Zgjerohet përplasja diplomatike/ Këlliçi, akuza të reja ndaj Hoxhës

25 Prill 2026, 14:01, Aktualitet CNA

Zgjerohet përplasja diplomatike/ Këlliçi, akuza të reja

Situata rreth mesazheve të pretenduara të ministrit të Jashtëm, Ferit Hoxha, ka marrë përmasa të reja pas reagimit zyrtar që ka ardhur nga Shkupi.

Ministri i Ekonomisë dhe Punës i Maqedonisë së Veriut, Besar Durmishi, ka dënuar ashpër gjuhën e përdorur në komunikimet e publikuara, duke e cilësuar fjalorin e Hoxhës si të papranueshëm dhe një shkelje të rëndë të etikës shtetërore.

Durmishi theksoi se Shkupi zyrtar pret një sqarim urgjent nga Tirana, ndërsa insistoi që ministri Hoxha duhet t’u kërkojë falje shqiptarëve të Maqedonisë së Veriut për etiketimet ofenduese.

Sipas tij, shqiptarët atje nuk janë thjesht fqinj të një projekti politik si Open Balkan, por pjesë e pandashme e trungut kombëtar.

Një kritikë e ashpër u drejtua edhe ndaj ambasadorit shqiptar në Shkup, Denion Meidani, heshtja e të cilit u cilësua si zhgënjyese dhe e rreshtuar pas interesave partiake.

Ndërkohë në Tiranë, deputeti i opozitës, Belind Këlliçi, ka vijuar me akuza të forta, duke pretenduar se ministri Hoxha po tenton të fshijë gjurmët e skandalit.

Përmes një reagimi të fundit, Këlliçi deklaroi se ministri ka nisur të dalë nga grupet e komunikimit në "WhatsApp", specifikisht nga grupi i titulluar "Ambasadorët", si një përpjekje për t’i shpëtuar faktimit të bisedave.

Deputeti sqaroi gjithashtu se mospërputhjet e orareve në mesazhe, të cilat u përdorën nga media të caktuara si mbrojtje për ministrin, janë thjesht pasojë e zonave të ndryshme kohore ku ndodhen anëtarët e grupit.

Sipas Këlliçit, paniku i ministrit dhe dalja nga grupet e punës vërtetojnë skandalin, ndaj ai përsëriti thirrjen për dorëheqje të menjëhershme dhe falje publike për turpin e pashembullt ndaj bashkëkombësve.

“Ferit nuk ke pse vazhdon e diskretitohesh!!!

Nuk të mbron dot as time zones të ndryshme dhe as dalja nga grupet e ëhatsapp! Je thjesht skandaloz dhe këtë po e fakton nga ora në orë!

Jep dorëheqjen dhe kërko falje publike për këtë turp e skandal të pashembullt!

Ke përfunduar në pikën që mbrojtjen ta bën media e inceneratorit Tiranë, makineria e shpifjeve të leçjanit Bollino, të cilët ende nuk e kuptojnë diferencën e time zonave!”, shkruan Këlliçi.

Zgjerohet përplasja diplomatike/ Këlliçi, akuza të reja

Kjo krizë diplomatike e vendos Ministrinë për Europën dhe Punët e Jashtme në një pozicion mjaft të vështirë, pasi mohimi fillestar i lajmit si fabrikim tashmë po përballet me kërkesa zyrtare për llogaridhënie nga qeveria e vendit fqinj./ CNA