Lirika Pojani rikthen “Korçën dikur” me një ekspozitë të veçantë etnografike

2 Nëntor 2025, 10:09, Qyteti im CNA

Lirika Pojani rikthen “Korçën dikur” me një

Kostumografja e njohur korçare, Lirika Pojani, ka sjellë për artdashësit e qytetit ekspozitën e saj të dytë personale, të titulluar “Korça dikur”. Ekspozita u çel në ambientet e “Shtëpisë së Flamurit”, në pedonalen e qytetit, duke ofruar një udhëtim të jashtëzakonshëm në kohë përmes kostumeve dhe elementeve etnografike që tregojnë historinë dhe identitetin kulturor të zonës.

Lirika Pojani rikthen “Korçën dikur” me një

Në këtë ekspozitë, Pojani ka sjellë një sërë kostumesh tradicionale që i përkasin periudhave të ndryshme historike, të realizuara me shumë kujdes e mjeshtëri. Çdo detaj, nga qëndisjet deri te përdorimi i objekteve të vjetra, pasqyron pasionin dhe përkushtimin e artistes për ruajtjen e trashëgimisë kulturore korçare.

Siç shprehet vetë Lirika për CNA, “Korça dikur” është vazhdim i ekspozitës së saj të parë “Etno Art”, që prej më shumë se një viti ka ngjallur interes të gjerë te publiku. Përmes kësaj ekspozite të re, Pojani ka synuar të rikthejë kujtimet, ngjyrat dhe simbolet e një kohe të shkuar, duke ndërtuar një mozaik figurash që tregojnë identitetin e pasur të qytetit.

“Kjo ekspozitë është vazhdim i ekspozitës time të parë 'Etno Art' e cila ka më shumë se 1 vit që funksionon në qytet. Tani vij me 'Korça dikur", jo pa qëllim kam sjellë Korçën dikur në ato vite, një mozaik me personazhe, me ngjyra, me simbole duke treguar identitetin tonë që e kemi shumë të larmishëm dhe shumë të shtrenjtë”, u shpreh kostumografja.

Përgatitjet për këtë projekt kanë nisur që në fillim të vitit, me një punë kërkimore të detajuar dhe mbledhjen e materialeve autentike. Artistja tregon se ka studiuar me kujdes dokumente, fotografi të vjetra dhe elemente tradicionale, duke u mbështetur edhe në ndihmën që ofron teknologjia bashkëkohore për të rikrijuar me saktësi kostumet e dikurshme.

“Patjetër, kam kohë që merrem me këtë punë. Puna filloi këtë fillim viti, duke mbledhur materialet, duke shfletuar sepse është një përgjegjësi shumë e madhe të flasësh me gjuhën e traditës. Për këtë shkak duhet të isha shumë e saktë. Besoj se ja kam dalë, kjo i ngelet njerëzve që kur ta vizitojnë, ta shikojnë, ta duan, tu kthehet nostalgjia”, tha kostumografja Lirika Pojani.

Pojani e sheh këtë punë si një detyrë dhe përgjegjësi për ta mbajtur gjallë gjuhën e traditës. Ajo beson se njohja e trashëgimisë kulturore nuk duhet të mbetet e fjetur, por të përcillet brez pas brezi.

“Materialet sigurisht që funksionojnë, ka koleksionistë që i mbajnë fotot e vjetra. Kam shfletuar, kam parë, tani teknologjia është e zhvilluar dhe më ka ndihmuar. Me këtë ekspozitë, gjëja e parë kryesore për mua është njohja e trashëgimisë kulturore, mos të jetë e fjetur e të njihet nga të gjithë brezat. Ne kemi etnografi shumë të bukur, të pasur e të larmishme dhe këtë duhet ta përcjellim”, tha për CNA, Lirika Pojani.

Ndërsa e pyesim për ekspozita të tjera, Lirika me shumë vendosmëri tregon se do të sjellë çdo vit diçka të re për Korçën.

“Patjetër, as që bëhet fjalë. Vit për vit do të vij me ekspozita shumë të bukura, gjithmonë në fushën e etnografisë por dhe me histori”, u shpreh Lirika Pojani.

Ekspozita “Korça dikur” është një ftesë për të rikthyer kujtesën dhe për të ndjerë krenarinë e trashëgimisë që na lidh me rrënjët tona. Përmes artit të saj, Lirika Pojani jo vetëm që ruan dhe ringjall traditën, por e shndërron atë në një përvojë të gjallë, që frymëzon çdo vizitor dhe e bën Korçën të ndriçojë edhe më shumë në hartën kulturore të vendit./CNA