Skënder Rusi "rikthehet" mes lexuesve me vëllimin poetik “Kthema Ajrin”

1 Qershor 2026, 11:38, Kulturë CNA

Skënder Rusi "rikthehet" mes lexuesve me vëllimin poetik

Dy vite pas ndarjes nga jeta, poeti i njohur korçar, Skënder Rusi, u rikthye simbolikisht mes lexuesve përmes promovimit të vëllimit poetik dygjuhësh “Kthema Ajrin - Red?-mi Aerul”, një përmbledhje me poezi të zgjedhura të përkthyera në gjuhën rumune nga albanologu dhe përkthyesi i njohur Marius Dobrescu.

Aktiviteti i organizuar në Galerinë e Arteve Digjitale në Korçë mblodhi familjarë, miq, studiues, artistë dhe dashamirës të letërsisë, të cilët kujtuan figurën dhe veprën e poetit që mbetet një nga emrat më të dashur të poezisë shqiptare.

Skënder Rusi "rikthehet" mes lexuesve me vëllimin poetik

Në këtë përvjetor të dytë të largimit nga jeta të poetit, kujtimi i tij u shoqërua jo me trishtim, por me festimin e një vepre që vazhdon të jetojë dhe të frymëzojë. Përmes këtij botimi, poezia e Skënder Rusit kalon kufijtë gjuhësorë dhe mbërrin te lexuesit rumunë, duke sjellë më pranë botën e tij poetike, të mbushur me dashuri, mall, ndjenjë dhe humanizëm.

Skënder Rusi "rikthehet" mes lexuesve me vëllimin poetik

I biri i poetit, Eris Rusi, u shpreh se libri përfaqëson rikthimin e Skënder Rusit përmes asaj që ishte thelbi i jetës së tij, poezisë.

“Në majin e dy viteve më parë, Skënder Rusi u largua përfundimisht drejt qiellit. Më 31 maj 2026, dy vite më vonë, ai rikthehet me atë që është esenca e tij: shpirti i derdhur në poezi. Në një përmbledhje, në një vëllim dygjuhësh, rumanisht-shqip, përkthyer nga mjeshtri Marius Dobrescu, nën botimet ‘Onufri’, me një libër kuptimplotë nga titulli ‘Kthema ajrin’. Ne kemi nevojë që ajri të vijë edhe të bëhet pjesë e frymëmarrjes sonë përmes së bukurës dhe poezisë. Im atë ka besuar gjithmonë tek e bukura, ka besuar gjithmonë te poezia si një shërim i gjithçkaje që e bën të vështirë jetën në këtë botë. Dhe sot, nuk është një ditë ngushëllimi dhe dhimbjeje në këtë dyvjetor, është një ditë feste për të gjithë lexuesit edhe dashamirësit e poezisë, sepse Skënder Rusi del me librin e ri të tij",-tha Rusi.

Pjesëmarrësit në aktivitet sollën kujtime nga bashkëpunimet dhe miqësia me poetin, ndërsa artistë të ndryshëm interpretuan vargjet e tij, duke krijuar një atmosferë të veçantë emocionale. Për shumë prej tyre, Skënder Rusi mbetet një figurë e pazëvendësueshme e jetës kulturore korçare. Drejtoresha e Teatrit “Andon Zako Çajupi”, Zamira Kita, tha se poeti vazhdon të jetë i pranishëm në kujtesën e qytetit dhe në jetën e përditshme të atyre që e kanë njohur apo lexuar.

Skënder Rusi "rikthehet" mes lexuesve me vëllimin poetik

“Të lutem hiqe kremin vishnje të buzëve, që të të ndiej kur të të puth. Kush kryqëzohet me poetin, o bëhet krisht, o bëhet shkrumb. Kjo është e vërtetë, ne sot e kujtojmë pas dy vjetësh Skënder Rusin. E kemi kujtuar në çdo ditë të tij sepse ne lexojmë shpesh poezitë e tij, takohemi shpesh me Risin, me Eglën, shijojmë një kafe, sjellim kujtimet e tij. Nuk mund të harrohet Skënder Rusi sepse ai ka qenë shpirti i këtij qyteti. Dhe ju e dini që poezia e tij mban shumë dashuri për njeriun, dashuri për prindërit, vendlindjen, atdheun, natyrën, për gjithçka që duhet, ose që duhet të duhet. Prandaj dhe ne sot me shumë mall e kujtojmë Skënderin. Më duket sikur edhe dhimbja është larguar sepse ne e kemi shumë shpesh pranë vetes. Duke lexuar poezitë e tij nuk ndiejmë dhimbje, por ndiejmë atë dashurinë e madhe që Skënderi vazhdimisht ka përcjellë në vargjet e tij. Është organizuar shumë bukur sot. Do të sjellim videoklipet e poezive të tij, do ta sjellim të gjallë poezinë e tij me Blerta Belliu dhe Mario Çaçi, sigurisht edhe unë sepse nuk do të mungoj kurrë në mbrëmjet apo mesditat që i kushtohen Skënder Rusit”,-u shpreh Kita.

Ky prezantim u shoqërua me recitime, interpretime artistike dhe materiale audiovizive të bazuara në krijimtarinë e poetit, duke e kthyer aktivitetin në një homazh të veçantë për jetën dhe veprën e tij.

Skënder Rusi "rikthehet" mes lexuesve me vëllimin poetik

Përmes përkthimit në gjuhën rumune, poezia e Skënder Rusit fiton një hapësirë të re komunikimi me lexuesit jashtë Shqipërisë, duke dëshmuar se arti i vërtetë nuk njeh kufij. Dy vite pas largimit fizik, Skënder Rusi vazhdon të jetojë në vargjet e tij dhe në kujtesën e lexuesve. Libri “Kthema Ajrin” vjen si një dëshmi e kësaj pranie të përhershme, duke rikthyer mes publikut zërin poetik të një prej autorëve më të dashur të Korçës dhe të letërsisë shqiptare./CNA