LEXO PA REKLAMA!

SHKARKO APP

Vettingu nuk po e “pastron” drejtësinë/ Mijëra denoncime për gjyqtarët dhe prokurorët në ILD

2 Gusht 2022, 10:21, Vetingu CNA
Vettingu nuk po e “pastron” drejtësinë/ Mijëra
Foto ilustruese

Vettingu nuk po arrin të zgjidhë të gjitha problemet e drejtësisë. Kjo tregohet edhe nga numri i lartë i denoncimeve pranë Inaspektoriatit të Lartë të Drejtësisë.

Problematikat e 3 dekadave tranzicion reflektohen ende te drejtësia.

Vetëm gjatë muajit korrik 2022, Sektori i Ndihmës Juridike dhe Ankesave ka pritur 27 ankues, të cilët janë paraqitur në ambientet e Zyrës së Inspektorit të Lartë të Drejtësisë dhe 25 telefonata me qytetarë, të cilët kanë kërkuar informacion mbi fazën e ankesave të tyre ose informacion mbi plotësimin e formularit TIP të ankesës.

Në total, zyra e Inspektorit të Lartë të Drejtësisë, në të njëjtin ka administruar 54 ankesa, 49 nga të cilat janë paraqitur nga qytetarët, 4 ankesa nga institucione dhe 1 ankesë nga një institucion jopublik.

Zyra e Inspektorit të Lartë të Drejtësisë ka kryer konfirmimin standard të marrjes së ankesës për të gjitha ankesat, që kanë hyrë për herë të parë në institucion gjatë muajit korrik 2022.

Ankesat që kanë subjekt të tyre prokurorë dhe gjyqtarë janë shpërndarë tek inspektorët dhe ndodhen në faza të ndryshme, si shqyrtim fillestar, arkivim, verifikim, me projektvendimet përkatëse.

Mijëra denoncime edhe një vit më parë

Kreu i ILD-së, Artur Metani, gjatë raportimit të fundit në Kuvend, tha se ka një rritje të jashtëzakonshme të numrit të denoncimeve për gjyqtarët dhe prokurorët.

Vettingu nuk po e “pastron” drejtësinë/ Mijëra
Kreu i ILD-së, Artur Metani

“Sot që flasim janë mbi 4700 ankesa të konfirmuara në ILD, nga 3054 që kishim deri në fund të vitit 2020. Kjo flet shumë për besimin dhe pritshmërinë e lartë që kanë qytetarët tek institucioni. Me kapacitetet ekzistuese të ILD-së, gjatë vitit 2021 janë marrë 22 vendime për fillimin e hetimit disiplinor për 31 subjekte të hetimit disiplinor”, tha Inspektori i Lartë i Drejtësisë.

Në raportin e paraqitur në Kuvend, thuhet se shkeljet disiplinore për të cilat, Inspektori i Lartë i Drejtësisë ka nisur hetimin disiplinor, renditen në shkelje disiplinore gjatë dhe jashtë ushtrimit të funksionit si dhe shkelje disiplinore për shkak të kryerjes së veprës penale me vendim të formës së prerë, që sipas natyrës së tyre diskreditojnë pozitën dhe figurën e magjistratit ose dëmtojnë rëndë besimin e publikut në sistemin gjyqësor ose të prokurorisë, bazuar në faktet dhe rrethanat e pranuara nga gjykata.

Masat disiplinore të propozuara kanë qenë nga vërejtje deri në shkarkim nga detyra.

Nga përfundimi i hetimit disiplinor gjatë vitit 2021, për 21 magjistratë, ILD ka propozuar fillimin e procedimit disiplinor për 17 magjistratë ( 11 gjyqtarë dhe 6 prokurorë), ose për 81% të rasteve të hetuara, ndërsa për 4 magjistratë kanë vendosur mbylljen e hetimit disiplinor.

“Dua të nënvizoj se nga 17 procedimet, 7 prej tyre kanë ardhur si rezultat i shqyrtimit të ankesave të paraqitura nga qytetarët, të cilat zënë një volum prej 41% të rasteve të procedimit disiplinor.” tha Metani në foltoren e Kuvendit, duke nënvizuar se trajtimi i sa më shumë ankesave vijon të jetë prioritet i institucionit për vitin 2022./CNA.al

Lajmet e fundit nga