web counter
LEXO PA REKLAMA!

SHKARKO APP

App Store
Google Play

E fundit!

x

Nga ideja studentore në agroturizëm/ Jetmiri, vetëm 24 vjeç po ringjall fshatin

26 Dhjetor 2025, 14:34, Qyteti im CNA

Nga ideja studentore në agroturizëm/ Jetmiri, vetëm 24

Nga një ide studentore tek një sipërmarrje që sot po rritet çdo ditë, ky është rrëfimi i Jetmirit nga fshati Melgushë që zgjodhi të ndërtojë të ardhmen në vendlindje. I frymëzuar nga një profesor universiteti dhe i mbështetur nga familja, ai hodhi hapat e parë drejt agroturizmit në një kohë të vështirë, në vitin 2021, vetëm 20 vjeç. Aty ku dikur kishte pemë frutore dhe një punishte djathi familjare, sot funksionon një agroturizëm që mishëron punën, këmbënguljen dhe dashurinë për tokën

"Sapo kisha mbaruar studimet e shkollës së mesme dhe nisa Universitetin. Një profesor i imi më shtyente drejt Agro-turizmit. Aq më shumë fliste ai aq më shumë unë u fiksova me këte ide. Ia shpjegova edhe babit këtë dëshirë edhe kështu nisi për ne Agroturizmi. Më herët këtu ishte tokë me fruta. Po ashtu ne kishim një punishte djathi që merrej babi, ajo ishte faktor kryesor sepse na ndihmonte. Në 2021 ishte kohë e vështirë dhe ne nisëm këtë Agroturizëm. Në atë kohë isha 20 vjeç, nuk isha mesuar shumë me biznes dhe ishte i vështirë. Edhe tani mbetet i vështirë sepse është diçka që vazhdon. Unë e kam provuar jetën jashtë dhe nuk është diçka që më përshtatej. Doja të isha afër familjes. Edhe pse shpesh herë behem pesimist sërish qëllimet i kam të qarta”, është shprehur Jetmir Harapi, pronar i agroturizëm “Harapi”.

Fillimisht i konceptuar si restorant, biznesi u ndërtua gradualisht, me investime të kujdesshme dhe fokus të fortë te lënda e parë. Produktet bio lokale janë zemra e këtij agroturizmi: qumështi grumbullohet nga zona, mishi sigurohet nga fermerët vendas, ndërsa baxhoja e djathit mbetet një shtyllë e rëndësishme. Kjo jo vetëm që garanton cilësi, por ndihmon edhe ekonominë e komunitetit përreth

"Si fillim e kemi nis si restorant e më pas kemi ardhur gradualisht duke investuar. Jemi fokusuar tek lënda e parë, produktet bio lokale. Baxho e djathit na ka ndihmuar pastaj grumbullojmë qumshtin e zonës, mishin. Kjo ndihmon ne por edhe banorët e zonës. Jemi biznes i vogël por në rritje. Çdo gjë ka në fokus ushqimet bio, mish kemi mish viçi, qingji, keci dhe pule. I bëjmë me jufka ose pilaf. Kemi edhe shpend të tjere si rika, pata e gjel deti. Katundi shyqyr i ka të gjitha të mirat dhe ne i mbulojmë 90% te nevojave me to", shprehet i riu.

Edhe pse ka pritur turistë nga e gjithë bota, Jetmiri thekson se klientët vendas janë më të rëndësishmit. Ata janë ata që e mbajnë biznesin gjallë gjatë gjithë vitit, ndaj mesazhi i tij është i qartë: vlerësimi i klientëve shqiptarë është çelësi i qëndrueshmërisë për çdo sipërmarrje vendase.

"Kemi pas turistë nga e gjithë bota por klientët vendas janë primar për mua. I huaj vjen 1 herë në vit apo 1 herë në jetë por klientët vendas vijnë shumë më shumë ndaj u bëj thirrje bizneseve të tjera që të vlersojnë më shumë klientët vendas. Sepse ne jemi biznese që punojmë 12 muaj dhe na mbajnë klientët shqiptar", tha Harapi.

Sot, në moshën 24-vjeçare, Jetmiri ka qëllime të qarta dhe plane ambicioze për të ardhmen. Agroturizmi tashmë është zgjeruar me camping, zona pikniku, shitje të produkteve tradicionale,teksa synon dhe iniciativa të reja si ture me biçikleta, kampe verore dhe aktivitete në natyrë.

"Unë jam 24 vjeç, qëllimet i kam te qarta e kryesore është të shërbej këtu. Kemi hapur edhe një camping dhe shpresoj që në pranverë të nisim edhe turet me biçikleta në zona të ndryshme për këdo që dëshiron të shohë fshatrat. Po investojmë edhe në kampe verore. Po ashtu kemi hapur pjesen piknik, ushqime që mund ti bëjnë vetë si dhe kemi hapur pjesën e shitjeve të produteve tradicionale. Nuk kemi menu fikse por jemi me ushqime të stinës", theksoi ai.

Agroturizmin "Harapi" mund ta vizitoni çdo ditë në fshatin Melgushë vetëm disa minuta larg Shkodrës.Në këtë fundvit vjen si një ftesë për këdo sepse është një vend ku koha ngadalësohet dhe gjithçka merr kuptim tjetër. Nga pjata e përgatitur me produkte të sapo ardhura nga ferma, te qetësia e fshatit dhe kontakti i drejtpërdrejtë me natyrën, ky agroturizëm ofron një arratisje të vërtetë nga rutina. Është destinacion për ata që kërkojnë shije autentike, eksperienca të sinqerta dhe një histori frymëzuese që ndihet në çdo cep të saj. /CNA





Lajmet e fundit nga