LEXO PA REKLAMA!

SHKARKO APP

“Rrotacioni ofron të njëjtin model qeverisës”/ Blendi Kajsiu, ftesë për të mos votuar partitë e vjetra

27 Shtator 2022, 11:19, Politikë CNA
“Rrotacioni ofron të njëjtin model qeverisës”/ Blendi
Pedagogu i Shkencave Politike, Blendi Kajsiu

Pedagogu i Shkencave Politike, Blendi Kajsiu, ka kërkuar të refuzohet rrotacioni brenda partive tradicionale, për të cilat pretendon se ofrojnë të njëjtin model qeverisës.

Në një koment të tij për "Lapsi.al", Kajsiu thotë se qytetarët duhet të votojnë për këdo përveç partive tradicionale që kanë 30 vite që qeverisin.

Ai deklaron se PS, PD dhe LSI kanë abuzuar me pushtetin dhe kanë varrosur shpresën dhe ëndrrat e qytetarëve shqiptarë për një të ardhme më të mirë.

“Refuzimi i partive tradicionale është e vetmja alternativë reale në skenën tonë politike. Rrotacioni brenda tyre është pseudo-alternativë sepse ofron të njëjtin model qeverisës, të njëjtin nivel korrupsioni dhe kapje shteti thjesht duke ndryshuar emrat. Madje shpesh as emrat nuk ndryshojnë sepse shkojmë nga qeveria Berisha-Meta te qeveria Meta-Rama për t'u kthyer përsëri te Meta-Berisha. 

Natyrshëm në këtë pikë lexuesi do pyes: Po për kë duhet votuar? Përgjigjja në fakt është shumë e thjeshtë: Për këdo përveç partive tradicionale që kanë 30 vite që qeverisin, abuzojnë me pushtetin dhe që e kanë varrosur shpresën dhe ëndrrat e qytetarëve shqiptarë për një të ardhme më të mirë. Partitë tradicionale janë PS, PD dhe satelitët e tyre, si LSI-ja e Metajt, PR-ja e Fatmir Mediut, Partia Demokristiane e Nard Ndokës apo Partia Social Demokrate e Tom Doshit, që janë ndërtuar thjesht për pasurimin e pronarëve të tyre.

Ndërkohë, në çdo palë zgjedhje shfaqen parti alternative që mediat dhe politikanët kryesore bëjnë çmos t'i injorojnë dhe delegjitimojnë. Në zgjedhjet e fundit parlamentare të vitit 2021 u shafqën të paktën tre të tilla, Lëvizja Vetvendosja, Nisma Thurja dhe Lëvizja e Re (LRE), pa përmendur një numër kandidatësh të pavarur. Natyrisht secilës prej këtyre partive mund t'i gjesh bishta, pasi bishtologjia është disiplinë e konsoliduar te ne. Dikush mund të jetë skeptik për Boiken Abazin e Vetvendosjes, Endrit Shabanin e Nismës Thurja apo Arian Galdinin e LRE-së, apo për kandidatët e pavarur Filan Fisteku dhe Fistek Filani”, shprehet ai.

Pedagogu thekson se është e palogjikshme që votuesit të qëndrojnë besnikë ndaj këtyre partive tradicionale.

“Nuk ka asnjë logjikë që votuesit t'u mbeten besnikë partive tradicionale dhe politikanëve Rama, Berisha dhe Meta që në mënyrë sistematike dhe të përsëritur tradhtojnë shpresat e tyre. E vetmja zgjidhje është votimi për çdo filan fistek apo lëvizje filan fistekësh që nuk ka lidhje me klasën politike tradicionale, nga e cila tashmë nuk mund të presësh asgjë. Sot më shumë se kurrë është koha që votuesi t’ia kthejë tradhtinë politikanëve tradicionalë duke i tradhtuar ata, duke zgjedhur mes filan fistekërve që popullojnë fletën e votimit. Kjo është alternativa e vërtetë, çdo gjë tjetër është riciklim i ujërave të zeza”, thekson Kajsiu./ B.A. – CNA.al

Lajmet e fundit nga