Gara ndërkombëtare e çiklistëve/ Nga Tirana në Korçë, me biçikletë

21 Maj 2024, 22:01, Qyteti im CNA

Ka startuar ditën e djeshme Gara Ndërkombëtare e Çiklistëve në vendin tonë, me pjesëmarrje të rreth 100 çiklistëve nga shtete të ndryshme të Europës. Pjesë e garës kanë qenë edhe çiklistë shqiptarë që kanë përfaqësuar Kombëtaren Shqiptare. Më tepër se 170 km kanë përshkuar këta sportistë në këtë etapë të parë të garës, me start në sheshin Skënderbej në Tiranë, e me finish në Korçë, në afërsi të Bankës Kombëtare.

Gara ndërkombëtare e çiklistëve/ Nga Tirana në

Një garë e lodhshme, me vështirësi për shkak të terrenit fushor e malor i ndërthurrur së bashku, por me shumë kënaqësi për sportistët pasi patën mundësinë të shihnin bukuritë natyrore të vendit tonë.

Grupi ka garuar së bashku deri në ngjitje të Qafë Thanës, ndërsa është pikërisht kjo vendndodhje ku sportisti austriak ka lënë pas grupin duke garuar i vetëm deri në fshatin Pirg të Maliqit. 3 serbë u përfshinë brenda grupit, ku njëri prej tyre garon për Bullgarinë.

Gara ndërkombëtare e çiklistëve/ Nga Tirana në

Serbi Dordje Duriç është fitues i etapës së parë të rrethit çiklistik me 4 orë, 3 minuta e 15 sekonda duke lënë në vend të dytë bashkëkombasin Marko Stankoviç dhe në vend të tretë austriakun Lenard SternsDorff.

Finishin i pari e ka kaluar Duriç, i cili pas garës tha se e njihte mirë terrenin pasi kishte garuar më parë në këto rrugë.

Gara ndërkombëtare e çiklistëve/ Nga Tirana në

"Ishte etapë e vështirë, rrugët ishin të vështira, kishte shumë ngjitje por ja dola. Ishte e vështirë në momentet e fundit sepse fuqia duhet të ishte në maksimum por pata mbështetjen e grupit tim ndaj edhe sot fitova", u shpreh ai.

Nga ana tjetër Stankoviç i vendit të dytë, pas garës ka bërë të ditur se nuk ka patur mbështetjen e çiklistëve të tjerë e për këtë e kishte të pamundur për të kaluar i pari finishin.

Gara ndërkombëtare e çiklistëve/ Nga Tirana në

"Pas 30 km ecje u përpoqa të sulmoj çiklistin e parë por nuk pata shumë mundësi sepse ai pati mbështetjen e grupit të vet. Në ngjitjen e fundit më kapi dhe ekipi mbrapa e kjo bëri që lodhja të ishte e madhe. Gara ishte e vështirë por duhet të jem i sinqertë që çiklisti serb e meritoi sot", deklaroi Stankoviç.

Pjesë e rrethit çiklistik janë çiklistët e ekipeve përfaqësuese të Serbisë, Greqisë, Austrisë, Bullgarisë, Holandës, Maqedonisë së Veriut, Kosovës, Malit të Zi dhe Shqipërisë. Etapa e dytë e turit çiklistik të Shqipërisë është Korçë - Elbasan, 120 km./ CNA