"McGonigal"/ PD: Çështja në Kongresin e SHBA-së, të gatshëm të japim ndihmesën tonë

20 Shtator 2023, 14:41, Politikë CNA

"McGonigal"/ PD: Çështja në Kongresin e SHBA-së,

Partia Demokratike shpreh gatishmërinë e saj për të dhënë ndihmesën e saj në zbardhjen e çështjes "McGonigal". Zëdhënësja e PD-së, Floriana Garo, theksoi se çështja "McGonigal", si një veprimtari kriminale, po diskutohet edhe në Kongresin e SHBA-së.

"Angazhimi i Kongresit të SHBA-së për hetimin e kësaj çështjeje, dëshmon rëndësinë e jashtëzakonshme që ka zbardhja e saj. Partia Demokratike, përshëndet këtë akt të Kongresit të SHBA-së dhe shpreh angazhimin e saj për të dhënë ndihmesën e vet modeste në zbardhjen e aspekteve të caktuara të veprimtarisë kriminale të McGonigal në bashkëpunim direkt dhe të ngushtë me Edi Ramën, këshilltarin e tij privat Dorian Duçka, dhe ish-oficerin e policisë sekrete të Shqipërisë, Agron Neza në Shqipëri. Partia Demokratike deklaron se veprimtaria e këtij grupi të strukturuar kriminal me në krye Edi Ramën në Shqipëri është komplekse dhe shumë e rëndë.", u shpreh Garo.

Garo nënvizoi gjatë deklaratës për mediat se ky grup i strukturuar kriminal nën drejtimin e Edi Ramës në kundërshtim flagrant me ligjet e Shqipërisë dhe SHBA-së është angazhuar kundër opozitës shqiptare dhe shkatërrimit të saj, për llogari të pushtetit të Edi Ramës.

"Ky grup ka aplikuar në Shqipëri bazuar në mashtrimin e një sistemi gjobëvënieje ndaj bizneseve, me të cilin u ka zhvatur atyre dhjetëra miliona euro. Charlse McGonigal direkt ka ndërhyrë tek Edi Rama për nxjerrjen e licencave të naftës për llogari të kompanive ruse të Deripaskës. Me kërkesë të Edi Ramës, ai është angazhuar për hetim privat të akuzave për vrasje ndaj presidentit të Republikës, Ilir Meta të trilluara fund e krye nga aleati i ngushtë i Edi Ramës, Tom Doshi, me qëllimin e vetëm largimin nga posti dhe burgosjen e presidentit si kundërshtar i Edi Ramës", tha Garo.

Sipas Garos, refuzimi i hetimit të veprimtarisë kriminale të grupit të strukturuar Rama, Mc Gonigal, Duçka, Neza nga SPAK-u dëshmon qartë dhe përfundimisht se në Shqipëri nuk mund të hetohet asnjë aferë kriminale e lidhur me Edi Ramën e çfarëdo peshe qoftë ajo.

"Për të gjitha këto, Partia Demokratike paraqiti në parlament kërkesën me 45 firma të deputetëve të opozitës për hetimin e veprimtarisë antiligjore të grupit të strukturuar kriminal Edi Rama, McGonigal, Dorian Duçka dhe Agron Neza në Shqipëri, por në shkelje flagrante të kushtetutës, Edi Rama nuk lejoi ngritjen e këtij komisioni.

Përveç kësaj, Prokuroria e Posaçme e Shqipërisë nën kontrollin e plotë të Edi Ramës, refuzoi pa asnjë arsye ligjore të hapë hetimin për veprimtarinë antiligjore kriminale të grupit të mësipërm në Shqipëri, pavarësisht se veprat penale të këtij grupi, ishin kryer në Shqipëri nga shtetas shqiptarë në bashkëpunim me shtetas të huaj.

Refuzimi i hetimit të veprimtarisë kriminale të grupit të strukturuar Rama, Mc Gonigal, Duçka, Neza nga SPAK-u dëshmon qartë dhe përfundimisht se në Shqipëri nuk mund të hetohet asnjë aferë kriminale e lidhur me Edi Ramën e çfarëdo peshe qoftë ajo", përfundoi Garo.