Nuk ndalet “lumi” i demokratëve  drejt Tiranës. Nga  Durrësi  janë nisur rreth 1500 anëtarë dhe simpatizantë të Partise Demokratike me makina private, rreth orës 9:30-10.

Nga Thumana, Malësia dhe qyteti i Krujës janë nisur mbi 200 qytetarë të konfirmuar, por numri pritet të jetë më i lartë pasi ka dhe nga ata që janë nisur pa lajmëruar.

Nga Fushëkruja dhe zonat përreth u nisën mbi 300 persona me makinat e tyre private, raporton Syri Tv.

Nga Gjirokastra, me dhjetëra demokratë janë organizuar privatisht që mbrëmë për në Tiranë dhe të tjerë sot edhe me linjat e transportit të udhëtarëve.

Nga Gjirokastra, Lazarati, Libohova dhe Dropulli jane nisur mbi 100 demokratë. Nga Tepelena dbe Memaliaj rreth 80, nga Përmeti dhe Këlcyra afro  70.

Nga Elbasani, mbi 1000 demokratë janë nisur sot për të marrë pjesë në protestën e thirrur nga ish kryeministri Sali Berisha para selisë blu./CNA.al

Kur kanë mbetur më pak se dy orë nga nisja e protestës, Basha duket se vijon të marrë masa.

Në pritje të protestës masive përpara selisë së Partisë Demokratike, shihen lëvizjet e para.

Në tarracën e selisë janë vendosur disa bokse nga njerëzit e Bashës.

Ky i fundit ka mbërritur në mëngjes në seli dhe ka hyrë nga hyrja anësore, e cila ndërkohë është duke u ruajtur dhe mbikëqyrur./CNA.al

Kryetari i degës së PD-së, Fier, Luan Baçi, ka deklaruar se sot do të rinisë punën Komisioni për Rithemelimin e PD-së.

Baçi i ka ofruar në vend të ikjes edhe një alternativë Bashës, edhe nëse nuk do që të dalë nga zyrat.

Ai ka thënë se Basha është deputet dhe si i tillë, ose duhet të bashkohet me Komisionin e Rithemelimit, ose nëse s’pranon të ikë fare.

 “ Le të rrijë në zyrë bashkë me ne, s’ka problem fare”, ka thënë Baçi, duke shtuar se Basha mund të bëhej pjesë madje edhe e Komisionit të  Rithemelimit.

Intervista

Baçi, cili grup është ky që niset në këto momente nga Fieri?

 Baçi: Ky është grupi I dytë që po niset drejt Tiranës. Grupe – grupe po ikin pothuaj një masë e madhe, e konsiderueshme e anëtarësisë së PD së degës Fier po edhe të degëve të tjera sipas informacione që kam dhe jam koherent me ta. Do të ketë një pjesëmarrje të madhe përpara selisë së Partisë Demokratike. Do të doja t’i ftoja anëtarët e PD të degës së Fierit, Patosit, Mallakastrës, Lushnjës dhe Divjakës të vazhdojnë rrugën drejt Tiranës pa asnjë lloj problemi, pa u u frikësuar nga fjalët që nxjerrin herë pas herë në media për dhunë apo për veprime që dëmtojnë qytetarët.

Protesta e sotshme e PD është një protestë masive, një protestë festive ku do të jemi para selisë së PD për të zbatuar vendimin e Kuvendit të 11 Dhjetorit, vendimin nr 6 që e ka shkarkuar Lulzim  Bashën nga kryetar. Mendoj dhe shpresoj se zoti Basha sot do të reflektojë dhe madje unë kam bërë ftesë që të bashkohet aty me ne bashkë, me demokratët që do të vijnë nga të gjitha rrethet e Shqipërisë dhe të vazhdojmë punën me Komisionin e Rithemelimit.

Basha do të jetë në selinë e PD ku ka edhe axhendën e ditës. Mendoni se kjo do ta pengojë protestën tuaj?

 Baçi: Absolutisht nuk do ta pengojë protestën ose fillimin e punës së Komisionit të Rithemelimit. Komisioni i Rithemelimit që u zgjidh në Kuvendin e 11 Dhjetorit do të fillojë punë sot dhe demokratët do ta shoqërojnë. Shoqërimi bëhet nga demokratët në ditën e parë të punës. Basha nuk është Kryetar, Basha është deputet i PD dhe si i tillë, ai sot ose duhet të bashkohet me ne, ose duhet të ikë nga zyra. Është shumë e thjeshtë situata dhe unë kam besim dhe shpresë se ai do të bëjë një nga këto të dyja. Në zyrë nuk do të rrijë.

 Po nëse nuk del nga zyra?

 Baçi: Le të rrijë në zyrë bashkë me ne, s’ka problem fare. Komisioni i Rithemelimit do të futet aty dhe ai le të bëhet pjesë po deshi. Mund ta hedhim dhe në votë atje ta bashkojmë të bëhet pjesë e komisionit si deputet i thjeshtë.