web counter
LEXO PA REKLAMA!

SHKARKO APP

App Store
Google Play

Emrat dhe qeveria e re e Edi Ramës

6 Shtator 2025, 13:15, Editorial Elvi FUNDO
Emrat dhe qeveria e re e Edi Ramës
Edi Rama

Shumë media, gazetarë, analistë, politikanë, në diskutimet më të ethshme të ditëve të fundit, kanë qeverinë, kabinetin Rama 4, i cili pritet të shpallet nga kryeministri në datën 11 shtator.

Të gjithë bëjnë sikur i dinë të gjitha. Në fakt, askush nuk di asgjë.

E vërteta është se Edi Rama ka thënë një fjali dhe ato që thotë nuk i lëshon pa menduar:

Qeveri e re, parti e re.

Ka nga ata politikanë që janë bërë dhe "barkderra" duke i mbajtur Rama në pushtet, që janë të mërzitur, që duan të respektohen për votat, të cilat i kanë marrë se dikush ndoshta beson që e ka sjellë ai Edi Ramën në pushtet.

Nuk e kam fjalën për "barkderra" si shëndoshje, por "barkderra" politikë.

Si mundet të mendosh në 2025 se Rama i fitoi zgjedhjet për shkak të X apo Y, të filan emri apo filan emri?

Në fakt, me apo pa atë emër Edi Rama do ta mbante partinë e tij në pushtet kushdo që t’i dilte.

Koha ka treguar se edhe duke ikur njerëzit më të rëndësishëm, ata që e kanë mbajtur stekën lart, PS ka fituar edhe më thellë.

Në Tiranë, në bashkinë kryesore, PS nuk kishte atë që dikur e quante kalin e fushatës.

Në fakt, ngeli thjesht një emër i harruar në fushatë dhe PS tregoi se edhe pa kuaj të tillë të pretenduar mund të fitojmë mjaft thellë.

Ka të tjerë që janë të rinj dhe thonë është koha jonë në qeveri, të tjerë që pretendojnë të jenë në karrige, ata që përmendëm më lart.

Në fakt, e gjithë e vërteta është se askush nuk di asgjë.

Përtej ndonjë ministri, i cili duket qartas që do të jetë në kabinet, 1, 2 apo tre, më pak sesa gishtat e një dore, të tjerët dukshëm nuk do të jenë në kabinet.

Çfarë pritet nga Edi Rama?

Ajo që pritet nga Edi Rama dhe cilët janë emrat që do të kenë në kabinet është ajo që ka deklaruar muaj më parë: Parti e re, qeveri e re, pushtet i ri se, për Edi Ramën ky është treni i fundit.

Është treni i fundit për të kapur BE-në dhe vagonët duan një lokomotivë të fortë, duan një qeveri më të fortë që të mos mbajë mbi kurriz ministra me akuza, me skandale, me hetime nga SPAK-u, por të jetë një qeveri me një performancë që të shtyjë sa më shumë dhe të ndihmojë lokomotivën që e tërheq për të shkuar drejtë BE-së.

Pra, një qeveri me emra të rinj, me teknicienë, nuk do të ngelet pa asnjë diskutim jashtë edhe pjesa e përfaqësimit politik.

Rama gjithmonë ka ditur ta bëjë dhe siç e tha së fundi edhe në emisionin “Opinion” nuk e di ende se çfarë do të bëjë me Bashkinë e Tiranës, megjithëse atë e ka një gur shahu për ta lëvizur pikërisht në konfigurimin e qeverisë së tij.

Pra, që dikush nga qeveria me eksperiencë shkon dhe drejton Bashkinë e Tiranës, që, kuptohet, Rama e ka “dashurinë e tij të vjetër”.

Pra, pritet të dëgjojmë një fjalim të gjatë dhe në fund për dy minuta lexohen emrat dhe këtu mbyllet e gjithë historia.

Askush nuk di asgjë përveç asaj që ne thamë më sipër se do të kemi një qeveri, e cila do të tërheqë fort vagonët e një lokomotive që kërkon ta çojë Shqipërinë në BE. Kjo është e gjitha.

Edi Rama, në mandatin e katërt, nuk ka pse mban më askënd mbi kurriz dhe të gjithë të rinj apo të vjetër, kush me qejf e kush pa qejf, ç’flasin apo ç’kanë ndarë tavolinave se do të vijë ky apo do të jetë ai, në fakt janë thjesht llogje politike sepse askush nuk di asgjë.

I vetmi që di është Edi Rama, të tjerë as nuk guxojnë ta pyesin e jo më të dinë pozicionin që do të kenë. As ata që janë ministra dhe as ata që pritet të vihen ministra./ CNA





Lajmet e fundit nga