E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Protestë para Bashkisë së Pogradecit/ Kundër rritjes së taksave e tarifave për biznesin dhe qytetarët

24 Nëntor 2023, 16:22, Qyteti im CNA

Protestë para Bashkisë së Pogradecit/ Kundër rritjes së

Foto ilustruese

Paraditen e sotme në Pogradec është zhvilluar një protestë nga shoqëria civile, kundër rritjes së tarifave. Më konkretisht, arsyet e reagimit të qytetarëve pogradecarë kanë të bëjnë me tarifën e ujit dhe atë të bizneseve që operojnë në këtë qytet.

Sipas protestuesve, ata nuk janë thirrur në asnjë dëgjesë publike për të dhënë mendimin e tyre, ndërsa shprehen se këto rritje tarifash prekin banorët e Pogradecit, por edhe bizneset të cilat kanë zhvilluar aktivitetin e tyre më tepër gjatë sezonit të verës, ndërsa muajt e tjerë të vitit duket se situata vështirësohet.

"Protestën po e organizojmë për projektvendimet që ka sjellë bashkia e Pogradecit për këshillin bashkiak për rritjen e taksave dhe tarifave për biznesin e madh dhe për qytetarët. Kemi reaguar dhe jemi kundër këtyre rritjeve për shkak se biznesi nuk është në një klimë të favorshme sidomos në periudhën e dimrit në Pogradec. Ndaj kemi dalë të shprehemi kundër rritjes, dhe lajmi mirë është që bashkia ka filluar të reflektojë duke anulluar rritjen e ujit, dhe e ka kthyer për konsultim publik. Ne si qytetarë kërkojmë që këto taksa të anullohen e mos të ketë rritje për to. Bëhet fjalë për tarifat e pastrimit, janë shumë të larta, nga 20%, 40% dhe 100% për bizneset dhe këto tarifa nuk rezultojnë të jenë në asnjë qytet tjetër përveç Pogradecit."

"Më vjen shumë keq që tarifa e pastrimit është rritur në mënyrë drastike për të gjithë qytetarët e Pogradecit. Sot qytetari i Pogradecit paguan 8 mijë lek më shumë se vitin e kaluar. Situata është shumë e vështirë, unë do ti bëja një apel gjithë këshilltarëve që janë zgjedhur me votën e popullit, do t'i pyesja pse s'dalin sot në ndihmë të qytetarëve? Të mos ngrenë as ujin, as taksat e pronës, as taksat më elementare që janë në qytetin tonë turistik. Jemi qytet turistik por më fukarai në Shqipëri. Arsyeja sepse na vijnë 7 mijë pushues në verë dhe duket sikur jemi qytet i pasur, por nuk është kështu. Sot bizneset vetëm sa hapin derën. Këshilltarët që kanë marrë votën duhet tu përgjigjen qytetarëve, e jo të ngrenë kartonin."

"Në rradhë të parë jam qytetar i Pogradecit, në rradhë të dytë jam këshilltar në këtë bashki. Jam shumë i shqetësuar për pjesën e taksavë vendore dhe bizneseve që do tu dyfishohet tarifa. Pogradeci vërtet është një qytet turistik por ndoshta mos duan ta kthejnë në qytet për interesat e dikujt? Do rritet 50% taksa e hotelerisë dhe fast food-eve, për këtë shkak duhet rritur nga këto biznese çmimet e dhomave apo ushqimeve, ose uljen e pagave të punonjësve. Taksat e qytetarëve preken sepse është dhe një vendim që lidhet me tarifën e ujësjellësit kur nuk e dimë si furnizohen me ujë disa fshatra."

Nga ana tjetër ka reaguar edhe Bashkia e Pogradecit, ku drejtoresha e taksave pranë kësaj bashkie, Enjela Karafili ka treguar rritjet e tarifave dhe bizneset që ato prekin, po ashtu edhe ndihma që u është ofruar një pjesë të bizneseve. Bashkia është tërhequr nga vendimi për tarifën e ujit duke vendosur një dëgjesë publike e më pas do të shihet nëse do të proçedohet me rritjen e tarifës apo përgjysmimin e saj.

Enjela Karafili, drejtoresha e taksave në bashkinë e Pogradecit : Problemi që sot të gjithë jemi në dijeni ka të bëjë me rritjen e tarifës së pastrimit që është vendosur për vitin 2024, për shkak se në tarifën e pastrimit jo të gjithë koston e paguanin bizneset dhe familjet, një pjesë e saj mbahej edhe nga bashkia. Me rritjet e pagave minimale dhe me ndryshimet e çmimeve, rritja e shpenzimeve të bashkisë është shumë e lartë ndaj dhe s'mund ta mbajë më këtë kosto.

Ne e menduam ta kalojmë tek bizneset dhe të mos prekim familjarët, ata që preken janë vetëm qyteti i Pogradecit, tarifa e pastrimit nga 3200 lek shkon në 4000 lek, nuk preken familjet në nevojë, me ndihmë ekonomike, pensionistët, madje bashkia prej 2 vitesh ka vendosur që kryefamiljaret femra dhe pensionistët e vetmuar paguajnë 0 tarifë.

Kemi gjithashtu lehtësime tek bizneset, ato që hapen nga gra paguajnë në vitin e parë 25% më pak të tarifave, të rinjtë deri në moshën 25 vjeç që hapin për herë të parë një biznes, paguajnë tarifat deri në 25%.

Kemi menduar që për shkak të fluksit të madh të viteve të fundit që po ndodh në bashkinë e Pogradecit gjatë sezonit veror, koston ta mbajnë bizneset që ndotin më tepër dhe përfitojnë nga kjo dyndje e turistëve gjatë sezonit, si bar restorantet hotelet të cilat u mendua të ngrihej 100% tarifa e tyre, por u gjet një mënyrë tjetër për të lehtësuar ata në 50%, dhe pjesën tjetër do ta mbajnë bizneset mbi 50 milion lek xhiro. Tarifë tjetër që do ndryshojë është ajo tek parukeritë dhe berberët, që shkon në 40% të rritjes, serviset e makinave. Uji do të kalojë në dëgjesa publike e më pas do të vendoset."

Protesta ka qenë paqësore, dhe ka zgjatur rreth 30 minuta para bashkisë së Pogradecit, ndërsa shihet se një reagim i qytetarëve ka dhënë rezultate lidhur me problematikat që ata trajtuan./ CNA