web counter
LEXO PA REKLAMA!

SHKARKO APP

App Store
Google Play

E fundit!

x

Topi flet për pasuesin e Metës/ “Nuk e prisja zgjedhjen e tij”

9 Qershor 2022, 14:58, Politikë CNA
Topi flet për pasuesin e Metës/ “Nuk e prisja zgjedhjen e
Ish-Presidenti, Bamir Topi

Ish-Presidenti, Bamir Topi, ka zbuluar se pasuesin e Ilir Metës, Bajram Begajn, e ka njohur në kushte të tjera, larg kontekstit politik.

I ftuar në rubrikën “Opinion” në "New24", Topi theksoi se nuk e priste që ai të zgjidhej në krye të shtetit.

“Zotin Begaj e kam njohur në kushte të tjera dhe larg kontekstit politik. Nuk e prisja emrin e tij. Jo, nuk e prisja, është një surprizë”, tha ish-kreu i Shtetit.

Më tej, Topi shtoi se Begaj është një figurë nga e cila pret një përfaqësim dinjitoz.

 “Kjo është konsiderata dhe parashikimi im që nuk ndikohet nga kontakti i radhës, por mbi bazën e eksperiencës, shoh një njeri që do e ruajë seriozitetin e detyrës së presidentit”, shtoi ai.

Por a do të jetë Begaj një President mbi palët?

“Mendoj se zyra e kreut të Shtetit ka një fuqi magjike sepse ti shkon si i zgjedhur në rrethana të caktuara. Për shembull presidenti Meidani u zgjodh me votat e socialistëve pas ngjarjes së 1997-ës. Moisiu erdhi me votë konsensuale. Unë me vështirësi në 2007-ën për të plotësuar 84 votat. Koha është e ndryshme, konjuktura të ndryshme, por kur futesh në atë zyrë, duket se është fuqia e asaj zyre që edhe pse s’ta ka dhënë populli me votë është interesi i madh publik se si do të performojë Presidenti. Do të jetë apendiks i një linje politike apo do t’i japë drejtim detyrës. Presidentet janë vendosur në detyrimin moral dhe kushtetues që të jenë vetvetja. Por edhe janë vendosur në situatë të vështirë nga mazhorancat.

Gjithmonë betejat kanë filluar të iniciuara nga mazhorancat politike dhe në raport me Presidentët kanë qenë një pozicion të dukshëm. Ndërsa Presidenti është një. Nuk bëhet fjalë për grupin e këshilltarëve, Presidenti është një. Ky nuk është një raport numerik një kundër të gjithëve, por angazhimi i të gjitha mjeteve qoftë institucionale, politike e mediatike e vendos Presidentin në një pozitë të vështirë përballë mazhorancave. Kjo e bën Presidentin të reagojë, sepse Presidenti është mbi një mazhorancë.

Unë mendoj personalisht, por jam i bindur se edhe dy miqtë e mi Meidani dhe Moisiu ndajmë të njëjtin mendim për zotin Begaj që të jetë një figurë dinjitoze, por janë vetë ngjarjet që ky vend prodhon që do të diktojnë karrierën e tij”, tha Topi./ CNA.al





Lajmet e fundit nga