Mitropoliti i Korçës, Imzot Joani mesazh urimi për Krishtlindjen

24 Dhjetor 2021, 16:49, Kulturë CNA
Mitropoliti i Korçës, Imzot Joani mesazh urimi për

Mitropoliti i Korçës, Pogradecit, Kolonjës, Devollit dhe Voskopojës, Imzot Joani ka uruar besimtarët me rastin e festës së Krishtlindjes.

Përmes një video-mesazhi, Imzot Joani uron që në zemrat e gjithësekujt të ndizet mirënjohja dhe falenderimin që Perëndia ka për ne.

Mesazhi i plotë i urimit:

Krishtlindja, si ngjarja më e rëndësishme e historisë njerëzore, është pika e kthesës për ringritjen tonë dhe zbulesa e mistereve të panjohura më parë. Mishërimi i Zotit është dhurata më e madhe që Perëndia ka bërë për ne, duke na treguar se çfarë ne jemi dhe se çfarë duhet të bëhemi. Festat e mëdha të Kishës paraprihen nga një periudhë kreshme dhe meditimi, sepse është shumë e rëndësishme për ne të kuptojmë se çfarë festojmë dhe përse gëzohemi. Në Ungjillin e Shën Joanit shpjegohet qartë se Jisu Krishti është Perëndi. Në fillim ishte Fjala… edhe Fjala ishte Perëndi… (Jn. 1:1). Por, Ai është edhe njeri, sepse Fjala u bë mish, edhe banoi ndër ne (Jn 1:14). Mrekullia e Krishtlindjes, e pranisë së Perëndi-njeriut ndër ne, na sjell ndër mend historinë e shpëtimit.

Shkrimi Shenjtë na mëson se njeriu u krijua sipas ikonës së Perëndisë (Zn. 1:27). Por, nga mosbindja, njeriu u largua nga jeta në kungim me Perëndinë dhe si pasojë, ikona e tij u errësua dhe natyra e tij u shtrëmbërua, duke u robëruar nga prishja, sëmundjet, mundimet dhe vdekja. Me rënien e njeriut e keqja u shtri në të gjithë krijimin. I larguar nga Perëndia, njeriu nuk mund të shpëtonte dot vetë. Shpëtimi i tij ishte tashmë vetëm në shpresën e ardhjes së një shpëtimtari nga lart. Këtë dëshirë shpreh profeti Isaia kur thërret: Ah, sikur t’i shqyeje qiejtë dhe të zbrisje (Is. 64:1). Pikërisht, kjo ndodhi në Krishtlindje. Perëndia hapi qiejtë dhe zbriti ndër ne. Sepse ne dhe shpëtimi ynë ishin qëllimi i trupëzimit të tij ? thotë Shën Athanasi i Madh – dhe Ai i donte aq shumë qeniet njerëzore, sa të bëhej njeri dhe të shfaqej në një trup njerëzor. Prandaj, historia e Krishtlindjes është është një histori dashurie, e dashurisë së Perëndisë për botën dhe për ne.

Biri i Perëndisë duhej të bëhej njeri në të gjitha ? përveç mëkatit – për ta restauruar ikonën e errësuar dhe për të ndriçuar dhe transformuar gjithçka që është njerëzore, natyrën tonë dhe të gjitha ndijimet dhe mendimet tona. Shën Grigor Theologu shkruan: Ndonjëherë Ai e lëshon veten në gjumë, që edhe gjumi të jetë i bekuar; ndonjëherë Ai lodhet, që edhe puna të shenjtërohet; ndonjëherë qan, që edhe lotët të jenë të denjë për lavdërim. Krishtlindja na kujton çdo vit, se Biri i Perëndisë, u bë njeri, që ne të bëhemi pjesëtarë të natyrës së Perëndisë (2 Pt. 1:4).

Ne të gjithë jemi thirrur për të ndryshuar, sepse ne të gjithë kemi sëmundje të shpirtit, të cilat na kanë shtrembëruar dhe na kanë larguar nga vlerat që vijnë nga mësimi i Zotit. Janë pikërisht këto vlera ato që na bëjnë ne njerëz dhe, pa ato, ne e gjymtojnë njerishmërinë tonë dhe nuk do të mundemi dot të formojnë një shoqëri të drejtë dhe në paqe, sepse pa mua ? na thotë Zoti ? nuk mund të bëni asgjë (Jn. 15:5). Dera e shpëtimit, e cila u mbyll mbas rënies, u hap për të gjithë nga vepra shpëtimtare e trupëzimit të Zotit. Krishtlindja është një thirrje e vazhdueshme se, vetëm nëpërmjet një bashkimi me Perëndi-njeriun, ne fuqizohemi nga Ai për të për të ndryshuar dhe pastruar mendjen, shpirtin dhe trupin tonë dhe për ta ngritur përsëri ikonën tonë të rënë

Të dashur vëllezër dhe motra! Sot, më shumë se kurrë, është nevoja e madhe për të ndryshuar, sepse errësira shpirtërore, çoroditja e përgjithme dhe largimi nga burimi i dritës dhe i jetës, po e shkatërrojnë njeriun dhe, si pasojë, po shkatërrojnë familjet dhe të gjithë shoqërinë njerëzore. Le të largojmë nga vetja jonë gjithçka të keqe dhe të gjitha pasionet shkatërrimtare, të cilat e deformojnë shpirtin tonë dhe na pengojnë që të përmbushemi si bij të Perëndisë. Vetëm duke ndryshuar veten tonë ne mund të ndryshojmë të tjerët, familjet tona dhe gjithë shoqërinë.

Krishtlindja mbetet gjithmonë një dritë për ne. Le t?i hapin sytë e shpirtit ndaj kësaj drite hyjnore, që të ndriçohemi në udhëtimin e vështirë të jetës sonë, sepse nuk do të kemi ndonjë përfitim të jemi pranë dritës, ndërkohë që sytë tanë janë të mbyllur. Nëse do të ecim në errësirë, do të pengohemi dhe do të humbasim rrugën.

Gjithashtu, duke festuar dhe medituar për Krishtlindjen, le të ndizet në zemrat tona mirënjohja dhe falenderimi për atë që Perëndia ka bërë për ne dhe le të përpiqemi me gjithë forcën tonë për të ndryshuar dhe për të pastruar natyrën tonë, sepse vetëm kështu ne mund të drejtohemi dhe të shërohemi dhe, kjo do të ishte, dhurata më e madhe dhe më e pëlqyeshme që ne mund t?i japim Perëndisë. Amin.

Gëzuar Krishtlindjet dhe për shumë vjet!

Mitropoliti i Korçës, Pogradecit, Kolonjës, Devollit dhe Voskopojës

+ Joani./CNA.al

Lajmet e fundit nga