web counter
LEXO PA REKLAMA!

SHKARKO APP

App Store
Google Play

E fundit!

x

Boga dhe Thethi në syrin e piktorëve/ 20 më të mirët vijnë në "Lissus Art"

24 Tetor 2025, 15:33, Qyteti im CNA

Boga dhe Thethi në syrin e piktorëve/ 20 më të mirët

20 prej piktorëve më të mirë në vend për katër ditë me radhë punuan veprat e tyre në Theth dhe Bogë duke nisur që nga peizazhet e deri te kostumet tradicionale të burrave dhe grave në zemër të alpeve shqiptare. Aktiviteti erdhi në kuadrin e "Lissus Art", event që bën bashkë piktorët në vend.

"Jemi në Bogë në momentin e ekspozimit të veprave. Punojmë prej 4 ditësh. Një koloni e organizuar nga dashamirësit e artit. Një koloni mbresëlënëse pasi vetë terreni këtu është i mrekullueshëm. Kjo panoramë ndikon në telajot tona. Kemi lëvizur nga Lezha drejt Thethit e Bogës për të udhëtuar ne pranverë në Dumre. Është një rezultat që do mbetet në arkiv që në vitin 2025 një grup artistësh eksploruan këtë vend. Qëllimi ishte vjeshta, sepse janë asete kombëtare për t’i pikturuar", u shpreh piktori, Pashk Përvathi.

Piktori Buron Kaceli është shprehur se këto aktivitete janë të rëndësishme për vetë artistët. 

"Këto aktivitete janë të rëndësishme për ne artistët. Nëse flasim për këtë koloni ajo ështe tejet e rëndësishme ku të gjithë kemi krijuar vepra të mira. Këtu kam kaluar para 40 vitesh dhe sot jam mahnitur. Do të vij sërish. Kam bërë disa vepra të mira, është pasuri e jona", tha Kaceli.

Organizatori i kolonisë që prej dy vitesh ka bërë bashkë 20 piktorët nga i gjithë vendi, Dedë Maluta, shprehet se ka për qëllim mbajtjen gjallë të veprave të peizazhit te brezi i ri, piktura që për shkak të formave të reja të artit po pakësohen gjithnjë e më shumë.

"Ky është aktiviteti që po bëhet për herë të 4-t në Shqipëri. Jemi një koloni nga të gjitha qytetet rreth 20 të tillë. Synojme të bashkojmë trojet shqiptare përmes telajos. Pas shqipërisë në Kosovë, Maqedoni e shpresoj që më pas edhe në Kalabri. Kemi një plejadë artistësh dhe të rinjtë duket se nuk po e trashëgojnë. Ndaj duam t'i ruajmë si thesar", është shprehur Maluta.

Kolonia e artistëve shqiptarë të pikturës prej dy vitesh po udhëton në zonat më të bukura të vendit me qëllim evidentimin përmes veprave të artit të natyrës mbresëlënëse që vendi ynë ka nga veriu në jug. Vitin e ardhshëm synojnë të udhëtojnë drejt trevave të tjera shqipfolëse duke përfshirë Kosovë, Mal të zi, Maqedoni dhe deri në Kalabri. /CNA





Lajmet e fundit nga