E fundit!

08:41 Aktualitet

Zvarrit pafundësisht proceset gjyqësore/ Sot, seanca e radhës e Veliajt në GJKKO

Sot do të mbahet seanca e radhës në Gjykatën e Posaçme kun...

Përmbytje, bllokim aksesh rrugore dhe një humbje jete/ Çfarë ka shkaktuar situata e reshjeve në vend

12 Dhjetor 2021, 16:55, Aktualitet CNA

Reshjet e dendura të shiut dhe moti i keq pothuajse në të gjithë vendin ka shkaktuar përmbytje tokash në disa qytete.

Si pasojë e këtij moti të keq, disa Bashki të vendit kanë mbetur prej ditësh pa energji elektrike, përfshirë këtu edhe Devollin.

Ky problem madhor për banorët e Devollit iu ka kushtuar ditën e sotme edhe një humbje jete, teksa mësohet se një 53-vjeçar ka ndërruar jetë në garazhin e shtëpisë së tij, pasi u asfiksua nga gazi i gjeneratorit.

Andrea Grazhdani kishte vetëm 3 ditë që ishte kthyer nga Greqia dhe po bënte punime në shtëpinë e tij, duke u përpjekur të vendosë kaldaja.

Si pasojë e mungesës së energjisë elektrike për shkak të motit të keq, ai ka tentuar të hapë gjeneratorin dhe gjatë natës është asfiksuar.

Nga ana tjetër, reshjet me intensitet të lartë kanë rritur së tepërmi prurjet në lumin Vjosë dhe si pasojë ka sjellë edhe daljen e tij nga shtrati.

Mëngjesin e sotëm, shtabi i emergjencave të prefekturës Fier kanë lajmëruar banorët e rrezikuar që të evakuohen. Në disa zona bëhet me dije se niveli i ujit ka shkuar nga 50 cm deri në 1 m.

Në Ferras, Çerven janë përmbytur serat dhe fermat duke dëmtuar tokat bujqësore, teksa uji ka hyrë deri në katin e parë të banesave.

Nënstacioni elektrik i Poçemit është ndalur që nga ora 1:30 dhe janë pa energji elektrike rreth 3700 abonentë. Pa energji janë fshatrat Hekal, Fratar, Selitë, Kutë.

Në Selenicë, në zonën e quajtur ?Bishti i Malit mësohet se ka ujë në rrugë. Ura e Mesaplikut është e dëmtuar dhe banorët janë të izoluar.

Nga ana atjetër, Juglindja prej dy ditësh është përfshirë nga reshjet e dëborës dhe ka sjellë probleme në disa zona, ku në segmentin e Dardhës trashësia e dëborës ka shkuar deri në 70 cm.

Në Pogradec prej 48 orësh janë pa energji dy njësi administrative, Dardhas dhe Trebinjë dhe 6 fshatra në njësinë Proptisht.

Ka pasur edhe rrëshqitje dherash në fshatin Zall Torrë dhe po merren masa për hapjen e rrugës.

Akset nacionale aktualisht janë të hapura dhe nuk paraqiten probleme, me përjashtim të disa rrugëve dytësore rurale, në të cilat mund të qarkullohet vetëm me zinxhirë.

Emergjencat Civile kanë njoftuar se në Qarkun e Elbasanit nuk ka përmbytje, pasi prurjet e lumenjve dhe përrenjve deri më tani kanë qenë mesatare./CNA.al