E pranon drejtoresha/ Leka Bungo nuk duhet të marrë fonde nga RTSH-ja

14 Janar 2025, 15:58, Denoncim CNA

CNA ka denoncuar skandalet në të cilat është përfshirë Radio Televizioni Publik Shqiptar në mënyrë të vazhdueshme.

Pak ditë më parë, CNA publikoi për herë të parë një kontratë mes drejtorit të RTSH-së, Alfred Pezës, dhe Leka Bungos, i cili është kthyer në rolin e skenaristit të emisionit "Gëzuar", pra një programi televiziv në Radio Televizionin Publik Shqiptar.

Dokumenti tregon qartazi se janë miliona lekë dhe një konflikt i pastër interesi para që jepen nga fondet e taksapaguesve shqiptarë dhe buxhetit të RTSH-së për programin.

Leka Bungo, në shkelje të ligjit

Drejtoresha e Përgjithshme e RTSH-së, Aurora Polo, ka pranuar se kryetari i Këshillit Drejtues ka kryer shkelje.

Në kthimpërgjigjen nga drejtoresha Aurora Polo për CNA nënvizon diçka shumë të rëndësishme, e cila nxjerr në fakt skandalin dhe shkeljen e Leka Bungos, kryetarit të Këshillit Drejtues të RTSH-së.

Drejtoresha ka pohuar atë që në fakt është e theksuar dhe në statutin e RTSH-së se anëtarët e Këshillit Drejtues të RTSH-së apo vetë kryetari i Këshillit Leka Bungo nuk mund të marrin fonde.

“Referuar vendimit nr. 3 datë 9.1.2024 të Këshillit Drejtues përjashtohen nga pagesa me honorare për angazhime në projekte filmike dhe artistike të RTSH-së, vetëm drejtuesit e RTSH-së që zgjidhen nga Këshilli Drejtues”, thekson drejtoresha Aurora Polo për CNA.

Gjithashtu Statuti i RTSH e ndalon që anëtarët e Këshillit Drejtues të marrin fondet.

Pra, në asnjë moment nuk thuhet se kryetari i Këshillit Drejtues mund të marrë para për rolin e tij si skenarist në programe televizive.

Kjo është një shkelje e kryer nga kryetari i Këshillit Drejtues të RTSH-së, Leka Bungo dhe drejtuesit e këtij televizioni.

Leka Bungo është në konflikt të hapur interesi pasi si kryetar i Këshillit Drejtues të RTSH nuk mund të marrë fonde dhe si rrjedhojë as anëtarët e këtij Këshilli.

Skandal në RTSH/ Kryetari i Këshillit Drejtues mori lekë për organizimin e programit televiziv
6 Janar, 12:59

Skandali qëndron në faktin që Leka Bungo vetë voton, miraton projektet dhe më pas merr për vete paratë për programet televizive duke u shfaqur si skenarist.

Institucionet përkatëse duhet të zbardhin të vërtetën pasi problemi në këtë rast nuk është vetëm Leka Bungo që shkel ligjin dhe merr fondet por edhe drejtuesit e institucioneve kryejnë shkelje./ CNA