E fundit!

13:13 Politikë

"Protestat arritje e madhe"/ Rama: Shqipëria e para në rajon për performancën mjedisore, e 46-ta në botë

Kryeministri Edi Rama në një postim të bërë në rrjetet soc...

Nga Iris Beqiri/ “Vjeshta” e politikës shqiptare

3 Tetor 2025, 17:53, Opinione Iris Beqiri

nga Iris BEQIRI

Shtatori ka nisur plot zhvillime për politikën e vendit dhe vijon të jetë tejet intensiv, teksa çdo ditë njoftohen vendime të reja, dekrete, agjenda e procedura të ndryshme institucionale. Ky muaj nuk përkon vetëm me nisjen e një viti të ri politik, por edhe të një rifillimi, si për veprimtarinë e parlamentit, ashtu edhe për forcat politike. Mbi të gjitha, vjeshta është periudha e një ritestimi për politikën, për të qartësuar fokusin dhe idetë, por edhe për t’iu rikthyer sadopak gabimeve që nuk duhet të përsëriten.

Në thuajse tre dekadat e fundit, në politikën shqiptare janë dalluar disa elementë, që në mënyrë të ngulmuese janë bërë pjesë e një normaliteti, herë të pakuptimtë e herë të pajustikueshëm, e parë për nga rezultati që kanë sjellë në shoqëri.

Gabimet e përsëritura të politikës shqiptare, që e kanë lënë në vendnumëro dhe e testojnë çdo vit, janë të njëjtat çështje që mund t’i përcaktojë çdo qytetar, të njëjtat problematika që diskutohen nga veriu në jug dhe të njëjtat shqetësime që ndahen nga njerëzit në shtëpi, punë e komunitet. Asgjë më shumë se kaq dhe vetëm kaq e thjeshtë! Kjo sepse politika ka një ndikim të gjerë dhe të prekshëm nga të gjithë. Të sjella përmbledhtazi dhe nga një kënvështrim i përgjithshëm, mund të ndahen në tri kategori.

Së pari, mungesa e theksuar e transparencës. Si veçori e rëndësishme e politikës dhe e një demokracie, transparenca siguron vendimmarrje të bazuar në rregulla e procedura, që nuk shkelen për asnjë arsye dhe interes personal. Transparenca është një mjet thelbësor për llogaridhënien e funksionarëve publikë dhe korrupsionit.

Së dyti, besimi publik në rënie. E pare për një parti apo individ të caktuar, shkaktohet nga ideologjia, skandalet, akuzat, qëndrime të caktuara publike për çështje me peshë e jo vetëm. Duket sikur qytetarët e kanë të vështirë të shfaqin besim, që nuk duhet të gëzojë politikanët duke e marrë si një shenjë për më shumë pushtet sepse e gjitha kjo është një rreth vicioz.

Së treti dhe më e rëndësishme, lloji i politikave publike të ndërmarra ndër vite, herë jospecifike, herë me probleme në implentim, është tregues se nevojitet më shumë vëmendje në shumë fusha e drejtime, për të marrë efektet e synuara, larg përpjekjeve për të tejkaluar sfida përmes mënyrave që kanë efekt vetëm në plan afatshkurtër.

Në këtë periudhë, që ndodh të jetë nisja e një legjislature të re për Shqipërinë, është më e domosdoshme se asnjëherë tjetër që çfarë nuk ka shkuar mire, të kthehet në një mësim për politikën e vendit.

Nuk ka më kohë për gabime politike. Është koha për synime të qarta, program të plotë, mirëorganizim, bashkëpunim politik në dobi të vendit, përtej intrigave.

Është koha që të bëhet politikë e vërtetë për shqiptarët dhe të ardhmen e Shqipërisë.