Pogradeci “thith” mbi 18 mijë vizitorë/ “Bumi” turistik, Lini si atraksion kryesor

1 Qershor 2024, 19:01, Qyteti im CNA

Vitet e fundit, qyteti liqenor i Pogradecit ka pësuar një hov sa i përket turizmit. Qyteti me natyrën e bukur, ajrin e pastër, liqenin dhe atraksione të shumta turistike e kulturore, ka arritur që të afrojë një numër të lartë vizitorësh. Krahas vizitorëve të vendit tonë, edhe turistët e huaj kanë qenë në rritje përgjatë viteve të fundit, e ajo çka i bën të vizitojnë Pogradecin është edhe fshati turistik i Linit. Ky fshat mbetet ndër më të kërkuarit nga turistët të cilët e zgjedhin për të parë nga afër Bazilikën që ndodhet në këtë fshat. Dy turistë të huaj, nga Gjermania e Zelanda e Re, kanë treguar përshtypjet e tyre për Shqipërinë, e më konkretisht për atë çka gjetën në Pogradec.

“Ka qenë një udhëtim i gjatë dhe ne kemi shkuar në shumë qytete dhe jam shumë e impresionuar nga ky vend. Veçanërisht këtu në Ohër, është shumë bukur. Gjithashtu vlerësoj shumë Gjirokastrën, Beratin. Saranda ishte e bukur, por hotelet kushtonin shumë. Jam më e interesuar për historinë. Tani kemi ardhur këtu, mozaiku është shumë i bukur.

Unë jetoj në Zelandën e re dhe kam ardhur këtu prej dy javësh. Kemi qenë në Gjirokastër. Tani kemi mbërritur këtu te liqeni, është bukur. Është një vend me shumë njerëz, lokale, ka një shëtitore shumë të bukur. Ne kemi shëtitur përreth liqenit për dy ditë me biçikleta. Tani duam të shkojmë në Strugë. Këtu na ka pëlqyer shumë ushqimi vendas”.

Për drejtorin e sektorit të turizmit në bashkinë e Pogradecit, Ledjan Zeqollari, në 5 muajt e fundit, ky qytet është përballur me një numër të konsiderueshëm vizitorësh që arrin deri në 18 mijë. Sipas tij, promovimi që i është bërë Bazilikës së Linit ka ndikuar së tepërmi në afrimin e turistëve, të cilët kryesisht vijnë nga Europa por ka edhe nga Amerika e largët.

"Për sa i përket vizitorëve që vijnë në Pogradec, duhet të themi që tashmë ka filluar që nga Janari deri në Dhjetor të kemi vizitorë gjatë gjithë vitit. Kryesisht janë vizitorë që vijnë nga Europa por kemi dhe nga Amerika e largët dhe Zelanda e Re.

Atraksionet kryesore që vizitohen në Pogradec mund të them që është Bazilika e Linit, e cila ka numrin më të madh të vizitorëve. Promovimi që ne i kemi bërë Bazilikës së Linit por edhe zbulimit të palafiteve, ka bërë që të ketë një numër shumë të lartë të vizitorëve. Kjo ka bërë që të rriten edhe netë qëndrimet, qëndrimi i turistëve është më i madh.

Shifrat janë mjaft optimale, mund të themi që vetëm në 4 mujorin e parë të këtij viti kemi rreth 18 mijë vizitorë të cilët janë akomoduar në njësitë akomoduese në Pogradec. Paketat kanë rritur edhe netë qëndrimet, të cilat variojnë nga 1 ditore, 2 ditore deri në 5 ditore, jo vetëm për atraksionet por për të gjithë rajonin."

Paketat e ndryshme turistike që ofron Pogradeci e bën më të thjeshtë vizitën e të huajve në këtë qytet. Këto paketa, krahas akomodimit dhe guidës, në përfundim të tyre ofrojnë për turistët natën folklorike, me valltarë të cilët performojnë valle nga trevat e Shqipërisë./ CNA