E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

"Vërsëllonja" braktis fushatën për PS-në

4 Maj 2025, 15:14, Editorial CNA

Nuk bën më fushatë! Nuk kërkon më vota për PS!

Tani del çdo ditë dhe kërkon nëpër Tiranë dhe regjistron kazanë të pazbrazur, inerte të papastruara, godina të lëna pas dore, bar të pakorrur e të tjera si këto.

Fushatë si opozitar!

Fundja nuk i ka ecur dhe aq keq duke u sjellë si nevrik dhe parimor.

Duke sulmuar ministra sa herë nuk i plotësonin kërkesën e radhës e duke mos ua quajtur për faleminderit kur i shkonin pas avazit.

E ka nisur jetën si deputet! Nuk ka bërë asnjë punë gjithë jetën. Edhe një herë që i erdhi rasti të bëhej zëvendës-kryeministër, e kalonte ditën duke bërë operacione blic për kontrolle orari ose rrinte gjith ditën duke kontrolluar sistemin e doganave dhe tatimeve, sepse deri tek Drejtor doganash a tatimesh besonte se mund të konkuronte.

Nuk mbahet mend për asnjë reformë sa ish-zëvendës-kryeministër dhe si ish-gazetar e vetmja karakteristikë është të shkruajturit me gërma kapitale. Nëse kjo quhet gazetari sigurisht!

Aq shumë i përdor ato kapitalet e shkreta, duke besuar se ashtu fokusohen ata që lexojnë tekstet që shkruan, saqë ngaqë i mbetet shumë më pak tekst me shkronja të vogla, të gjithë fokusohen tek pjesa me shkronja të vogla se besojnë që aty fle lepuri.

Bërtet sa herë që flet! Bile bërtet edhe kur shkruan! Sepse shkruan sikur po flet duke bërtitur.

8 mandate deputeti është mësuar vetëm të shkruajë për të lexuar duke bërtitur, ndaj nuk di të shkruajë që ta lexojnë të tjerët.

Imagjinoni të zbardhë ndonjë shkresë me atë stil që nuk është as gazetari.

Sepse gazetari shkruan që ta lexojnë. Ky shkruan që ta dëgjojnë ose ta përfytyrojnë duke lexuar, por detyrimisht duke bërtitur.

Ka ditë që vjen vërdallë nëpër qytet dhe filmon ndërsa flet pa fund fjali të zakonshme.

As opozitarin nuk di t'a bëjë më.

Duket si ata blogerët turist, që reklamojnë vendet ku shëtisin. Njëjtë si ata edhe ky ka zgjedhur temën që i përshtatet për friends-at e vet.

Ka zgjedhur të shfaqë zymtësinë e Tiranës.

Duke ecur i vetëm, duke folur pa fund e duke bërë si nevrik.

Mbase i ecën edhe kësaj radhe./ CNA