E fundit!

20:23 Aktualitet

"Rama, i gëzuar për samitin"/ Protestuesja: Çfarë do t'u thotë ndërkombëtarëve për 40 ditë protestë?

Protestuesit po mbajnë fjalimet e tyre përpara Kryeministr...

Të dyzetat e një sistemi antikombëtar!

9 Korrik 2026, 19:05, Opinione Brizida Gjikondi

Në Shqipëri po rishkruhet një histori biblike, ajo e Davidit të përbuzur dhe përbindëshit Golia. Ku Davidi e mposhti vetëm me forcën e shpirtit, moralit dhe të Zotit, Golian, i cili simbolizon mëkatin, forcën brutale dhe arrogancën. Prej 40 ditësh sistemit të gangrenizuar të pushteteve në Shqipëri, po i bie këmbana e fundit. Ata janë bërë bashkë si mishi me thoin. Politikë e vjetër, megabizneset imorale, media dhe pseudo intelektualë të dylekshit.

Edi Rama tashmë është lakuriq, i shëmtuar në pashpirtësinë e tij, i ligësht në hipokrizinë e tij, tradhëtar par excellence ndaj shpirtit të kombit të tij. Nuk është i majtë, nuk është i djathtë, nuk është anarkist, është thjesht i mjerë, ai dhe ata që e rrethojnë dhe nuk i thonë që është dhe janë lakuriq.

Prej dekadash, këtë popull në anestezi u përpoqën ta dëbonin nga tokat e tij duke i thënë që fajin e ka toka e të parëve, duke iu thënë se ligësia është normalitet dhe korrupsioni është kodoshllëk.

Nuk do doja të zgjatesha shumë në fjalë, pasi mendoj se tani është koha e sheshit, si në Greqinë e Lashtë, shesh të cilit nuk i jam ndarë që në ditën e parë. Aty mes njerëzve si një numër dhe jo si një simbol. Simbol janë të rinjtë ose Davidët e epokës tonë. Askush nuk ka nevojë për ligjërime dhe shpjegime dhe mbushje mendje, pse duhet të jetë në shesh, pasi qënia aty është raporti me veten dhe me përkatësinë kombëtare dhe genetike.

Dikur në një vend të shenjtë, një grua iralndeze u shpreh: kurrë mos i mbush mendjen askujt, besimi vjen nga brenda, jo nga jashtë. Dhe kjo është e vërtetë të gjithë komentet dhe habitë që kanë dashur të përplasen tek unë i kam devijuar me heshtje, sepse jeta na mëson që ata që ti përpiqesh t'i bindësh se e bardha është e bardhë dhe e zeza është e zezë, janë të parët që të tradhëtojnë.

Të heshturit dhe asnjanësit e kësaj kohe si duhen askujt, as vetes. Protesta është pastrimi 35-vjeçar i këtij vendi, i shesheve dhe i rrugëve të tij kryesore, Vlorës i ra kurora, sepse duhet të dish t'i mbash jo vetëm t'i fitosh kurorat, tashmë atë e ka Tirana e ka Shqipëria. S'ka kthim prapa, më prapa s'kishte ku të shkonte, ne ishim zombi dhe eunuk të së keqes në vendin tonë. Zoti na dha dorën dhe ne e kapëm. Prej 40 ditësh pushteti shikon si shkërmoqet makiazhi i tij dhe fytyra antikombëtare del në pah. Protesta është paqësore, horizontale, shumëngjyrëshe, ashtu siç i ka munguar kahershëm këtij kombi, nuk ka armiq, nuk ka urrejtje ka vetëm neveri dhe mëshirë për pabesitë dhe tradhëtitë.

Dhe kush vë në dyshim fitoren e kësaj lëvizje epokale i rikujtoj sërish një histori biblike, atë të Rënies së Jerikos, pa dhunë, pa gjak, pa vëllavrasje vetëm me shpirt e besim në Zot. “Se Zoti vetë e tha me gojë. Që kombe shuhen përmbi dhe, Por Shqipëria do të rrojë; Për të, për të luftojmë ne”!/CNA