7 Marsi, në Korçë/ Çelet ekspozita "Udha e Shkronjave Shqipe"

7 Mars 2024, 14:41, Qyteti im CNA

7 Marsi, në Korçë/ Çelet ekspozita "Udha e

Në kuadër të Ditës së Mësuesit u çel në Muzeun e Arsimit ekspozita "Udha e Shkronjave Shqipe". Një ekspozitë mjaft e veçantë në këtë 7 Mars, ku u shfaqën një koleksion i çmuar abetaresh të rralla.

Në fjalën e saj, drejtoresha e bibliotekës së qytetit, Jorida Tollkuçi, ka treguar rëndësinë e këtij koleksioni të 14 abetareve, duke thënë se u përkasin viteve 1844-1913.

"Sot në këtë ditë të veçantë, ditë të mësuesit, në ambientet e Muzeut të Arsimit Shqip për të nderuar dhe respektuar veprën e rilindësve, çelëm ekspozitën ‘Udha e Shkronjave Shqipe’ me koleksionin e çmuar të abetareve të rralla që janë pjesë e fondit të bibliotekës.

Ky vit shënon 180-vjetorin e krijimit të alfabetit të parë të gjuhës shqipe, Evetarit të parë të Naum Veqilharxhit, në vitin 1844. Kjo abetare ka dy kopje unike, njëra prej të cilave është pjesë e fondit të bibliotekës së Korçës dhe tjetra e Bibliotekës Kombëtare.

7 Marsi, në Korçë/ Çelet ekspozita "Udha e

Drejtoresha e Bibliotekës së Korçës, Jorida Tollkuçi

Këtë abetare e ka përdorur Sevasti Qirjazi në Shkollën e Vashave.

Është ekspozuar edhe abetarja e dytë e Veqilharxhit e vitit 1845. Abetarja e Kristoforidhit apo siç quhet Alfabeti i Elbasanit botuar në 1872, me 53 shkronja, me të cilin është shkruar Ungjilli i Elbasanit. Më pas kemi abetaret e Sami Frashërit, 5 abetare të cilat kanë zënë vendin e nderit në botimet e abetareve. Sot ekspozojmë ribotimin e dytë të vitit 1888 dhe të tretin në 1900. Abetaret e Nikolla Lakos, të cilat u botuan në 1909 dhe 1913.

Vepra ‘Mësimet’ e Naim Frashërit në 1894 me proza patriotike dhe morale. Në fillim të shek. XX kemi botime të këndimeve për shkollat fillore dhe gramatika”, u shpreh Tollkuçi.

Me shumë emocione e përjetojnë këtë ditë mësueset e vjetra të Korçës, të cilat shprehin nostalgjinë e tyre për kohën e mësimdhënies duke uruar edhe festën e 7 Marsit.

“Kam punuar 15 vite në arsim në qytet, kam qenë edhe në fshat. Kam një kujtim shumë të bukur nga nxënësit e mi. Kanë shkruar aq bukur ato shkronjat te fjalia: ‘Të duam mësuese dhe nuk të harrojmë kurrë’. Kam punuar 30 vite në arsim”, tha mësuesja Iliana Bicka.

Mësueset Iliana Bicka dhe Florenca Papanikolla

Ndërkohë, mësuesja Florenca Papanikolla deklaroi: “Kam qenë 36 vite në arsim, kam mbaruar shkollën e lartë për Fizikë dhe kam qenë mësuese për shumë vite. Me shumë mall e shumë emocione e përjetojmë ditën e sotme se edhe bashkëshorti ka qenë mësues. Kujtoj që gjithmonë vinim bashkë për 7 Marsin. Uroj që të gjithë nxënësit të kenë shëndet dhe suksese me rezultatet e tyre në jetë.”

Ky vit shënon 180-vjetorin e krijimit të alfabetit të parë të gjuhës shqipe, ndërsa çdo vit në Korçë organizohen aktivitete dhe ekspozita mjaft të bukura./ CNA