Festivali i Kukullave "Xinxifilo"/ Detaje nga organizimi i edicionit të 18-të në Pogradec

7 Qershor 2024, 19:05, Qyteti im CNA

Në Pogradec tashmë është traditë disavjeçare organizimi i Festivalit të Kukullave “Xinxifilo”. Për të 18-tin vit radhazi, ky festival po zhvillohet në qytetin liqenor, si një nga aktivitetet më të preferuara të fëmijëve. Ky festival kukullash ka në qendër pikërisht fëmijët, me një sërë shfaqjesh të cilat në përmbajtjen e tyre kanë vlera edukative. Aktivitete të tilla shihen si një mundësi për të larguar pak orë fëmijët nga teknologjia, e cila dita-ditës kërcënon fëmijërinë e tyre.

Drejtori i Festivalit, Eritan Kamolli, tregon se në këtë edicion do të marrin pjesë 8 trupa, të cilat do të përcjellin mesazhe për edukimin e fëmijëve dhe jetën e përditshme.

“Është festivali i kukullave i pagëzuar me emrin “Xinxifilo”, edicioni i 18-të dhe këtë vit do të marrin pjesë 8 trupa, do të jenë trupat nga qytetet Elbasani, Vlora, Shkodra, Tetova, Korça, Tirana dhe Prishtina. Përveç pjesës argëtuese sigurisht që ka edhe mesazhe për edukimin e tyre dhe jetën e përditshme.”

Festivali i Kukullave "Xinxifilo"/ Detaje nga organizimi i edicionit

Regjisori nga qyteti i Vlorës, Eduard Selimi, shprehet se fëmijët janë larguar nga shfaqjet për shkak të ndikimit të teknologjisë, ndërsa thekson se interesi në Vlorë për të parë shfaqjet ka qenë i madh.

“Prezantohemi me shfaqjen “Princi Bretkë”, e kemi përshtatur dhe modernizuar pak shfaqjen, kemi hequr shumicën e dekorit. Mendoj se fëmijët janë larguar pasi teknologjia ndikon deri diku, por teatri klasik mbetet, ne kemi 1 javë që kemi filluar shfaqjet në Vlorë dhe interesi ka qenë i madh. Ka pasur shumë kërkesa. Pogradeci ka një publik fantastik pasi në çdo shfaqje salla është plot, saqë ulen edhe në shesh pasi nuk ka vende.”

Festivali i Kukullave "Xinxifilo"/ Detaje nga organizimi i edicionit

Pjesë e këtij festivali janë trupa nga gjithë Shqipëria, si Tirana, Shkodra, Korça, Elbasani, Vlora por edhe Prishtina e Tetova. Për trupat pjesëmarrëse është kënaqësi e veçantë të kthehen për herë të disatë në Pogradec, ku secili prej tyre, sjell një mesazh ndryshe për fëmijët.

Merita Smaja nga Shkodra: “Është kënaqësi që jemi në Pogradec për të disatën herë, kënaqësia më e madhe është që ne këtë herë vijmë me një shfaqje jo thjeshtë me kukulla, por edhe me aktorë “Mbretëresha e Borës”. Në Shkodër është pëlqyer shumë dhe shpresojmë që edhe këtu të pritet mirë”.

Hysen Mullajonuzi nga Elbasani: “Elbasani ka qenë një trupë që ka marrë pjesë rregullisht në Xinxifilo duke hequr atë pjesën që pati një shkëputje prej pak kohësh. Jemi permanentë në Pogradec me shumë dëshirë dhe kënaqësi. Ne vijmë me një shfaqje pema dhe mbreti, është mesazhi mbi natyrën dhe ekologjinë si të mirëmbajmë pemët, sistemin, natyrën dhe është një pjesë që veç mesazheve ka dhe argëtimin dhe lojën brenda me fëmijët.”

Festivali i Kukullave "Xinxifilo"/ Detaje nga organizimi i edicionit

Muhamed Hjadari nga Tetova: “Është hera e 5-të që marrim pjesë në Xinxifilo, kemi marrë pjesë rregullisht, por për shkak të ndërprerjes edhe ne nuk erdhëm. Kemi shfaqjen “Shkolla e çuditshme”.

Festivali i cili ka marrë emrin nga personazhi i kukullave të Mitrush Kutelit, do të mbahet për 4 ditë me radhë në qytetin liqenor. Fëmijët do të kenë mundësi të shohin shfaqje të bukura nga trupat pjesëmarrëse, si edhe do marrin mesazhe të veçanta për jetën./ CNA TV