web counter
LEXO PA REKLAMA!

SHKARKO APP

App Store
Google Play

Gjykata ktheu për rigjykim vulën/ Bylykbashi: Hapat tjera do merren nga organet kolegjiale të PD

3 Mars 2023, 19:19, Politikë CNA
Gjykata ktheu për rigjykim vulën/ Bylykbashi: Hapat tjera do merren
Nënkryetari i PD-së, Oerd Bylykbashi

Nënkryetari i PD-së, Oerd Bylykbashi, kundërshtoi vendimin e Gjykatës së Apelit për të kthyer për rigjykim çështjen e vulës.

Bylykbashi tha për mediat se vendimi i sotëm shënon ditë të zezë për drejtësinë dhe politikën shqiptare.

“PD-ja ka qenë fare e qartë, ka ngritur një proces i cili në mënyrë të jashtëzakonshme prej më shumë se 1 vit ka treguar qartë vullnetin e opozitës për të mos qenë palë me Edi Ramën, sot gjykata zhbëri me këtë vendim nën presion, 11 dhjetorin atë kuvend të jashtëzakonshëm të PD-së, të gjithë përpjekjen më shume se 1 vjeçare që anëtarët me votë në mënyrë të përsëritur kanë demonstruar se kush është vullneti i demokratëve dhe opozitës dhe me këtë vendim sot, vendim që shënon një ditë të zezë për drejtësinë dhe politikën shqiptare ka vendosur një precedent, 32 vite pas themelimit të pluralizmit me vendim gjykate, u vra pluralizmi”, u shpreh ai.

I pyetur se çfarë do të bëjë PD për regjistrimin në zgjedhje, Bylykbashi deklaroi se vendimi do të merret nga organet kolegjiale të zgjedhura të PD.

“Unë bëra komentin në lidhje me këtë vendim. Çdo hap tjetër do të merret nga instancat, organet kolegjiale të zgjedhura të PD, jo ato që ka emëruar kryeministri, apo që i intereson kujtdo tjetër, që nuk përfaqësojnë PD, por përfaqësojnë një logo që e ka përzgjedhur Edi Rama. Do të marrin vendim organet e PD-së dhe sigurisht populli opozitar ishte sot në shesh dhe ajo që ne kemi anonçuar në lidhje me përpjekjen tonë për të çuar demokracinë përpara. Vendimet e PD-së do t'i marrin organet e saj. Ajo që dua të theksojmë ne sot, kjo ishte një ditë e zezë për pluralizmin dhe demokracinë shqiptare. Gjykata sot provoi se ka rëndë përfundimisht dhe totalisht nën thundrën e Edi Ramës”, theksoi nënkryetari i PD-së./ CNA.al





Lajmet e fundit nga