Atmosferë magjike dhe muzikë tradicionale/ Pazari i Vjetër i Korçës, një nga pikat më të frekuentuara të qytetit

28 Dhjetor 2025, 14:10, Qyteti im CNA

Atmosferë magjike dhe muzikë tradicionale/ Pazari i Vjetër i

Atmosferë magjike, muzikë tradicionale dhe emocione të forta kanë pushtuar Pazarin e Vjetër të Korçës këtë fundjavë, duke e shndërruar atë në një nga pikat më të frekuentuara të qytetit.

Tingujt karakteristikë të serenatave korçare, të interpretuara nga Vaskë Niço dhe banda e tij, kanë krijuar një klimë të veçantë festive, duke mbledhur rreth vetes qytetarë korçarë, turistë dhe emigrantë të ardhur për të festuar fundvitin pranë familjeve të tyre.

Mes arkitekturës karakteristike të pazarit, muzika tradicionale ka sjellë nostalgji, mall dhe gëzim njëkohësisht, duke i dhënë qytetit një frymë të ngrohtë dhe mikpritëse. Serenatat, të njohura si një nga simbolet kulturore të Korçës, janë pritur me duartrokitje dhe emocione të dukshme nga publiku, i cili nuk ka nguruar të bashkohet në këngë.

Pazari i Vjetër është mbushur me vizitorë nga vende të ndryshme, kryesisht nga emigracioni, të cilët shprehen se këto momente janë një rikthim tek rrënjët dhe kujtimet e fëmijërisë. Për shumë prej tyre, atmosfera festive në Korçë është një përjetim shpirtëror, që i bën festat edhe më domethënëse.

“Jetoj në Greqi, jam korçare. Kam ardhur për pushime dhe u kenaqa jashtë mase. Atmosfera është e mrekullueshme, plot njerëz të gëzuar. Vaskën e kam komshi dhe na kënaqi shumë me këngët e tij. I uroj të gjithëve festa të gëzuara”, shprehet qytetarja.

“Nuk e prisja një atmosferë të tillë. Jo vetëm sepse janë festat, por sepse ndihesh shpirtërisht mirë. Ne që vijmë nga jashtë e ndjejmë këtë gëzim më shumë. I uroj popullit shqiptar dhe atij korçar mbarësi, shëndet dhe festa të gëzuara”, thotë një tjetër qytetar.

“Vij nga Greqia, por jam lindur dhe rritur në Korçë. Serenatat ishin të mrekullueshme, atmosfera shumë e bukur. Sot ishte një nga ditët më të lumtura për mua. Kemi ardhur prej një muaji dhe do të qëndrojmë edhe një muaj tjetër. I uroj të gjithëve një vit të mbarë dhe plot shëndet”, thekson qytetarja.

Aktivitete të tilla artistike po e kthejnë Korçën në një nga destinacionet më të preferuara turistike gjatë festave të fundvitit, duke promovuar vlerat kulturore, trashëgiminë muzikore dhe traditën e serenatave korçare.

Përmes këtyre eventeve, qyteti jo vetëm gjallërohet ekonomikisht, por forcon edhe lidhjen emocionale të emigrantëve me vendlindjen. Korça vazhdon të mbetet një qytet i festës, i muzikës dhe i traditës, ku çdo fundvit sjell bashkim, mall dhe shpresë për një vit më të mbarë për të gjithë. /CNA