Ndahen çmimet/ Përfundon Festivali Ndërkombëtar i Monodramës

28 Qershor 2024, 15:33, Qyteti im CNA

Festivali Ndërkombëtar i Monodramës ka përfunduar mbrëmjen e djeshme në qytetin e Maliqit. Një festival që natën kulminante e ka pasur pikërisht dje, në skenën e improvizuar aq bukur në ambientet e Pallatit të Kulturës "Dhimitër Orgocka".

Me shfaqjen "Medea" të Euripidit, me regjisor dhe aktoren të ardhur nga Kazakistani, publiku përjetoi emocione të forta për shkak të tematikës së dhimbshme e tragjike që përmban kjo vepër. Performanca aq e bukur dhe e ndjerë e aktores, u mirëprit mes duartrokitjesh dhe urimesh kundrejt saj, nga publiku, i cili kishte rrethuar të gjithë skenën duke ndjekur shfaqjen me atë skenografi të veçantë.

Për drejtorin e sektorit të kulturës në Bashkinë e Maliqit, njëkohësisht organizator dhe prezantues i festivalit, ky edicion u përfundua me shumë sukses. Një arritje kjo për herë të 20-të radhazi, që ka sjellë trupa aktorësh nga vende të ndryshme të botës, me mesazhe dhe emocione të papërshkrueshme për artdashësit. Për Festim Tomorrin, qëllimi i festivalit u arrit. Çdo gjë shkoi mjaft mirë, u pëlqye shumë nga pjesëmarrësit.

Ndahen çmimet/ Përfundon Festivali Ndërkombëtar i

"U përmbyll me sukses. Kjo është më e rëndësishmja, u përmbyll në Maliq, në këtë ambient që ju e shikoni, të cilin jemi munduar ta sajojmë. E sajuam bukur sepse ndriçimi këtu i dha bukuri, e bëri më të bukur se ç'është. Të gjitha netët e festivalit kanë kaluar shumë mirë, kanë ardhur tematika të ndryshme. Ka pasur aktorë të ndryshëm që kanë sjellë karaktere të ndryshme, emocion për publikun. Në fund e mbyllëm me ‘Medea’-n e Euripidit, një shfaqje që vjen nga lashtësia, shumë e bukur me dhimbjen e madhe të një nëne. Por, qëllimi u arrit, kjo është më e rëndësishmja."

E vështirë ka qenë vendimmarrja për çmimet nga ana e jurisë, të përbërë nga dy zonja të nderuara, nga Maqedonia dhe Bjellorusia, si edhe nga pedagogu i njohur i Universitetit të Korçës, profesor Ilir Shyta. Profesori tregon 4 çmimet më të rëndësishme të dhëna në këtë Festival të Monodramës, duke filluar nga çmimi i parë për shfaqjen më të mirë, e më pas me çmimet për regjisorin, aktorin dhe aktoren më të mirë. Për jurinë ka qenë e vështirë përzgjedhja e këtyre çmimeve pasi të gjitha trupat kanë qenë fantastike në performancën e tyre dhe në mesazhin që kanë përcjellë për publikun. Shfaqja më e mirë iu akordua Medeas me trupën e Greqisë, interpretuar nga aktorja shqiptare Marsela Lena.

Ndahen çmimet/ Përfundon Festivali Ndërkombëtar i

"Ka pasur katër çmime, i pari për shfaqjen më të mirë, për regjinë më të mirë dhe për dy aktorët më të mirë femër dhe mashkull. Shfaqjet më të spikatura të këtij edicioni, edhe pse kanë ardhur në gjuhën e kombeve të tyre, kanë arritur të përcjellin mesazhin. Atë mesash që sigurisht kombet, njerëzit, populli, ta duartrokasin këtë art. Ky festival ia arriti dhe duhet investuar edhe më tepër që të ketë vazhdimësi. Ka arritur në edicionin e 20-të, por shpresoj të ketë edhe më shumë vite të tjera jetëgjatësi. Shfaqja më e mirë ka qenë "Medea" e Greqisë, e interpretuar nga një aktore shqiptare, Marsela Lena. Aktori më i mirë ka qenë aktori bullgar, ka pasur një monodramë simpatike. Regjisori më i mirë u vlerësua ai i Kazakistanit që solli sot një version tjetër të “Medea”-s. Ishte shumë e vështirë sepse ka pasur trupa nga Italia, Spanja, Praga, të cilat meritonin çmime, por zona e nxehtë e çmimeve ishte shumë pak. Ndonjëherë është më e rëndësishme pjesëmarrja në festivale dhe shfaqjet që përcillen me mesazhet e tyre."

Ndahen çmimet/ Përfundon Festivali Ndërkombëtar i

Festivali Ndërkombëtar i Monodramës është kthyer tashmë në traditë për qytetin e Maliqit. Në këtë edicion, organizimi ishte fantastik, ndonëse 6 ditë radhazi shfaqjet u dhanë në ambientet e poshtme të Katedrales së qytetit të Korçës, e më pas nata kulminante u mbyll në Pallatin e Kulturës në Maliq. 7 net me shumë emocione, me shfaqje të përzgjedhura nga regjisorët e huaj, me aktorët që kanë performuar aq bukur e plot me emocion, duke dhënë mesazhe të ndryshme sa i përket jetës, dhimbjes e dashurisë./ CNA