Harta e re gjyqësore/ Ulsi Manja: Ulje ngarkesash dhe shkurtim kohe për dhënie drejtësie

2024-01-12 13:34:00, Politikë CNA

Ulsi Manja

Ministri i Drejtësisë Ulsi Manja gjatë një prononcimi nga Korça se tashmë harta gjyqësore është mekanizëm ligjor i bërë realitet.

Teksa përurori Zyrën e Ndihmës Juridike falas ai tha se me sistemin e ri do eleminohet ngarkesa në gjykata si dhe do shkurtohet ndjeshëm koha e dhënies së drejtësisë.

Fjala e plotë:

Edhe çështja e hartës së re gjyqësore që ka qenë mekanizëm ligjor shumë i debatuar dhe diskutuar, tashmë është realitet. Harta e re gjyqësore kishte qëllim të rriste efiçencën e sistemit të drejtësisë. Nuk dua të ndalem tek konfirmimi i hartës gjyqësore edhe nga Gjykata Kushtetuese, sepse është çështje e tejkaluar por kujdesi ynë është që qytetarëve t'u garantohet akses te drejtësia. Edhe kjo zyrë që hapim sot shkon në të njëjtin drejtim. Tashmë çështja e dosjeve në gjykata apo ngarkesa e tyre, është një problem që është një nga sfidat e reformës në drejtësi që kemi sot. Kishte dosje të prapambetura edhe para reformës në drejtësi, por u krijua një mbivendosje dosjesh në të gjithë shkallët e sistemit të drejtësisë për shkak edhe të procesit të Vetingut dhe largimit të gjyqtarëve dhe prokurorëve nga ky proces. U krijuan një numër i mjaftueshëm vakancash në sistem, tashmë jemi në një realitet tjetër, sistemi i ri i drejtësisë është drejt konsolidimit së bashku me KLGJ kemi një strategji të qartë të eleminimit të kësaj ngarkese, jo vetëm nëpërmjet plotësimit të vakancave por dhe me shkurtimin e kohës së dhënies së drejtësisë. Dua tu jap një të dhënë, nga data 1 shkurt e vitit 2023, në kaluam me një gjykatë Apeli të Juridiksionit të Përgjithshëm ku u mbyll dhe Gjykata e Apelit të Korçës. Eficenca e pasjes së një gjykate Apeli në Tiranë e ka shkurtuar kohën e dhënies së drejtësisë në gjykatën e apelit me 1 vit e gjysëm. Çka do të thotë që një Gjykatë Apeli që sot ka 26 gjyqtarë apo 30 gjyqtarë, kur të kompletohet me numrin e plotë të gjyqtarëve që janë 78, do të thotë që jo vetëm do eleminohet ngarkesa por do shkurtohet ndjeshëm koha e dhënies së drejtësisë. Ne na takon të kujdesemi që edhe qytetarët e Korccës, tu garantojmë aksesin në sistem që mos ju mungojnë shërbimet./CNA