Skaji më verior i Shqipërisë/ Bukuritë e pazbuluara të Vermoshit

23 Qershor 2024, 22:20, Qyteti im CNA

Skaji më verior i Shqipërisë/ Bukuritë e pazbuluara të

Foto e marrë nga Bashkia e Malësisë së Madhe

Vermoshi, një nga pikat më atraktive në Shqipëri për turizmin malor.

Vermoshi, skaji më verior i Republikës së Shqipërisë, është një ndër destinacionet më të preferuar për alpinizëm.

Vermoshi 1060 metra mbi nivelin e detit është si një paradhomë për t’u ngjitur në majat e larta të Alpeve.

Maja e Marlulës është kuota më e lartë e Vermoshit bashkë me Skrobotushën e djeshme të sharrëtarëve.

Natyra shpalos një pamje fantastike plot bimësi e gjelbërim, duke të shkaktuar një ndjesi paqeje.

Foto e marrë nga Bashkia e Malësisë së Madhe

Në të dyja anët e luginës ngrihen shpate malesh me pjerrësi të konsiderueshme dhe të veshura me pyje dhe kullota.

Banesat janë të shpërndara. Ato janë të ndërtuara sipas stilit karakteristik të çative shumë të pjerrëta e të larta të kësaj zone, për shkak të reshjeve të dëborës, të cilat zgjasin afërsisht 100 ditë në vit.

Ardhja e turistëve e futi Vermoshin edhe në programin e 100 fshatrave.

Zona e Vermoshit është e përmendur për cilësinë e lartë të bulmetrave. Ushqimi që shërbehet është ai tradicional i zonës, ku spikatin djathi, mishi derrit, qengjit, patate, kaçamak, ferlik, mish lepuri të egër, patate, kaçamak, turshi, fasule dhe për ëmbëlsirë përdoren kryesisht revania dhe petullat me mjaltë.

Foto e marrë nga Bashkia e Malësisë së Madhe

Në Vermosh shquhen më së shumti kullotat në stanet e Seferçes, ndërsa ka shumë vende të bukura si Lugu pa dalje i Dolit, lugu “i varur” i Skropatushës, dhe Cirku i Smutirogës.

Burimet, kryesisht njihen me emra fisesh. Por më i veçantë në këtë zonë është Kanioni i Gerçarës që ndodhet në dalje të luginës së Vermoshit. Kanioni ka një gjatësi prej 1 km dhe lartësi deri në 40 m dhe mund të vizitohet nëpërmjet shtigjesh të shënjuara.

Kjo zonë është mjaft e njohur edhe për rritjen e bimëve mjekësore, ku numërohen mbi 30 lloje të tilla, si boronica, salepi, bliri, balsami, mjedra e shumë tjera.

Foto e marrë nga Bashkia e Malësisë së Madhe

Gjithashtu, nuk mbeten pas dhe kafshët e shumta që rriten në dy malet që rrethojnë luginën e Vermoshit, deri në 2 mijë metra lartësi. Atje gjenden ariu i murrmë, kaprolli, ujku, derri, dhia e egër e shumë shpendë të rrallë deri te shqiponja, simboli i Shqipërisë.

Vermoshi ka një distancë prej 95 kilometrash nga qyteti i Shkodrës. Është fshati më i madh i Alpeve të Shqipërisë.

Aktivitetet kryesore që mund të zhvillohen në Vermosh janë ngjitjet malore në malësinë e Marlules apo edhe shëtitjet në luginat e thella alpine të Lepushës dhe Cemit./ CNA