E fundit!

13:13 Politikë

"Protestat arritje e madhe"/ Rama: Shqipëria e para në rajon për performancën mjedisore, e 46-ta në botë

Kryeministri Edi Rama në një postim të bërë në rrjetet soc...

Ermal Hasimja për kryetar të Tiranës

1 Tetor 2025, 19:47, Opinione Berat Buzhala

Intrigat rreth arrestimit dhe shkarkimit të Erion Veliajt, jo se Erioni duhej të përfundonte ndryshe, po nxisin zhvillime interesante politike në Shqipëri.

Kryeministri Rama ka nominuar Ogerta Manastirliun nga kampi i socialistëve për kryetare të qytetit më të rëndësishëm shqiptar, duke e sfiduar hapur Erionin në burg, i cili po përpiqet ta bllokojë këtë proces përmes rrugëve ligjore.

Agron Shehaj nga Partia Mundësia, që në zgjedhjet e fundit fitoi dy deputetë në Tiranë, ka dalë me propozimin që opozita, pra PD, Mundësia dhe kushdo tjetër, të bashkohen rreth një kandidati jopartiak, të cilin duhet ta gjejnë përmes negociatave.
Unë besoj se kjo është rruga e vetme që mund të sjellë si ndryshimin, ashtu edhe pluralizmin partiak në Shqipëri.

Sot janë takuar ekipi i PD-së, Ilir Ali Mehmeti dhe Belind Këlliçi, me ekipin e Mundësisë, Erald Kapri dhe Barbara Doda. Ndër të tjera, prej aty ka lindur edhe ideja që si kandidat i përbashkët i opozitës për kryetar të Tiranës të jetë Ermal Hasimja.
Po shoh në rrjetet sociale një entuziazëm për propozimin e Ermalit, me të drejtë.

Ermalin e njoh dhe mund ta konsideroj edhe mik. Është ideologjikisht i djathtë, por jo vetëm me llafe, por edhe me përgatitje teorike dhe veprimtari praktike, themelues dhe drejtues i shkollës më të mirë private në Shqipëri, “Ernest Koliqi”.
Ermali është më i djathtë se të gjithë të djathtët në Shqipëri, por nuk është as militant e as tifoz. Ai është i djathtë sepse beson jo verbërisht, por sepse ka lexuar dhe është bindur.

Përndryshe, Ermali është me origjinë nga Gjakova dhe është krenar për këtë fakt.
Tirana do të ishte edhe me fat, edhe e lumtur të votonte për këtë qytetar, në të gjitha kuptimet e fjalës qytetar. Për më tepër, Ermali flet rrjedhshëm katër-pesë nga gjuhët më të rëndësishme të botës.
Berisha do të duhej ta mbështeste këtë propozim, nëse me të vërtetë dëshiron që PS të humbasë Tiranën.