Kalendar historik/Çfarë ka ndodhur më 28 shtator?

28 Shtator 2023, 11:31, Blog CNA

1928 - Anglezi Aleksandër Fleming zbulon penicilinën

95 vite më parë u zbulua një substancë e cila e transformoi plotësisht historinë e mjekësisë. Ajo quhej penicilinë dhe ishte antibiotiku i parë në botë, tejet jetik për krijimin e ilaçeve për të shëruar infeksionet bakteriale. Dhe aspekti më interesant është se ajo u zbulua gati rastësisht!

Deri në atë kohë mjekët nuk ishin në gjendje të trajtonin disa kushte, që sot janë shumë më të lehta për t’u kuruar, për shkak se nuk kishin ilaçet e duhura. Edhe simptomat më të thjeshta, si për shembull një dhimbje fyti, mund të ishte fatale nëse infeksioni përhapej në mushkëri.

Pneumonia dhe infeksionet pas operacioneve vrisnin një në çdo tre persona të prekur. Në atë kohë Aleksandër Fleming ishte një shkencëtar që punonte në Spitalin Shën Maria në Londër. Ai ishte duke kryer kërkime mbi virusin e gripit. Një ditë shkoi me pushime.

Kur u rikthye në laboratorin e tij, zbuloi se kishte ndodhur diçka shumë e çuditshme. Para se të largohej, ai nuk i kishte pastruar të gjitha enët nga bakteret mbi të cilat kishte punuar, dhe një pjesë myku ishte krijuar te njëra nga enët e tij të pista. Por ndërsa bakteret po rriteshin kudo tjetër në pjatë, asnjë nuk po rritej rreth mykut.

Kalendar historik/Çfarë ka ndodhur më 28 shtator?

Fleming kuptoi se diçka në myk po i vriste bakteret. Ai e zbuloi se çfarë ishte ajo substancë dhe e quajti atë penicilinë. Do të kalonin edhe 12 vite të tjera para se ajo të ishte gati për t’u përdorur gjerësisht si ilaç. Aleksander Fleming mori titullin Sër në vitin 1944, dhe më pas fitoi Çmimin Nobel për zbulimin e tij. Gjatë Luftës së Dytë Botërore, penicilina shpëtoi jetën e 1 në 7 ushtarëve britanikë të plagosur në fushën e betejës.

Kalendar historik/Çfarë ka ndodhur më 28 shtator?

Ngjarje të tjera të rëndësishme:

1066 - Uilliam, guvernatori i Normandisë, pushton Anglinë. I njohur edhe si “Pushtuesi”, ai u përball me ushtrinë e Mbretit Harold II në Betejën e Hastings, e cila shënoi fillimin e një epoke të re në historinë britanike.

1791 - Franca bëhet vendi i parë evropian që shpall emancipimin e popullsisë së saj hebreje. Para këtij akti, shumica e hebrenjve jetonin të izoluar nga pjesa tjetër e shoqërisë.

1895 - Vdes biologu i mirënjohur francez, Luis Pastër. Ai dha një kontribut të jashtëzakonshëm në studimin e infeksioneve spitalore, dhe futjen e praktikave revolucionare në sterilizimin e mjeteve spitalore para dhe pas përdorimit të tyre.

1904 - Një grua arrestohet, pasi guxoi të pijë një cigare në publik në bulevardin “Fifth Avenue” në Nju Jork.

1961- Një grusht shteti ushtarak në Damask, i jep fund unionit Egjipt-Siri të njohur ndryshe si Republika e Bashkuar Arabe, që u formua më 1 shkurt 1958.

1995 - Kryeministri izraelit, Jitzhak Rabin, dhe udhëheqësi i Organizatës për Çlirimin e Palestinës, Jasser Arafat, nënshkruajnë një marrëveshje të përkohshme në lidhje me vendbanimet në Rripin e Gazës./ Përshtatur nga CNA