LEXO PA REKLAMA!

SHKARKO APP

Kupa e Shqipërisë/ 40 çiklistë marrin pjesë në garën e mbajtur në Korçë

12 Maj 2024, 22:14, Qyteti im CNA

Këtë fundjavë në Korçë është mbajtur gara kombëtare Kupa e Shqipërisë në çiklizëm. Me pjesëmarrje të 40 sportistëve nga të gjitha qytetet e vendit, me dy etapa të zhvilluara dje dhe sot, të cilat kanë përfunduar me rezultate mjaft të mira për dy grupe të çiklistëve, Junior dhe Elite. Në etapën e kësaj të diele kanë arritur të kapin vendin e parë Ankel Limaja për kategorinë Junior dhe Mateo Balaj për kategorinë Elite. Vendet e dyta u siguruan nga Visar Nuhaj për kategorinë Junior dhe Olsian Veliaj për Elite.

Kupa e Shqipërisë/ 40 çiklistë marrin pjesë në

Itinerari i përshkuar nga çiklistët ka qenë rreth 123 km, duke filluar nga "Lëndina e Lotëve" në qytet, e më pas drejt Kapshticës, Goricës së Madhe e finishi sërish në Korçë. Të entuziazmuar e mjaft të kënaqur për arritjet janë shprehur çiklistët e të dyja kategorive, të cilët pas më tepër se 3 orësh kanë siguruar vendet e para, ndonëse terreni ka qenë malor dhe i lodhshëm për ta.

17-vjeçari Ankel Limaja, fitues i vendit të parë në kategorinë Junior, ka treguar se gara ka ecur shumë mirë, ndërsa thotë se ka marrë pjesë në gara të tilla për të provuar veten e për të përmirësuar rezultatet.

Kupa e Shqipërisë/ 40 çiklistë marrin pjesë në

"Gara ka ecur shumë mirë, kemi bërë shumë stërvitje për të arritur këtë garë. Shyqyr zotit fituam dhe morëm vendin e parë. Ia vlejti shumë, falënderoj profesorin tim Joan Sallaku, është profesori më i mirë që kam si edhe profesorin e Klubit Studenti. Nuk është hera e parë, kam marrë shumë herë pjesë dhe kam marrë si rezultat përherë vendin e parë. Këto aktivitete janë shumë të rëndësishme sepse ne bëjmë shumë stërvitje për të arritur vendin e parë."

Kupa e Shqipërisë/ 40 çiklistë marrin pjesë në

Visar Nuhaj është çiklisti 17-vjeçar nga Kosova, pjesë e garës për kategorinë Junior, i cili ka arritur të kapë vendin e dytë në itinerarin e përshkuar.

"Është hera e dytë që marr pjesë, kapa vendin e dytë në garë. Eksperiencë e mirë, e bukur, e fortë. Vij nga Kosova. Për ne janë shumë të vlefshme, për ushtrime, për përvojë. Më vjen keq pak që s'dola i pari, por edhe i dyti është shumë mirë. Diferencë se si, 1 minutë ose 2 ndoshta."

Kupa e Shqipërisë/ 40 çiklistë marrin pjesë në

Çiklisti shkodran Mateo Balaj ka arritur të kapë vendin e parë në kategorinë Elite në etapën e dytë të garës. 20-vjeçari tregon se është hera e disatë që merr pjesë në garën për Kupën e Shqipërisë, ndërsa thotë se mbetet një eksperiencë e bukur që ka zgjatur rreth 3 orë dhe pa probleme për çiklistët pjesëmarrës.

"Vij nga Shkodra, është hera e 3 apo e 4 që marr pjesë, kapa vendin e parë. Shumë eksperiencë e mirë, ka zgjatur 3 orë, 3 orë e pak. Gjithçka shkoi mirë, jam shumë i gëzuar. Aktivitete të tilla sa më shpesh të bëhen është më mirë, sepse edhe niveli rritet më shumë."

Vendin e dytë në kategorinë Elite e arriti çiklisti nga Tirana, Olsian Veliaj, i cili ka treguar më tepër për terrenin që kanë përshkuar, duke qenë çiklist sprintier ai e ka pasur pak më të vështirë përshtatjen me terrenin malor. Ndër të tjera, ai ka bërë apel që aktivitete të tilla të bëhen sa më shpesh, pasi çiklizmi sipas tij është lënë në harresë.

Kupa e Shqipërisë/ 40 çiklistë marrin pjesë në

"Gara shkoi shumë mirë, ishte terren malor, por me ndihmën e shokut tim Mateo, i cili është me ekipin e Shkodrës, performuam mirë dhe erdhëm deri në finish bashkë. Sot dola vendi i dytë sepse s’do t’i fitojmë të gjitha garat, do t’i lëmë edhe të tjerët. Për mua ishte pak i lodhshëm sepse unë jam çiklist sprintier dhe terrenet e malit nuk është se i kam qejf për shkak të peshës, por nuk ishte shumë problem sepse po stërvitemi dhe për Turin e Shqipërisë. Ndihem shumë mirë, çdo fitore ka emocionin e vet, është bukur të fitosh. Normalisht aktivitetet duhet të jenë të shumta që dhe rinia të shikojë që ekziston sporti i çiklizmit, sepse është lënë shumë në harresë nga rinia e nëse ka më shumë aktivitete edhe njerëzit do të impenjohen për të ardhur në këtë sport."

Presidenti i Federatës Shqiptare të Çiklizmit, Skënder Anxhaku, krahas falënderimeve ndaj bashkisë dhe klubit shumësportësh në Korçë, është ndalur edhe te gara e radhës për Turin e Shqipërisë që do të bëjë bashkë 15 ekipe të huaja, ndërsa Shqipëria do të përfaqësohet nga ekipi kombëtar dhe ekipi i Tiranës.

Kupa e Shqipërisë/ 40 çiklistë marrin pjesë në

"Të jesh në Korçë është kënaqësi e veçantë. Ka kaluar jashtëzakonisht mirë aktiviteti. Do ta falënderoj në mënyrë të veçantë sepse e kemi edhe partnere Bashkinë e Korçës, Klubin Shumësportësh. Ishte një aktivitet që ne përgatitemi para xhiros së Shqipërisë që fillon në datën 20 dhe mbërritjen e kemi në Korçë me 15 ekipe të huaja. Etapat ishin të dyja të vështira sepse ishte terren malor, por pamë perspektivën e 4-5 sportistëve të ekipit kombëtar që janë në cilësinë e duhur. Me djersë e me mund mendojmë që ta fitojë sërish Shqipëria siç e fitoi edhe vjet. Kanë marrë pjesë rreth 40 sportistë, ka pasur e të tjerë që s’kanë mundur të marrin dot leje nga shkolla e nuk kanë ardhur, por ne mendojmë që kemi dy ekipe që do të marrin pjesë në xhiron e Shqipërisë, ekipin kombëtar dhe ekipin e Tiranës."

Kupa e Shqipërisë në çiklizëm është një aktivitet i përvitshëm, ku Korça zgjidhet nga federata për shkak të terreneve që ofron si qark, e për ta bërë garën më interesante./ CNA TV

Lajmet e fundit nga