LEXO PA REKLAMA!

SHKARKO APP

Rama, fushatë me turizmin/ Sulmon kryebashkiakun e Vlorës

27 Shtator 2022, 11:54, Politikë CNA
Rama, fushatë me turizmin/ Sulmon kryebashkiakun e Vlorës
Kryeministri Edi Rama

Kur pritet të prezantojë kandidatët për bashkitë, kryeministri Edi Rama ka dalë dhe ka bërë fushatë me sezonin turistik të këtij viti.

Rama tha se në 6-mujorin e parë të vitit, nga sezoni turistik janë gjeneruar më shumë se 1 miliard të ardhura.

“Ne kemi pasur një sezon surprizues edhe për ne që ishim përgatitur për të pasur një sezon të mirë. Realisht sezoni ishte surprizues për sa i përket sulmit të të ardhurave për ekonominë. Vetëm në 6-mujorin e parë kemi kaluar 1 miliard të ardhura nga turizmi, pothuajse dyfishin e vitit të ardhshëm. Flukset e vizitorëve të huaj, deri në gusht kemi qenë 5 milionë e 600 e ca mijë që është e barabartë me 1.3 milionë më shumë se vitin e kaluar. Sidomos një turizëm që ka sjellë shumë vizitorë në disa qytete, duke filluar nga Tirana. Tirana ka pasur një 'boom' turistësh që kanë preferuar Tiranën dhe qëndrimin në Tiranë. Kjo shikohet jo vetëm nga hotelet që kanë qenë plot, por edhe nga numri i apartamenteve që kanë qenë të marrë me qira”, theksoi Rama.

Gjithashtu, kreu i qeverisë sulmon sërish kryebashkiakun e Vlorës, Dritan Lelin, teksa tha se qyteti që nuk ka pasur turizmin mirë është Vlora.

Kjo është një deklaratë e përsëritur nga kryeministri Edi Rama, i cili ka sulmuar jo pak herë Lelin.

“Kemi qenë një vend dhe kjo gjë ka vazhduar edhe për disa vite që bënim lajm për pisllëkun. Që dilnim nëpër mediat e huaja si një vend pis, i ndotur. Jo shumë larg që këtu kemi pasur një ndër gangrenat më të mëdha të Shqipërisë dhe kontinentit europian. Fushën e mbeturinave në Durrës që bënte lajm çdo verë. Kemi pasur këtë vit falë punës këmbëngulëse, për të cilin kishim filluar punën një vit më parë, siç kemi filluar punën për vitin e ardhshëm nën drejtimin e ministres së mjedisit dhe shembullit inkurajues të një bashkie, më konkretisht bashkisë së Lezhës, sa i përket pastërtisë. Sot me përjashtimin spektakolar të Bashkisë së Vlorës mund të themi se kemi pasur një sezon jo më të pastër se ndonjëherë, se në krahasim me pisllëkun që kemi qenë, është një sezon realisht i pastër. Duke filluar nga Tirana, të gjitha përshtypjet e të anketuarave për mendimin mbi Tiranën fillojnë me pastërtinë. Një kryeqytet që ishte simbol i pisllëkut, në ato katër vite që ra në gjumë së bashku me atë që gërhiste, tashmë është fakt që është i pastër”, tha Rama./ B.A. - CNA.al

Lajmet e fundit nga