“100 vjetori i Themelimit të Muzeut Kombëtar 1922-2022” në Panairin e Librit/ Saka: momente të forta krenarie

18 Nëntor 2022, 22:14, Kulturë CNA

“100 vjetori i Themelimit të Muzeut Kombëtar 1922-2022”

Drejtoresha e Marrëdhënieve me publikun dhe Promovimit në Arkivën Qëndrore, Elsa Saka

Drejtoresha e Marrëdhënieve me publikun dhe Promovimit në Arkivën Qëndrore, Elsa Saka, ka publikuar librin me titull “100 vjetori i Themelimit të Muzeut Kombëtar 1922-2022”, në bashkëautorësi me Dorian Koçin.

Libri është prezantuar tek Panairi i Librit, dhe Saka e cilëson këtë botim si një nga momentet më më të forta të krenarisë së saj.

“Ky botim nuk i dedikohet thjesht përkujtimit të 100 vjetorit të Muzeut Kombëtar por vjen dhe si një moment i vlerësimit dhe nderimit ndaj një pune kolosale dhe sakrifice shekullore të elitave të kombit për dokumentimin dhe ekspozimin e identitetit tonë kombëtar me rrënjë të thella europiane”, ka shkruar Saka.

Botimi dëshmon një pjesë të rëndësishme të korpusit të dokumenteve dhe fakteve të zbuluara nga fondet e Arkivit Qendror Shtetëror që janë hartuar dhe ruajtur me fanatizëm ndër breza, dhe frymëzuar nga pasioni i një elite patriotësh dhe intelektualë të mëdhenj.

Postimi i plotë i Elsa Sakës.

Sot është një ditë e rëndësishme, sepse ky botim për mua është një nga momentet më të forta të krenarisë që ndiej pas një pune të gjatë dhe me shumë pasion.

Disa rreshta mbi këtë botim me bashkëautorësi Dorian Koçi dhe redaktim të Teuta Toska i cili pasqyron historinë e Muzeut Kombëtar në pikat më kulminante të tij!

Ky botim nuk i dedikohet thjesht përkujtimit të 100 vjetorit të Muzeut Kombëtar por vjen dhe si një moment i vlerësimit dhe nderimit ndaj një pune kolosale dhe sakrifice shekullore të elitave të kombit për dokumentimin dhe ekspozimin e identitetit tonë kombëtar me rrënjë të thella europiane.

Bibliotekat dhe muzeumet cilësohen si ADN e kulturës së një kombi sepse kromozomet e këtij zinxhiri janë të krijuara nga betejat e ashpra të ekzistencës dhe mbijetesës ndër shekuj.

Sot përmes këtij botimi simbolik , të gjithë ne reflektojmë mbi ngritjen e Muzeut Kombëtar, jo si një proces i ndërtimit fizik të një godine apo grumbullimit së dokumentacionit dhe provave materiale, por si projektim i një udhëtimi ndër shekuj, kompleks dhe të vështirë të ndërgjegjes dhe vetëdijes sonë kombëtare.

100 vite origjinë e një muzeu, nuk janë të konsiderueshme për historinë e një kombi, dhe aq më pak për Shqipërinë e cila gjendet mes fqinjëve që zotërojnë histori të pasur dhe që daton me shekuj në themelimin e muzeve dhe ngritjen e monumenteve. Por e veçanta në koloritin historik të Muzeut tonë Kombëtar, është pikërisht dokumentimi, memoristika, artifaktet dhe të shumë objekteve që shfaqen si tharm i fuqisë së jashtëzakonshme në përballjen e shqiptarëve me shumë sfida dhe beteja në shpalosjen e vlerave të identitetit tonë europian.

Ky botim dëshmon një pjesë të rëndësishme të këtij korpusi të dokumenteve dhe fakteve të zbuluara nga fondet e Arkivit Qendror Shtetëror që janë hartuar dhe ruajtur me fanatizëm ndër breza, dhe frymëzuar nga pasioni i një elite patriotësh dhe intelektualë të mëdhenj!

- Librin mund ta gjeni te Panairi i Librit te stenda e Akademisë së Shkencave./ CNA.al

“100 vjetori i Themelimit të Muzeut Kombëtar 1922-2022”