Ukraina në luftë me korrupsionin/ Zelensky: Kushdo që ka mashtruar në sektorin energjetik do mbahet përgjegjës

2025-11-10 22:43:00, Kosova & Bota CNA

Ukraina në luftë me korrupsionin/ Zelensky: Kushdo që ka

Agjencia antikorrupsion e Ukrainës ka deklaruar sot se ka kryer një operacion që zbuloi korrupsionin në sektorin e energjisë së vendit, i cili është goditur rëndë nga sulmet e fundit ruse.

Lidhur me këtë ka reaguar edhe presidenti Volodymyr Zelensky, i cili tha se kushdo që është i përfshirë në korrupsion do të mbahet përgjegjës, ndërsa u zotua se operatori i energjisë bërthamore të vendit do të drejtohet pa korrupsion.

"Të gjithë ata që kanë kurdisur një skemë korrupsioni duhet të marrin një përgjigje të qartë ligjore. Duhet të ketë vendime në gjyqet penale. Ndëshkimi është i nevojshëm. Energoatom aktualisht i siguron Ukrainës pjesën më të madhe të prodhimit të energjisë. Transparenca brenda kompanisë është një përparësi. Siç është në sektorin e energjisë dhe në çdo industri", tha Zelensky.

Byroja Kombëtare Kundër Korrupsionit (NABU) shpjegoi në një deklaratë se janë siguruar regjistrime audio, të cilat përbëjnë prova të aktiviteteve të një organizate kriminale të nivelit të lartë që vepron në sektorët e energjisë dhe mbrojtjes".

Sektori i energjisë është me rëndësi strategjike për Ukrainën dhe Rusia e ka goditur atë me raketa dhe dronë që nga nisja e luftës. Në fund të tetorit, ish-drejtori i kompanisë shtetërore të shërbimeve Ukrenergo, Volodymyr Kudrytsky, u akuzua për përfshirje në përvetësimin e rreth 283,000 eurove në vitin 2018 dhe u ndalua për një kohë të shkurtër në një rast që ai tha se ishte i motivuar politikisht.

Mediat ukrainase raportuan se NABU kishte kontrolluar gjithashtu shtëpitë e ish-Ministrit të Energjisë dhe Ministrit aktual të Drejtësisë, German Galuchenko, dhe Timur Midit, një aleat i ngushtë i Volodymyr Zelensky.

"Lufta e sotme nuk po zhvillohet vetëm në vijën e frontit. Është gjithashtu një luftë brenda sistemit, midis atyre që duan ndryshim dhe atyre që duan të mbulojnë gjithçka me para dhe heshtje", tha në mediat sociale Martina Boguslavets, një aktiviste kundër korrupsionit.

Ukraina, ashtu si Rusia dhe vendet e tjera ish-sovjetike, po përjeton korrupsion endemik dhe reformat për ta zhdukur atë janë thelbësore për realizimin e ambicieve të saj për t'u bashkuar me Bashkimin Evropian. /CNA