në Ankara, Trump ka mbajtur një qëndrim tejet të ashpër ndaj Teheranit, duke u shprehur se nuk dëshiron të negociojë më me një regjim që e cilësoi si "të sëmurë" dhe "të dhunshëm".

"Për sa më përket mua, armëpushimi ka marrë fund. Nuk dua të kem më të bëj me ta, ata janë llum. Janë njerëz të sëmurë dhe të drejtuar nga njerëz të sëmurë," tha Trump, duke shtuar se bisedimet e diplomatëve janë "humbje kohe". Ai e krahasoi regjimin iranian me një "kancer", duke theksuar nevojën për "ta hequr atë sa më herët".

Përplasja e fundit erdhi pas një operacioni të gjerë të Komandës Qendrore të SHBA-së (CENTCOM), e cila goditi mbi 80 objektiva iranianë, përfshirë dhjetëra varka të Gardës Revolucionare Islamike, si përgjigje ndaj sulmeve mbi tri cisterna nafte në Ngushticën e Hormuzit. Në shenjë kundërpërgjigjeje, Irani njoftoi se ka shënjestruar baza ushtarake amerikane në Bahrejn dhe Kuvajt.

Sekretari i Përgjithshëm i NATO-s, Mark Rutte, i cili ndodhej krah Trump-it në Ankara, e mbështeti vendimin e SHBA-së, duke e cilësuar atë "absolutisht të nevojshëm" dhe duke e akuzuar Iranin për shkelje të armëpushimit.

Nga ana tjetër, ministri i Jashtëm i Iranit, Abbas Araghchi, e akuzoi Uashingtonin për "shkelje flagrante" të memorandumit të mirëkuptimit të nënshkruar vetëm muajin e kaluar. Ai paralajmëroi se pjesë fondamentale të marrëveshjes për ndalimin e konfliktit janë bërë të paefektshme dhe kërcënoi se Irani nuk do të hezitojë të mbrojë sovranitetin e tij, duke paralajmëruar se do të godasë çdo vend që lejon përdorimin e bazave të tij për sulme ndaj Iranit.

Kjo krizë e re vjen në një moment delikat për Aleancën e NATO-s, pasi Presidenti Trump shfrytëzoi rastin për të përsëritur kritikat ndaj aleatëve, duke u ankuar se SHBA-ja po paguan barrën kryesore financiare për sigurinë globale, ndërsa të tjerët, sipas tij, nuk po ofrojnë mbështetjen e duhur përballë kërcënimit iranian./ CNA