LEXO PA REKLAMA!

SHKARKO APP

Shqipëria turistike, jehona në mediat e huaja

2 Janar 2024, 20:30, Kuriozitete CNA

Shqipëria turistike, jehona në mediat e huaja

Përtej atraksioneve të shumta turistike që vendi ynë zotëron, të cilat janë pa diskutim magnet thithës për turistët, një rol të madh ka luajtur edhe ndjellja që u është bërë të huajve përmes mediave ndërkombëtare, të cilat nuk kanë reshur së shkruari për Shqipërinë gjatë gjithë vitit, duke e kthyer vendin tonë në një destinacion “In”.

Përshkrimet për Shqipërinë si një vend i lirë e me plazhe të mahnitshme nuk kanë të ndalur nga buletinet më të njohura dhe prestigjioze të botës. Jo rrallë e kanë quajtur edhe “Maldivet” e pazbuluara të Evropës, apo “Italia e Vogël” për shkak të plazheve dhe çmimeve më të lira.

Gazeta britanike ‘The Sun’ në një nga artikujt e publikuar për Shqipërinë, e ka cilësuar si “Maldivet” e pazbuluara të Evropës ku çmimet janë të lira. 'The Sun' shkruan për Vlorën, që këtë vit ka parë rritje të numrit të pushuesve britanikë, ndërsa përmend edhe faktin që tashmë turistët mund ta kenë më të lehtë për të udhëtuar me aeroportin e ri që do të ndërtohet në jug.

Ndërsa revista polake "MojChorzow" shkruan ndër të tjera se Shqipëria, “perla e pazbuluar e Evropës”, ofron peizazhe të mahnitshme, histori dhe kulturë të pasur dhe ngrohtësinë e banorëve të saj vendas. Në artikull prezantohen disa nga pikat më të nxehta të turizmit në Shqipëri, ndërsa fton lexuesit ta vizitojnë .

Nga ana tjetër, prestigjiozja e udhëtimeve “National Geographic Traveller” e ka cilësuar Shqipërinë si një nga destinacionet më emocionuese që duhet të vizitohet në vitin 2024. Me titullin “Një arratisje e egër në yllin në rritje të Evropës”, revista rendit arsyet përse duhen vizituar Alpet Shqiptare. Ndikimi i mediave tradicionale dhe buletineve të udhëtimeve sigurisht ka dhënë ndikim në rritjen e turizmit, por popullariteti i Shqipërisë gjatë sezonit turistik erdhi edhe kryesisht falë “ushtrisë” së ndikuesve të mediave sociale që pushuan në Rivierën Shqiptare.

Ndikim në tërheqjen e turistëve kishin edhe vizitorët e profilit të lartë, përfshirë kryeministren italiane, Giorgia Meloni, e cila vizitoi bregdetin shqiptar me familjen e saj, ndonëse u ftua nga Kryeministri Edi Rama.

Sipas mediave të huaja nuk është vetëm tërheqja e eksplorimit të një destinacioni të ri që po sjell pushues nga e gjithë bota në Shqipëri, por edhe çmimet janë ndër më të lirat, duke u kthyer kështu në një destinacion të arritshëm për shumë pushues.

Shqipëria pritet që edhe gjatë vitit 2024 të jetë një ndër destinacionet kryesore të turistëve evropianë dhe jo vetëm, madje sipas tur operatorëve prenotimet për vitin e ardhshëm janë rritur me mbi 35%./ CNA

Lajmet e fundit nga