Pogradeci i pashoq, çel sezonin turistik

16 Qershor 2024, 20:00, Qyteti im CNA

Pogradeci edhe këtë sezon turistik mbetet destinacion i kërkuar nga turistët vendas e të huaj për bukuritë që ofron, së bashku me fshatrat turistikë të Linit e Tushemishtit, si dhe trashëgiminë e kulturës në zonën e Mokrës.

Operatorët turistike janë bërë gati pasi rezervimet e turistëve të huaj kanë filluar që në muajin Maj dhe do të vazhdojnë deri në muajin Tetor. Sipas tyre, gatimet tradicionale të peshkut janë më të kërkuara nga vizitorët e huaj.

Pogradeci i pashoq, çel sezonin turistik

Drejtoresha e të ardhurave pranë bashkisë së Pogradecit, Enjela Karafili ka bërë me dije se këtë vit ndryshe nga viti i kaluar hapësira e plazheve publike do të jetë 40%, me çadra falas dhe hapësira edhe për personat me aftësi të kufizuara.

Në ditën e çeljes të sezonit turistik krahas turistëve vendas nuk kanë munguar edhe turistët e huaj, të cilët shprehen se mikpritja e banorëve por dhe gatimet të bëjnë të duash qytetin e Pogradecit.

Pogradeci i pashoq, çel sezonin turistik

"Jam nga Izeaeli, jetoj ne Itali, i dua njerëzit këtu, janë kaq mikpritës, natyra është kaq e bukur, kam dy javë këtu në Pogradec e do vazhdoj të rri e për dy javë të tjera. Padyshim që i kam sugjeruar edhe të tjerëve të vijnë, familjes, të dashurës, ushqimi është kaq i shijshëm. Unë shkoj nëpër restorante dhe bëhem shok me pronarët, çmimi është i lirë, në vendet e tjera të duket sikur te vjedhin, këtu është kaq ndryshe", u shpreh turisti.

Kryetari i Bashkisë Pogradec, Ilir Xhakolli tha se ka rezervime të shumta me turistë vendas e të huaj. Sipas tij, 18 mijë turistë gjermanë kanë rezervuar në qytetin liqenor.

Pogradeci i pashoq, çel sezonin turistik

Kryetari i Bashkisë Pogradec, Ilir Xhakolli. Burimi CNA

“Risi këtë vit ka qenë që ka prezencë të turistëve të huaj. Siç e keni ndjekur edhe në lajme, këtu ka nga një agjensi turistike me turistë gjermanë kanë lidhur marrëveshje me 2-3 subjekte që merren me turizmin dhe kemi një kontratë që deri në 18 mijë gjermanë do të vijnë në Pogradec dhe këto kanë nisur që në maj, do vijojnë deri në tetor.

Pogradeci, të shtunën ka çelur sezonin turistik, ku operatorët kanë ekspozuar gatimet e tyre tradicionale ndërkohë që ka patur e aktivitete të shumta ujore e artistike./ CNA

Pogradeci i pashoq, çel sezonin turistik