web counter
LEXO PA REKLAMA!

SHKARKO APP

App Store
Google Play

Misioni i Alibeajt dhe rezultatet e zgjedhjeve lokale

17 Maj 2023, 19:32, Politikë CNA
Misioni i Alibeajt dhe rezultatet e zgjedhjeve lokale
Fotomontazh - Jorida Tabaku, Roland Bejko, Lulzim Basha, Enkelejd Alibeaj dhe Gazment Bardhi

Në zgjedhjet e 14 majit, PD e vulës së Alibeajt dhe Lulzim Bashës pati një rezultat “spektakolar”.

Rezultati foli vetë, 3%, 4%, kandidatët e saj të katërt, siç është rasti i Roland Bejkos në Tiranë që ka marrë rreth 8 mijë vota më pak se partia, pra kandidatë që nuk i votonin as njerëzit që kishin mbetur rreth Lulit dhe Alibeajt, apo njerëzit që gabimisht votuan siglën, nëpër këshilla bashkiakë, forcë e katërt dhe e pestë pa këshilltarë.

Sigla e PD-së, për herë të parë pas gati 32 vjetësh, del me një rezultat të paimagjinueshëm që nuk ndodhi as në 1997-ën, kur i gjithë populli shqiptar ishte armik me PD-në për shkak të firmave piramidale.

Sot për shkak se e ka marrë vulën Alibeaj me Gazin, me Lulin, me Joridën & Co, votat dalin ku thërret qameti.

Por si ta lexojmë këtë rezultat?

Ky rezultat është thjeshtë dhe vetëm një shërbim që Enkelejd Alibeaj, bizneset afër tij, interesat e tij, klienteliste, korruptive a politike, Lulzim Basha, interesat e tij, politike, korruptive, bashkëpunimi me Edi Ramën, videoja me Taulant Ballën e kështu me radhë, mund t’i bënin si shërbim kryeministrit të vendit, që ai ta kishte më të lehtë fitoren dhe rezultatin sa më të thellë dhe për të thënë që fajin e ka opozita e vërtetë, Berisha dhe Meta.

Nuk ka diskutim që edhe Berisha dhe Meta kanë fajet e tyre. Ndoshta Berisha Metën duhet ta kishte hedhur në kosh të plehrave, ka ardhur koha ndoshta që edhe Berisha të largohet, një tufë me horra të paaftë që i rrinë nga pas, një tufë me qelbësira, hajdutë, të korruptur që i mbajnë ison Sali Berishës, por ka edhe disa të vërteta të tjera.

Këto 3% këtu, 5% atje, 7% atje janë bërë me një qëllim për të treguar që s’ka më garë, që Rilindja është fituesja, që opozita ka mbaruar, këta duhet të ikin të gjithë e kështu me radhë.

Në fakt, po t’i shikosh rezultatet dhe po të analizosh në thelb problematikën del se opozita nuk ka një humbje katastrofike kaq të madhe sa raportohet. Flitet se mesatarja është rreth 60%, por po të shohim në thelb dhe po të mbledhin në mënyrë aritmetike votat që ka marrë “Bashkë Fitojmë” dhe kandidatët e Alibeajt në zonat ku kanë qenë, apo në këshilla, rezultati flet ndryshe.

Pra, nuk kemi një Parti Socialiste kaq të rritur në vota, kaq fituese dhe kaq solide, por kemi një PS në votat e saj tradicionale dhe një opozitë që është bojkotuar dhe nuk është votuar. Ky është rezultati.

Misioni i Alibeajt dhe rezultatet e zgjedhjeve lokale
Harta me rezultatin e zgjedhjeve

Përçarjen e opozitës dhe çuarjen e saj në shifra poshtë 40%, 35% e ka dërguar ndarja me Alibeajn, mbledhja e rezultatit arithmetik na jep një shifër tjetër.

Në rast se opozita do të ishte e bashkuar, do të kishte një frymë, kandidatë të përbashkët, një strategji tjetër elektorale, jo vula, pa vula, jo Ilir Meta, pa Ilir Meta, parti të tjera opozitare, si LZHK-ja, si Partia Agrare Ambientaliste, si Bindja Demokratike, si Partia Republikane e kështu me radhë, po të ishin në një front të përbashkët të gjithë, rezultati nuk do të ishte ai që del në hartën mavi të Shqipërisë.

Misioni i Alibeajt dhe rezultatet e zgjedhjeve lokale
Enkelejd Alibeaj, Lulzim Basha dhe Gazment Bardhi

Ajo hartë mavi është krijuar për shkak të përçarjes, përplasjeve dhe shërbimit që Lulzim Basha, Enkelejd Alibeaj, Gazment Bardhi, Jorida Tabaku, Roland Bejko dhe kandidatët e tyre i bënë Edi Ramës për ta ngjyrosur një herë Shqipërinë.

Nuk përjashtohen këtu edhe fenomenet Luizra, blerje votash & CO, por këta janë krejt të parëndësishëm, ndoshta edhe të pallogaritshëm sepse kurrsesi nuk mundet që PD të pranojë një dështim të tillë në Shkodër apo në qytetet e tjera nga fenomenet sociale të rastësishme që në fakt kanë deformuar rezultatin zgjedhor.

Por përgjegjësia mbetet te PD-ja zyrtare, te PD-ja e vulës, tek ajo e jo vulës, tek opozita në përgjithësi që e përçarë, e përçudnuar, e keqpërdorur nga Alibeaj & Co, nga Ilir Metërat me soj e sorrollop sollën këtë rezultat që tashmë të gjithë e kanë të qartë.

Shërbëtorët, shqiptarët i dinë mirë. Humbësit kanë një rezultat që ka mavijosur hartën e Shqipërisë, por jo dhe aq të pathyeshëm sesa duket sepse opozita tashmë është kthyer në një fasadë të një qeverie që e përdor dhe keqpërdor, jo në shërbim të qytetarëve, por e përçan dhe e sundon për interesa të saj./ CNA.al





Lajmet e fundit nga