Mburret Luli Basha: Do mbështesim SPAK për luftën ndaj korrupsionit

2023-08-10 14:41:00, Aktualitet CNA

Mburret Luli Basha: Do mbështesim SPAK për luftën ndaj

Lulzim Basha nuk përmbahet më dhe tani është i gatshëm të bashkëpunojë me SPAK në luftën kundër korrupsionit.

Luli Basha është mburrur duke thënë se, PD e vulës ka bërë një betejë të gjatë publike për aferën e inceneratorëve, por harron se për 3 vite nuk iu ndje zëri lidhur me korrupsionin, e aq më pak për aferën e shekullit.

Basha denoncoi inceneratorët në vitin 2020 por në tre vitet e fundit ka qëndruar në heshtje dhe sapo kjo çështje krijoi debat mediatik edhe me veprimet e SPAK, Lulit i erdhi zëri dhe tashmë po na e shet veten si një denoncues i madh i aferës.

“Inceneratorët dhe "Mali i Tiranës" janë dy faqe të së njëjtës monedhë!

Afera korruptive e Inceneratorëve, për zbardhjen e të cilës Partia Demokratike ka bërë një betejë të gjatë publike, tashmë e faktuar si e drejtë nga arrestimet dhe sekuestrimet e SPAK, dhe pastrimi i parave përmes ndërtimit të kullave me bilance të padeklaruara dhe të falsifikuara, siç është rasti i fundit në zemër të Tiranës i kallëzuar në SPAK nga grupi i këshilltarëve bashkiakë të PD, janë dy faqe të së njëjtës monedhë.

Me aferën e inceneratorëve janë grabitur miliona euro nga xhepat e taksapaguesve shqiptarë. Këto para të korrupsionit qeveritar në bashkëpunim me krimin e organizuar dhe krimin ekonomik më pas pastrohen nëpërmjet skemave të ndërtimit të kullave luksoze në mes të Tiranës.

Korrupsioni i’u vjedh qytetarëve të ardhmen, varfëron familjet shqiptare, vret konkurrencën e ndershme, pengon rritjen ekonomike, cënon demokracinë dhe besimin tek institucionet. Raportet ndërkombëtare evidentojnë qartë se korrupsioni në qeverinë Rama ka arritur nivelin e kapjes së shtetit, ku qeveritarët dhe klientela politike e përdorin shtetin për interesat e tyre private në dëm të qytetarëve.

Lufta pa kompromis kundër korrupsionit është emergjencë kombëtare, prandaj Partia Demokratike është e vendosur në mbështetjen tonë ndaj SPAK dhe e përkushtuar për miratimin dhe zbatimin e vetting-ut të politikanëve, sepse vetëm një politikë e pastër mund të sigurojë një ekonomi të fortë me mirëqenie dhe siguri për familjet shqiptare”, shkruan Luli Basha./ CNA