web counter
LEXO PA REKLAMA!

SHKARKO APP

App Store
Google Play

Verëra kontrabandë dhe të falsifikuara/ Miliona euro dëm në buxhet dhe rrezik për shëndetin

28 Prill 2026, 16:14, Denoncim CNA

Verëra kontrabandë dhe të falsifikuara/ Miliona euro dëm

Prej disa ditësh CNA ka raportuar në lidhje me një skandal që akuzon tri institucione si Doganat, Tatimet dhe AKU-në.

Një problematikë e konstatuar, por që nuk zgjidhet nga këto institucione që, ose janë të paafta, ose të korruptuara.

Verërat kontrabandë dhe false akuzojnë këto institucione, jo vetëm për milionat e eurove që mungojnë në buxhet, por si alarm për rrezikun e jetës së qytetarëve, pasi origjina e shumicës së tyre nuk dihet nga vjen. Bodrumet e Turqisë, jugu i Italisë apo zona e Kombinatit në Tiranë kanë mbushur tregjet me verëra false dhe jashtë çdo kontrolli.

Në investigimin tonë kemi mundur të zbulojmë se në disa dyqane dhe restorante në qendër të Tiranës tregtohen verëra pa pullë fiskale dhe pa siguri mbi përmbajtjen dhe origjinën e tyre.

Qarkullojnë sasi të konsiderueshme vere premium, të prezantuara si marka shumë të njohura franceze dhe italiane si Petrus, Sassicaia, Ornellaia, Masseto dhe Romanée-Conti, pavarësisht se prodhimi i tyre është shumë i kufizuar. Çmimet e tyre janë mjaft të larta, por në fakt nuk dihet se çfarë kanë brenda kur janë pa origjinë të kontrolluar, që nga prodhuesi deri te distributori. E njëjta situatë është edhe me pijet alkoolike të forta dhe shumë produkte të tjera konsumi të përditshëm.

 

Si funksionon kontrabanda

Këto produkte, sipas të dhënave të verifikuara, hyjnë në Shqipëri përmes kanaleve jozyrtare, nga Porti i Durrësit, Vlora, Shkodra, si dhe me rrugë tokësore nga Qafë-Thana, Kakavija etj. Të gjitha këto sasi kontrabandë dhe të falsifikuara shmangin kontrollet fiskale dhe nuk dihet origjina e tyre.

Verërat më pas shiten me çmime më të ulëta për të joshur konsumatorin, por pa pullë fiskale dhe pa garanci për origjinalitetin. Ekziston rreziku që këto produkte të jenë të falsifikuara dhe të pacertifikuara, duke rrezikuar si konsumatorin, ashtu edhe tregun zyrtar. Pasoja për shëndetin, dëme në buxhet, por edhe prishje e konkurrencës në treg.

Përveç mashtrimit të mundshëm tregtar, kjo situatë përbën edhe shkelje ligjore dhe trafikim të paligjshëm të produkteve.

 

KUJDES!

Vetëm produktet me pullë fiskale dhe me distributor zyrtar apo me shoqërim dokumenti fiskal tregojnë që konsumatori po blen produktin e certifikuar, sepse kështu tregohet origjina e vërtetë e prodhuesit dhe distributorit të autorizuar. Produktet pa pullë fiskale dhe origjinë të kontrolluar, e garantuar nga distributori, mund të jenë thjesht shishe të mbushura në bodrume dhe nuk dihet çfarë përmbajtje të rrezikshme mund të kenë brenda në shishe.

Dyqane, restorante dhe magazina të fshehura që shesin produkte të tilla gjenden në Tiranë në disa zona apo në komplekse luksoze, në Vlorë në disa magazina, në Durrës dhe në Shkodër, etj. Në qytetet e tjera qarkullojnë sasi më të vogla nga shpërndarësit e këtyre kontrabandistëve apo falsifikatorëve.

Në treg qarkullojnë me mijëra shishe dhe doganat nuk i shikojnë, tatimet nuk i shikojnë, sepse doganierët dhe tatimorët i pinë vetë rëndom tavolinave dhe po ashtu as inspektorët e AKU-së nuk i shikojnë kur kontrollojnë./CNA





Lajmet e fundit nga