E fundit!

13:13 Politikë

"Protestat arritje e madhe"/ Rama: Shqipëria e para në rajon për performancën mjedisore, e 46-ta në botë

Kryeministri Edi Rama në një postim të bërë në rrjetet soc...

PD gjen formulën e pagabueshme: kthen demokratët në armiq të partisë

17 Shtator 2025, 11:41, Opinione Erneda Kodra

PD gjen formulën e pagabueshme: kthen demokratët në armiq të

Duket sikur Partia Demokratike ka gjetur formulën e vetme që nuk gabon kurrë: kthen demokratët në armiq të partisë.

Para disa ditësh, kur fola për Valbonën, disa u ndien të prekur në tela e më shkruan pse theksova se PD-ja ka bërë gabime të shumta në numër. Por nuk e kisha llogaritur këtë “gabim të fundit”, "varrimin" solemn që opozita i bëri vetes në Elbasan.

Kalimi i Klodit nga PD në LSI nuk ishte një lëvizje politike, por një peshqesh helmues nga vendimet e Flamur Nokës, për demokratët e Elbasanit.

Ja ku jemi sot: kemi dy përfaqësues të LSI-së.

Demokratët e Elbasanit punuan e luftuan për të çuar në parlament dy përfaqësues të LSI-së.

E ndërkohë lamë pa mandat prej “peshqeshit” të LSI-së, Aurel Bylykbashin, një njeri demokrat që luftoi deri në fund për Partinë Demokratike, dhe të them publikisht, ka bërë një superfushatë. Një superorganizim me të rinjtë e forumit.

Qarku i Elbasanit e nxori një deputet të kësaj partie. Donte apo s'donte. Dhe kushdo në Elbasan i kujton mirë drejtorët e LSI-së, ata që kanë bërë namin në këtë qytet. Shushunjat e zarfeve e “kafeve” të majme.

Mos vallë qytetarët kishin faj që nuk e donin kësaj here LSI-në?

Elbasani sot është i rrethuar: 10 deputetë të PS-së, banda, bashkia, administrata, çdo hallkë në dorën e tyre. Dhe çfarë bën PD-ja? Me tre deputetë. Nuk ngre zërin e opozitës, përkundrazi: ia ul deri në pëshpëritje, ndërsa i rrit volumin LSI-së. Shumë thjesht mund të merrte deputetë nga një qytet ku s’kishte deputetë të LSI-së.

Pse duhej dobësuar opozita e Elbasanit? Kur pikërisht ne jemi qytet i kapur nga PS-ja dhe bandat. Edhe për sa kohë do t’i vuajmë “vendimet” e Flamur Nokës?

Po ju lutem, mos flisni për kalime “formalisht” se më kujtoni atë barcoletën e prostitutës që betohej se ishte e virgjër.

Dhe sot, të nderuar elbasanas, na përfaqësojnë në këtë qytet si opozitë Blendi dhe Tomori. Dhe le ta themi hapur: nëse ka një intelektual të rrallë, një njeri me bagazh, me integritet e mendim të thellë në atë Parlament të mjerë, është pikërisht Tomor Alizoti. Elbasani ka fatin ta ketë deputet këtë njeri të rrallë, por njëkohësisht, për fatin tonë të keq, ai nuk është bir i këtij qyteti.

Kështu që, të nderuar demokratë, qarku ynë mbetet në dorën e djalit elbasanas e demokratit Blendi Himçi dhe këtu, për të mos e lënë Elbasanin krejt pa zë opozitar, duhet falënderuar doktori që “dëgjon” Flamurin e na e kurseu atë dhimbjen e fundit, të mos mbeteshim krejt memecë.

Ky është realiteti ynë. Ky është gabimi i radhës. Dhe, siç duket, gabimet në këtë parti këtë mandat nuk janë më rastësi, janë strategji e heshtur vetëvrasjeje të partisë.

M’i kurseni ju të PD-së SMS-të: s’duhet të flasësh e këto historitë e shitblerjeve. Se jeni bërë më keq se komunistët.

Të thuash të vërtetën, jemi të shitur! Posi more, posi.

16 vjet rrugëve jemi, në pazar të madh. Veç terezisni mirë ato pazaret tuaja në kurriz të demokratëve. Pa ne që themi të vërtetën, shitemi sipas oreksit tuaj.