web counter
LEXO PA REKLAMA!

SHKARKO APP

App Store
Google Play

Kush po e trajton në mënyrë 'çnjerëzore' Erion Veliajn?!

3 Gusht 2025, 21:15, Editorial CNA

Kush po e trajton në mënyrë 'çnjerëzore'

Prej ditësh, ka shkrime, editoriale, qëndrime, se Erion Veliaj po trajtohet çnjerëzisht në burg. Këtë e thotë ‘kufoma’ e fundit e tij mediatike, Mero Baze, gazetari që qelb erë pasi u bë miliarder në pushtetin e socialistëve. Dikur, shërbëtor i paepur i Sali Berishës, tashmë siç vetëdeklarohet ‘Truri kryesor’ i Edi Ramës.

Flitet për trajtim çnjerëzor të Erion Veliajt. Por që të ketë një trajtim çnjerëzor, duhet të jetë një person që e trajton në mënyrë çnjerëzore.

Kush është ai?

Sipas Mero Bazes, njerëzit që e trajtojnë në mënyrë çnjerëzore Erion Veliajn janë Ols Dado, Altin Dumani dhe së fundmi është shtuar edhe Ulsi Manja. Pra, Dado e Dumani duke hetuar korrupsionin dhe duke ia mbyllur një dosje hetimore me 13 akuza, me fakte, prova dhe rreth 60 mijë faqe dokumenta, është trajtim çnjerëzor!

Në fakt, të hetosh dikë nuk është çnjerëzore, se janë me qindra zyrtarë të hetuar apo arrestuar dhe shumë prej tyre vuajtën edhe dënimin. Deri këtu, nuk ka asnjë trajtim çnjerëzor. Shpërthyen gjithë këto akuza për trajtim çnjerëzor të Erion Veliajt, por ende nuk thuhet një emër. Maksimumi bëhen editoriale ku drejtohet sulmi ndaj Ulsi Manjës.

Në fakt, për Erion Veliajn ka pasur një trajtim të diferencuar, jo çnjerëzor, që në momentin që ka dalë nga Bashkia e Tiranës.

Kush po e trajton në mënyrë 'çnjerëzore'
Erion Veliaj në ditën e arrestimit të tij

Sipas rregullit, ai duhet të dilte me pranga. Edhe Ilir Beqja është marrë me pranga dhe i është hedhur një bluzë mbi duar. Kurse Erion Veliaj doli me duar të lira, nuk u prangos.

Trajtim çnjerëzor është ky apo trajtim i diferencuar?!

Shkojmë më tej. Kur Veliaj u dërgua në spital për të bërë një kolonoskopi, kishte rreth 30 oficerë të Policisë së Burgjeve që e shoqëronin, megjithëse fillimisht u tha se ishin oficerët e BKH-së dhe njerëzit e Ols Dados. Në fakt, kanë qenë oficerët e Policisë së Burgjeve, të cilët po bënin detyrën. Një prej tyre ka qëndruar edhe në sallë, sipas rregullores dhe ligjeve të mirëpërcaktuara.

Ku është trajtimi çnjerëzor?!

Pse u gënjye në fillim dhe u tha se ishin oficerët e BKH-së dhe më pas ata të burgjeve? Cili ishte trajtimi çnjerëzor që i bëhet Erion Veliajt? Dhe trajtimin çnjerëzor ia bëjnë policët e burgjeve, me ministër Ulsi Manjën të Partisë Socialiste. Pra, i bie që këtë trajtim ia bën Edi Rama se e shoqëroi me 30 policë.

Por le të kthehemi pak në kohë dhe të kujtojmë se me sa policë është shoqëruar Fredi Beleri kur shkoi në varrimin e gjyshës së tij. Ishin 50 apo 100? Se ashtu e kanë rregulloret, për çështje sigurie. Beleri është shoqëruar me 100 policë, ndërkohë që ndaj tij ka pasur vetëm një akuzë. Ndërsa Veliaj është me 13 akuza të rënda dhe s’ka pse ankohet fare, pasi thjesht e vetëm janë respektuar rregullat e ligjet.

Cili ishte trajtimi çnjerëzor që i bëhet Veliajt? Qëndron i mbyllur në birucë apo i ka dyert e korridoreve të hapura? Se ta trajtosh dikë në mënyrë çnjerëzore, duhet të jetë një person dhe Veliaj e ka ‘Facebook-un’ e tij. Të na thotë emrin. Të dërgojë një kallëzim në SPAK apo në Prokurori, tek miku i tij Olsian Çela, se ndoshta e gjejnë personin dhe e ndalin trajtimin çnjerëzor.

Të trajtosh në mënyrë çnjerëzore dikë duhet të kesh emra dhe ne emra nuk kemi. Kemi thjesht e vetëm shpifje të bëra publike apo strategji për të shkuar në Strasburg, apo më keq akoma, me vullnetin për ta ndihmuar i bëjnë më shumë gropën Veliajt aty ku ndodhet.

Prej javësh, përpiqet të viktimizohet. Deri dje thoshin se nuk kishte akuzë. Tani që shkon akuza thonë se po trajtohet në mënyrë çnjerëzore, por ende nuk e thonë se cila është mënyra çnjerëzore që po e trajtojnë. Vetëm se shoqërohet me policë? Me 30? Mund të shoqërohej edhe me 100 policë. Të shoqërohesh nga policët e Burgjeve dhe nga punonjësit e shtetit, je i mbrojtur, nuk je i trajtuar në mënyrë çnjerëzore.

Cila është çnjerëzorja? Se Veliaj vazhdon e poston në rrjetet sociale, komunikon, se nuk i vunë prangat kur e morën në zyrë? Kjo është çnjerëzorja që i bëhet Veliajt?!

Po si mundet që në pushtetin e Ramës, që kontrollon gjithçka, të trajtohet në mënyrë çnjerëzore Erion Veliaj? Ka vetëm një përgjigje. Ndoshta është vetë Rama që po e trajton Erionin në atë mënyrë. Por, deri tani nuk kemi gjetur ende arsyen përse duhet të trajtohet Veliaj në mënyrë çnjerëzore. Në fakt, është trajtuar ndoshta në mënyrë preferenciale dhe përtej çnjerëzores qëndron ndihma, trajtimi preferencial që mund t’i bëhet kryebashkiakut të Tiranës dhe që nuk iu është bërë shumë të akuzuarve të tjerë. Prandaj edhe sollëm shembujt e mësipërm.

Ndaj, për Erion Veliajn nuk ka një trajtim çnjerëzor!

Veliaj ndodhet pas hekurave me 13 akuza për vepra të rënda penale dhe shumë shpejt duhet të dalë në gjykatë. Kjo është në dorën e avokatëve të tij, sikundër është edhe propaganda e gazetarëve të tij, që na kanë shpikur trajtimin çnjerëzor, për një njeri që trajtohet në mënyrë preferenciale./CNA  





Lajmet e fundit nga